John 16

“Livan towen bo adibakeimiy va̱gan awoum bukupiyaveigs; igaw tasiyas bibwabwes mitapwa̱loul, sinagog waseg; o igaw kweitan tut wanakoug gamag mwasanin beiweimiy bukumta̱mats, o igaw biyagageimiy mo bidokes Yowbad bikalin nuwan tasiyas.

“Siwotet towen biwteles, peinan nag bikakins Tamag, o nag bikakins yey. Bo adibakeimiy sinap towen; igaw youd towen bikamat mo bukunuwes agulivan nadibakeimiy.

Yowbad Kululuwan nawotet tonen

“Wanmugwana nag adibakeimiy sinap towen, peinan igaw sigwey yakamiy nitasesus.
Tut gog towen bo banek Towen nikayabeig nam, tage nag kal yakamiy ikatiga̱neig ilana, ‘Ama-bukun?’ Peinan nadibakeimiy sinap towen, mo igeg amnamiy.

“Mounid gog adibakeimiy, bweina balisaweimiy. Kukin nag balisaweimiy, nag bakayeb Teitan bilabeimiy; tage bo ban, mogo Towen beiw, mo bikatimlakeimiy ven towen gimgilis babaw yakamiy, va̱gan kid bukukwakins sinap kalbaleb, sinap bwein, o sinap kalbaleb mapun.

“Mtowen bikatiboug nuwes kalisiy nag bisimounids waseg yey, mo bikakins asisinap kalbaleb.

10 “Bikatimlakeimiy agusinap bwein peinan bo ba̱mwen banek Tamag, o igaw nag bukukineigs.

11 “E, bikatimlakeimiy sinap kalbaleb mapun, peinan Tamag bo imop ansinap kalbaleb towen tanuwagan ven watinow.

12 “Sinap babaw nisesus, igaw mo badibakeimiy, nagein gog ninoumiy igaw moumouvit. 13 Igaw beim Yowbad Kululuwan Mounid, mo bimgwayeimiy sinap babaw mounid waseg. Nanon tatonen nag bilivan, nag. Aveiyag biligen, mo bilivan ma̱wan; o bilivnek sinap wanakougwaw silma̱nin.

14 “Mtowen bikow agusinap mo bikatimlakeimiy, va̱gan beivag yakawanag tatoneig. 15 Tamag navavag mamagina yey gunavavag, to nalivan, alana, ‘Mtowen bikow agusinap mo bikatimlakeimiy.’

Moumouvit beikous mo bukumwa̱saws

16 “Igaw kakit mo balisaweimiy; tut kakit wankuyeim mo bukukineigs vayuwein.”

17 Navamul mwasanin sisiyas mo illivans, ilansa, “Aveiyag anilivan towen, ‘Igaw kakit mo balisaweimiy,’ o ‘Tut kakit wankuyeim mo bukukineigs vayuwein,’ o ‘Bo banek Tamag.’” 18 Ilansa, “Aveiyag wawun anilivan, ilana, ‘Igaw kakit’; tage nag takakins silawun.”

19 Yeisuw gog ikakin aw-youd sivines bikatugwans waseg, to ilana, “Adok kuneves silawun agulivan towen, ‘Igaw kakit mo balisaweimiy’ o ‘Tut kakit wankuyeim mo bukukineigs vayuwein.’ 20 Mounid adibakeimiy, bigeg ninoumiy, bukuva̱lams; tage gamag babaw bo bimwa̱saws. Mimouvit igaw mo bukwatilawos mwa̱saw. 21 Mamagina vin, tutan bitup, namouvit ivag; tage bitapouy naman, mo beikous namouvit, mo bimwa̱saw, peinan kweivaw gamag bo ikamat.

22 “Yakamiy ma̱wan, tut towen mimouvit nises; igaw gog mo bawekeimiy, mo bukumwa̱saws bukusigagas. Ta-kal biyageg mimwa̱saw towen; nag.

23 “Igaw yam towen waseg, nag bukunitougs waseg yey. Mounid adibakeimiy, igaw bukuntougis Tamag, yagag yey waseg, Tamag mo bisekeimiy. 24 Tut kweiboug nag kweitan youd kuntougis Tamag, yagag yey waseg; nag. Kadiloka bukunitougs va̱gan bukukwawes, mo bivakaein mimwa̱saw yakamiy.

Bo atawtoun ven watinow nakaleiwag waseg

25 “Gunakabebay waseg bo adibakeimiy. Igaw kweitan tut beim, mo beikous kabebay; kamnat gog mo basekeimiy liva̱nen Tamag. 26 Tut towen bukuntougis Tamag yagag yey waseg. Nag balivan, balana, ‘Banitoug Tamag waseg, pinamiy yakamiy’; nag. Tamag tonena nisiwyoubumiy, peinan nukusiwyoubugs yey, o nukusimounids ma̱noy nam Yowbad waseg.

28 “Ma̱noy nam Tamag waseg, nam ven watinow; igaw mo balisow ven towen watinow, ba̱yum gog banek Tamag.”

29 Navamul mo ilansa, “Tut gog towen amlivan kamnat. Mukwabebay bo ikous. Kakakin-wan ya̱koum kukwakin youd babaw; nag kadilok teitan bikatiga̱neim; mapuna kasimounid mukunoy Yowbad waseg nukum.”

31 Iwa̱ge Yeisuw, ilana, “Tabta mounid bukukwakins, ne? 32 Igaw kweitan tut beim, adok tut towen bo isilamaw, bikatigayeimiy bukuneis wamiven tatineimiy, bukulisaweigs, agumwa̱net yey bases; tage amateiy soug Tamag bakases.

33 “Sinap towen bo asekeimiy va̱gan bukusimounids waseg yey mo beitaw nuwamiy. Ven watinow mimouvit bukulivatus, tage awoum bigeg ninoumiy, peinan bo atawtoun ven watinow sinapun waseg.”

Copyright information for `MYW