John 1

Livan imlavag gamag

Wanamug gamag yagan Livan nises. Gamag towen yagan Livan waseg Yowbad nises. Gamag towen yagan Livan son Yowbad katanok-wan.

Gamag towen yagan Livan son Yowbad wanamug nisesus.

Gamag towen yagan Livan youda babaw ibubun. Peinan Livan towen waseg, mo Yowbad nibun youd meivek-wan.

Mtowen taymovein youda babaw; mwamovan towen magina gamag ya̱kids dakamnats. Kamnat towen imteil ven dadub waseg. Dadub nag iyakous kamnat towen. Igawa nises.

Yowbad nikayeb gamag teitan, tabibapta̱ysein gamags, yagan Yon. Yon neim; nawotet bikamtilakeids mo bitakines gamag towen ansinap kamnat, va̱gan kid babaw gamag mo bitasimounids waseg.

Yon nag kamnat tatonen; misinaka ikamtilakeids bitakines mtowen kamnat tatonen. Mtowen kamnat mounid, immiteil wasigeis gamag tatanok tatanok. E, mtowen bo neim ven watinow.

10 Im watinow, ven towen nibubun; tage ven watinow nag ikakins mtowen. 11 Inekes inagamag, tage bo ipiyaves.

12 Mwasanin gog bo itams waseg mtowen mo ita̱mes tasiyas, va̱gan bimlavags Yowbad nitun tasiyas, peinan isimounids mtowen Mesay waseg.

13 Nag ikopwes tasiyas, gamag buyvis waseg; nag. Nag ikopwes tasiyas peinan gamag sivines. Nag ikopwes tasiyas gamag sikaleiwag waseg; nag. Yowbad nakaleiwag waseg.

14 Livan towen im watinow, imlavag gimgilitoun, nisik davanuys. Nakakin mtowen singay takamnat, mamagina Taman Natun tatonen, singaya isiwa̱youb, ansinap mounid waseg.

15 Yon nikatimlakem, niwkuwak, ilana, “Mtowen liva̱nen nalivan:

‘Igaw watibweloug teitan beim, bimug waseg yey.
Yey ba̱bus, peinan tutan gunakabsilamaw waseg, mtowen igawa nises.’
16 “Mtowen guyaw avakaein; singaya ivvagein issekeids; nasiwa̱youb ikatitimweis bo ivakaein.

17 “Moses bo isekeids nakaleiwag; tage Yeisuw Kelis isiwyoubuds ansinap mounid waseg.

18 “Ta-kweitan tut gamag ikin Yowbad, nag. Tage Yowbad nipwa̱kit Natun tatonen; mtowen nikatimlakeids Taman, mo takines.”

Yon tabapta̱ysein gamags anilivan tonen

(Matiw 3:1-12; Mak 1:1-8; Luk 3:1-17)

19 Wankuyeim gamag mwasanin inekes Yon ikatugans waseg, mo ikatimop asilivan. Peinan min-Yudiy tammwayas tasiyas misikes Yelusalem ikayabes tanuwgwes lun, sisiyas mwasanin Livay delen nimtakavates Yowbad nabunatum. Ikayabes tasiyas, inekes Yon, ikatugans waseg, ilansa, “Kal ya̱koum?”

20 Yon anilivan kamnat isek, ilana, “Yey nag Takatuneib Kelis, nag.”

21 Mo ikatiga̱nes, ilansa, “Kal yak? Ilaytiy adok?”

Ilana, “Nag.”

Ilansa, “Adok ya̱koum palopit towen nakakayyamat?”

Ilana, “Nag.”

22 Mo idibakes, ilansa, “Kal yak? Liva̱neim aveiyag bukulivan, va̱gan bakanow bakasekes tasiyas nikayabemas nakam?”

23 Iw to Yon, ilana, “Yey tawkuwak wanawoud va̱gan bukukidumwa̱lus daGuyaws inaked, ma̱wan palopit Isaya nilivnek.”

24 Tasiyas Palisiy misikes Yelusalem, nikayabes gamag tasiyas nimeis ikatugans waseg Yon.

25 E, vayuwein tasiyas mo ikatiga̱nes, ilansa, “Kukin ya̱koum nag Kelis ya̱koum, nag Ilaytiy ya̱koum, nag palopit towen ya̱koum, aveiyag wawun kubapta̱yses gamags?”

26 Yon ikatimop asilivan, ilana, “Yey abaptays yevagam waseg. Tage wanuwein yakamiy teitan nises, nag kukwakins kavel; watibweloug mtowen beim, tage nag kadilokeig bakulul wamatan va̱gan kid bakablev nasandol, peinan mtowen singay iguyaw.”

