Hebrews 10

Moses nakaleiwag waseg nag mwa̱saw tatonen. Mwa̱saw towen waseg igaw tut wanakougwaw, tage Moses nakaleiwag waseg, yagada mwa̱saw. Moses nakaleiwag waseg iwaweiys lun bulukwan bweilim katanok katanok, pines gamag tasiyas ikanawes nakaleiwag, va̱gan binekes Yowbad; tage nag kadilok bivag asisinap beibwein.

Kukin bivag asisinap beibwein mo biyakousis mansiyas lun bulukwan, tage nag asisinap ibwein, mapuna ivvaluts bweilim katanok katanok waseg. Kukin lun towen biwid gamag tasiyas sikalbaleb, mo beikous asimwasin. Tage lun towen waseg bweilim katanok katanok ininuways; asimwasin, peinan asisinap kalbaleb nises.

Mapuna ilneiluns waseg mansiyas bulumakaw o gouts buyvis, tage nag kadilok biwidis sinap kalbaleb.

Wankuyeim Kelis neim ven watinow, ilana,

“Nag sivinan lun o aveiyag gamag bisekeims, nag. Tage woug nukusekeig.
Nag sivinan lun bulukwan bitagob beikous, o bitasekeim peinan adsinap kalbaleb; nag.
Mapun alana, ‘O Yowbad, kukineig nam bawtel muwotet, aveiyag sivinam.
Ma̱wan liva̱neig nilel Bukitab sinbilibil waseg.’”
Peinan lelel wakunuwatan, ilana,

“Nag ikalin nuwam lun, o nag sivinam siwa̱youb silma̱nin lun,
o nag sivinam lun bulukwan bigabus beikous,
o nag sivinam lun silma̱nin sinap kalbaleb, nag!”
(Moses nakaleiwag waseg nisekes lun tasiyas.)
Mapuna Yeisuw ilana,

“Kukineig nam bawtel muwotet, aveiyag sivinam.”
Mamagina bo igidem kweiboug kaleiwag, va̱gan bisein kweivaw.

10 Yowbad nanon ma̱wan, mo Yeisuw Kelis itam won mamagina lun bulukwan, sivtanoka imat, bo misinak. Iva̱geids mo tabweins, angamag ya̱kids.

11 Lun tanuwgwes tatanok tatanok itamanaws iwwotets yam katanok katanok, ivvalutsa lun Yowbad waseg; tage nag kadilok biwid gamag asisinap kalbaleb.

12 Kelis gog sivtanoka ilun peinan adsinaps kalbaleb, bo kadilok lun towen silma̱nin bweilima babaw bisim bisigeg. Ilun ikous mo isin Yowbad wanaka̱tay; ikayamat ee... igaw Yowbad mo biva̱ges tasiyas astameiliw towen mo beibus bimlavags mamagina nakabtatet.

14 E, sivtanoka ilun; bo kadilok lun towen silma̱nin bweilim babaw bisim bisigeg. Lun towen waseg ivag adsinaps ibwein, angamag ya̱kids.

15 Kululuwan Bwanabwein, towen-vak idibakeids; anilivan ma̱wan:

16 “Yowbad ilana,
‘Yam tasiyas beikous, mo basek gunakaleiwag towen wasigeis tasiyas.
Basen gunakaleiwag wakateis,
O balel gunakaleiwag waninous.’”
17 Wankuyeim mo ilana:
“Nag vayuwein banuway asisinap kalbaleb.”
18 Peinan biwid adsinaps kalbaleb binumlev, mapuna mo biyakous lun silma̱nin sinap kalbaleb.

Bweina takapwapouts

19 E sigwey, Yeisuw buya̱vin neiwout peinads, mapuna takapwapouts mo bitasiws wanuwan Yowbad nabunatum.

20 Ked towen kweivaw, mwamov silma̱nin. Tut kweiboug, kweim nisilbwed Yowbad nabunatum. Yeisuw bo ikaliyow va̱gan bitasiws ya̱kids, peinan won iyagages peinads.

