Galatians 5

Kelis bo isekeids dakiyays mounid. Awoum kutams vayuwein kaleiwag moumouvit waseg, awoum.

Kelis nakaleiwag

Yey Pawl agulivan mamagina. Kukin bukubwabwes momwamiy mamagina min-Yudiy sikaleiwag bukukwawes. Kelis nag bilabeimiy.

Vayuwein alivan mamagina: Kukin kal yak kubob momwam, kadiloka kuvnas Moses nakaleiwag meivek-wan.

Bukudokes kid min-Yudiy sikaleiwag bikidumwa̱lumiy, nag gog, kusilbwades Kelis. Peinan kupiyaves nasiwa̱youb tonen bo kukwalouws kid.

Ya̱kids gog tanmises Yowbad Kululuwan bikidumwa̱luds, peinan tasimounids waseg.

Yeisuw Kelis waseg, takawein min-Yudiy asisinap nag bimlavag tadidumwal, nag. Tapiyavein sinap towen nag bimlavag tadidumwal, nag. Misinaka kal bisimounid waseg Kelis, binamis waseg Kelis, mamagina bikalpwa̱kit waseg towen Yeisuw Kelis, mo bimlavag tadidumwal towen.

Nukusilamaws sinap mounid waseg. Kal nisilbwadeimiy? Mo kupiyaves kid Yowbad ansinap. Peinan Yowbad nidaweimiy ansinap bwein waseg, nag beitam kweitan sinap; tage teitan gamag neiteiy ninoumiy kweitan sinap waseg.

Yist kakit binek pwalaw avakaein, tamkwa̱lan mo beilol kid. Awoum kutams kakit sinap kalbaleb waseg.

10 Nanoug nises daGuyaws bilabeimiy mo bukupiyaves sinap to kalbaleb; tage Yowbad bikatimop ansinap kavel towen niyabol ninoumiy.

11 Sigwayas, magat baguyes tasiyas niyakelesiys Kelis waseg va̱gan bibwabwes momwes, mogo min-Yudiy nag bikamliweigs. Tage bo ikamliweigs peinan alana, “Yeisuw Kelis nikanig waklos va̱gan bikidumwa̱luds.”

Kukin gog badibakes tobwag ven gimgilis, “Kadiloka bibob momwamiy, va̱gan bukumlavags min-Yudiy yakamiy,” mo beibwein ninous min-Yudiy tasiyas. Nag gog, min-Yudiy bo ipiyaves agulivan towen, liva̱nen Yeisuw neiweiys wa̱klos.

12 Tasiyas sivines bibwabwes momwamiy, bweina bikablaves powes tatineis.

13 Sigwayas, Yowbad nidaweimiy nakaleiwag kweivaw waseg. Bo ikous mouvitan kaleiwag kweiboug wasigeis yakamiy. Kal yak bukutam kaleiwag kweivaw mo beibwein nanoum. Awoum kaleivim bikaluweg nanoum, awoum. Tage siwa̱youb bikalawageim va̱gan bukuvna̱ses simiyas.

14 Livan katanok bo kadilok kaleiwag babaw. Livan towen mamagina,

“Kadiloka kuvnas soum ma̱wana kuvna̱seim tatoneim.”
15 Tage beivag kakat wudoumiy, bukuygages simsimiyas, adok bukuyakousis bod yakamiy.

Kululuwan anagin kweitan, kaleivin anagin kweitan

16 Sinap towen kunages: Magat Yowbad Kululuwan bikaluweg ninoumiy, ta-ma̱wan kalivimiy bikalawageimiy. Peinan kaleivid sivinan bisilbwed Yowbad Kululuwan nakaleiwag, o Kululuwan sivinan bisilbwed kaleivid nakaleiwag; mamagina ivvatays, mapuna aveiyag sivinad ta-ma̱wan bitawtel.

18 Magat Yowbad Kululuwan bikaleiwag mo biyakous Moses nakaleiwag wasigeis ya̱kids.

19 Takinbunikes kaleivid nawotet mamagina: kanavay mav, subwan, kalimwa̱saw, meg, bwagaw, kameiliw, kamniman, moumouvit dabad, kavikun, gidukis, silponay, silakod, sinal, kananeiy, govek, o sinap mamagina tasiyas imwamoums wiskiy mo imlavags takabala̱weins tasiyas. Kweiboug nadibakeimiy, kweivaw bo alivan-vak ma̱wan: Tasiyas ma̱wan asisinap kalbaleb nag beisiws Yowbad wanakabkaleiwag, nag.

22 Tage Yowbad Kululuwan nawotet mamagina: siwa̱youb, mwa̱saw, niwal, kapatul, sinap didumwal, guyaw, simounid, ma̱num, sinap kamnat. Nag kweitan kaleiwag bitawtoun waseg sinap towen bwanabwein.

24 Magat Yeisuw Kelis angamag ya̱kids bo nitaweiys kaleivids waklos va̱gan kid kaleivids ansinap kalbaleb nag bikaleiwag wasigeis ya̱kids.

25 Kukin Yowbad Kululuwan biymoveids, kadiloka bikaluwageids, mamagina dakavaveis Kululuwan Towen.

26 Awoum bitakayapam. Awoum sivinad gamag babaw bikavasid o bigoulud; awoum. Adok sidayas mo bimouvit dibes o bikamliweids. Awoum bitava̱ges ma̱wan; awoum.

Copyright information for `MYW