Ephesians 2

Kanig talisawes, mwamov taba̱nes

Yakamiy kweiboug mamagina takanigs yakamiy peinan amisinap kalbaleb o nukusiplaves Yowbad nakaleiwag, o peinan amisinap mamagina ven watinow sinapun, o peinan nukwanawes aygan takaleiwag towen kalbaleb, bwagaw kweitan kweitan sitovek, o gamags-vak takapidabs sitovek.

O ya̱kids kweiboug ma̱wana tasiyas, advikeiys nikaliwageids, aveiyag wouds sivinan o nanouds. Kadiloka Yowbad bikamta̱nids ma̱wana tasiyas.

Tage Yowbad, singaya inok nuwan ya̱kids, o isiwyoubuds avakaein.

Ya̱kids mamagina takanigs ya̱kids peinan adsinaps kalbaleb, mo iyakituds sods Kelis. Bo ikatinabweids nasiwa̱youb towen waseg.

E, Yeisuw Kelis waseg iyamoveids mo isekeids idakaleiwags, va̱gan bitakaleiwags sods Kelis walba̱lab waseg.

Mapuna tut wanakougwaw babaw gamag tut babaw mo bikakins nasiwa̱youb singay avakaein, peinan ikalin nuwan ya̱kids, Yeisuw Kelis waseg.

Tasimounids waseg Yeisuw, mo Yowbad ikatinabweids, adsinaps kalbaleb waseg, peinan inok nuwan ya̱kids. Ta-ma̱wan bitakatinabweids tatoneids ya̱kids, nag. Tage Yowbad nasiwa̱youb waseg.

Nag aveiyag tawtoun bitawteles mo Yowbad bikalin nuwan, bikatinabweids, nag. Bo isiwyoubuds mav. Kukin bikatinabweids peinan dawotets tawtoun, mo bitakaypamwes kid sinap. Awoum.

10 Yowbad bo iwotet wanuwads, Kelis waseg, silma̱nin adsinaps bwanabwein; Yowbad inawotet towen. Kweiboug nikatigik dawotets bwanabwein va̱gan bitawteles, nagein gog mo iwotet wanuwads.

Sods Kelis katanoka gamag ya̱kids

11 Kuninuways, tobwag ven gimgilis yakamiy. Min-Yudiy nimes waseg ibwabwes momwes, o idokeimiy tobwag gamag yakamiy, peinan ta-ivag anaboub momwamiy.

12 Mitiya̱mun towen nag kukwakins Kelis, nag kukwakins Yowbad nakaleiwag min-Yisleil wasigeis, peinan tobwag gamag yakamiy. Bo ilivnek nasiwa̱youb wasigeis tasiyas; yakamiy nag. Kweiboug nag kunmises va̱gan Yowbad bilabeimiy; nag. Nag ivag miYowbad bwanabwein, nag.

13 Kweiboug kadiveiyov nukusesus, tage nagein mo nukusineikimas; peinan buya̱vin Kelis neiwout pinamiy yakamiy, o pinem yakamey; mapuna yakamiy bo imayeimiy yakamey wadidem.

14 Mtowen Yeisuw mamagina niwal peinads ya̱kids; yakamey min-Yudiy simayas vena babaw gimgilis yakamiy, bo tamlavags bod katanok-wan. Won Yeisuw waseg bo igulek ablivis towen wanuweinids ya̱kids; ablivis towen yagan kameiliw; mo iyakous min-Yudiy yakamey makaleiwag babaw, va̱gan biyakous bod kweitan, kweitan. Sivinan kid beivag katanoka bod, kweivaw bod ya̱kids sods mtowen, mo bitamsamwas babaw ya̱kids.

16 E, bo ikanig wa̱klos va̱gan bukumwas simiy Yowbad yakamiy, o bakamwas simey Yowbad yakamey, mo bitamlavags bod katanok ya̱kids; peinan anklos waseg bo ikatigulek sinap towen yagan kameiliw bo iyakous.

17 Mapuna mtowen bo isunap, igeiguy va̱gan kid kameiliw beikous; bo iguyeimiy yakamiy, kadiveiyov nukusesus, o iguyem yakamey, kadiyakusan nakases. E, Yeisuw bilabeids mo bitanekes Yowbad, peinan Kululuwan katanok-wan, mtowen imgwayeids babawa ya̱kids mo tanekes Tamads Yowbad.

19 Kweiboug yakamiy ma̱wana bwabwal o taggobwaws yakamiy; nagein gog nukumlavags Yowbad angamag simiyas tayakelesiys babaw.

20 Ya̱kids mamagina Yowbad nabunatum. Yeisuw Kelis kakolan tatonen; tasiyas takaweins liva̱nen Yeisuw sisiyas tasiyas palopit mamagina siy; yakamiy gog wululay.

21 Kelis waseg takativaseids sidayas mo tamlavags bunatum katanok-wan, o Yowbad ikayus nabunatum towen bwanabwein.

22 Yowbad Kululuwan ikativaseids mo tamlavags Yowbad nabunatum. Yakamiy-vak Kelis waseg, nukumeis silma̱nin bunatum towen, kwativases waseg.

Copyright information for `MYW