21 Tanuwagan lun towen datoveks avakaein, ikaleiwag Yowbad nabunatum waseg.

22 Bweina bitaskakins waseg, adsinaps didumwal, o bitasimounids va̱gan bitakapwapouts, mo beikous adpwa̱yats waseg towen. Mamagina bisiwlik nanouds mo beikous dakanuways kalbaleb, o biwid wouds yevagam gimagim waseg.

23 Bitayyousis liva̱nen idanamis silma̱nin mwa̱saw. Awoum bitagweys. Towen nilivnek idamwa̱saws bo bitoukum silma̱nin.

24 Kadiloka bitalabeids meiveka ya̱kids, mo bitasiwa̱youbs babaw ya̱kids, o bitawotets bwein.

25 Mwasanin nag ikatikunouks silma̱nin tapwa̱loul. Awoum bitapiyaves katikunouk ma̱wan tasiyas. Tage bitalabeids meiveka ya̱kids. E, igaw bitakines Yeisuw kakita beiyum beim, mo bitaguyeids va̱gan bitalabeids meiveka ya̱kids.

26 Kukin bitakakins Yowbad sinapun wankuyeim mo tatoneids bitava̱ges adsinaps kalbaleb. Bo bigak! Nag kwayuwein lun nises silma̱nin adsinaps kalbaleb.

27 Tage kadiloka bitawenes Yowbad igaw bikatimop, son kov tawtoun, waseg bigabus tasiyas astameiliw Yowbad.

28 Kukin kal isiplev Moses nakaleiwag, asteiy o asteitoun ikamteles ansinap kalbaleb, nag inok nuwes, mo iweiys imat.

29 Tage singay takalbaleb towen kavel bipiyev Yowbad Natun, o biyageg nakaleiwag. Kaleiwag towen buya̱vin biwidids, va̱gan beibwein adsinaps. Tage takalbaleb towen bo bikamliw Kululuwan towen nililabeids. Yowbad singay bimop ansinap gamag towen.

30 Takakinsa Yowbad, peinan anilivan mamagina:

“Yey bamop asisinap kalbaleb; gunawotet towen.”
Liva̱nen kweitan mamagina:

“DaGuyaws igaw bikatukin nagamag asisinap, aveiyag bwein, aveiyag kalbaleb.”
31 Yowbad tamwamov bikaleiwag mo bimop adsinaps kalbaleb. Singaya bitawenes!

32 Kuninuways tut kweiboug, ninoumiy bo ikamnat waseg sinapun Yeisuw, wankuyeim abamiy mo igeg singay, tage kwaptuleimiy-wan. Bo iyyageimiy o iyagageimiy wavtakon ven o simiyas bo ma̱wan.

34 E, bo inok nuwamiy tasiyas nisenas wa̱deil peinan Yeisuw angamag tasiyas. Gamag mwasanin niyagages miven, miwliyoug babaw ikawes ikous, tage bo nukumwa̱saws-wan peinan nukukwakins miven bwanabwein walba̱lab nises isigeg.

35 Awoum kid bukunumlaves minamis, peinan igaw maysamiy mo bukulivatus avakaein.

36 Kadiloka bukuvvaluts waseg miwotet aveiyag Yowbad sivinan, kuvvaluts ee... mo bukuba̱nes youd towen nilivnek.

37 Anilivan mamagina:

“Igaw tut kadiyakus, gamag towen nimimeim mo bisap. Nag biyouviy.
38 Kavel gungamag towen tadidumwal, bo beimov peinan isimounid.
Kukin gog bikakiws won, nag bikalin nuwag waseg gamag towen; apiyev.”
39 Tage ya̱kids nag ma̱wana tasiyas ikakiws wous, mo biyagages beikous. Ya̱kids kweitan. Ya̱kids tasimounids ya̱kids, va̱gan kululuwads bises bwein.

Copyright information for `MYW