28 Ilivan ma̱wan Betaniy waseg, ven towen palata-dadan Yoldan. Ven towen waseg Yon nibapta̱yses gamags.

Kukines La̱miy Yowbad silma̱nin

29 Neiyam-nen Yon ikin Yeisuw im, ilana, “Kukines Yowbad a̱len la̱miy mtowen lun bulukwan, beimat silma̱nids ya̱kids, va̱gan biwidids adsinaps kalbaleb waseg.

30 “Mtowen liva̱nen kweiboug nalivan, ‘Watibweloug teitan beim, mtowen bimug. Yey ba̱bus, peinan tutan gunakabsilamaw, towen igawa nises.’

31 “E, yey nag bakakin kavel towen, tage nam abapta̱yseimiy min-Yisleil yakamiy yevagam waseg, va̱gan bukukwakins guyaw towen.”

32 Wankuyeim liva̱nen Yeisuw Yon mo ilivan; ilana, “Akin Kululuwan Yowbad ibus walba̱lab im, magin ma̱wana bwabun, iton Yeisuw wakunun. O yey nag bakakin towen, tage towen nikayabeig nam silma̱nin babaptays yevagam waseg, towen nidibakeig, ‘Kukin kal Kululuwag beibus biton wakunun, mtowen tabapta̱ysein gamags Kululuwag Bwanabwein waseg.’ Yey bo akin, to adibakeimiy mtowen Yowbad Natun tatonen.”

Yeisuw idawes navamul mwasanin va̱gan bikabwa̱kuns waseg

35 Neiyam-nen Yon mo itamanaws sen inavamul asteiy, itowas. 36 Yon ikin Yeisuw ininoun, ilana, “Kukines Yowbad a̱len.”

37 Navamul asteiy iliganes, mo ikabwa̱kuns Yeisuw waseg.

38 Yeisuw itouvin, ikines tasiyas ikabwa̱kuns waseg, mo ilana, “Aveiyag sivinamiy?” Tasiyas gog, ilansa “O matovek, avanuy mukusik?” (Aga-Muyuw “matovek”, ages gog tasiyas “Labay”.)

39 Ilana, “Kumeis taneis mo bukukines.” Siney mo ineis, ikines nakabmasis, ikaypuls sisiy, asibabaw imasis ven towen, peinan bo ikwayav.

40 Yam towen asteiy tasiyas niliganes Yon anilivan, ikabwa̱kuns Yeisuw waseg. Teitan yagan Andiluw inuw tuwan yagan Saymon Pita nises.

41 Nuwanaw in inineiv tuwan; iban mo ilana, “Saymon, bo kaban towen Mesay.” (Takativini gog yagan “Mesay” bein aga-Gilis “Kelis”.)

42 Andiluw mo itok tuwan inekes Yeisuw. Yeisuw ikabunik, mo ilana, “Ya̱koum Saymon, Yon natun ya̱koum; badokeim Pita.” (Takativini gog bein aga-Muyuw, “Dakul”.)

Idawes Pilip son Nataniyel

43 Neiyam-nen Yeisuw sivinan bein Galiliy. In Galiliy mo iban Pilip, idibek, ilana, “Kwabkunig yey.”

44 Andiluw son Pita siven Beteseid. To Pilip naven katanok-wan Beteseid.

45 Pilip inek Nataniyel ilana, “Bo kaban Mesay; Moses nakaleiwag waseg nilel ilivnek mtowen beim bikatinabweids, o tasiyas palopits nileles ilivnakes liva̱nen towen waseg; mtowen gum-Nasalet, yagan Yeisuw, taman yagan Yosep.”

46 Nataniyel ilana, “Adok na-ikadilok youd bwanabwein beim ven to Nasalet waseg. Adok nag.”

Pilip ilana, “Kum, kukin.”

47 Ineis; Yeisuw mo ikin Nataniyel imimeim, ilana, “Kukines taw towen ansinap bwein, nag bikatidev son, peinan gum-Yisleil mounid.”

48 Nataniyel iligen anilivan, mo ilana, “Ama̱wan nukukwakin yey?” Yeisuw ikatimop anilivan, ilana, “Igaw Pilip bidaweim bukum, bo akineim mukusik yaveinun wangwanan.”

49 Nataniyel ilana, “O guntovek, mounid ya̱koum Yowbad Natun ya̱koum; min-Yisleil ya̱kids imaking ya̱koum.”

50 Yeisuw ikatimop anilivan, ilana, “Tayyaweid yak! Peinan adibakeim, alana, ‘Bo akineim yaveinun wangwanan’ mo kusimounid. Sinap towen kakit; igaw tawtoun bukukin. Mounid adibakeim igaw bukukin liba̱lab bikaliyow, Yowbad nataka̱yobs mo bimnamwens o bibweibus Mesay Gimgilitoun yey waseg.”

Copyright information for `MYW