John 19

Paylat mo ikaliwages natakannaviys, vatul waseg iwaways wa̱won Yeisuw. Iwaweiys Yeisuw ikous, tasiyas takannaviy mo isiwa̱kus anapay vatul kulikoul waseg, mamagina doudiw, isenas wakunun, ivaskomis kweim bwabwel waseg, ikululs wamatan, ilansa, “Kalin nuwem min-Yudiy siking ya̱koum”; isiba̱wes-wan; nimes waseg iwaweiys.

Vayuwein Paylat mo in watoulan, idibakes min-Yudiy, ilana, “Kukines gamag towen namey wasigeis yakamiy; kadiloka kukwakins nag aban ansinap kalbaleb waseg.”

Yeisuw mo isap, anapay kulikoul, anakweim bwabwel, Paylat mo idibakes, ilana, “Kukines gimgilitoun towen.”

Tanuwgwes lun situwa̱vek sisiyas siplismans ikines Yeisuw, mo iwaks, ilansa, “Kwatimates waklos!”

Paylat ilana, “Yakamiy kutokes, kunawes, kuweiys; yey nag; nag aban ansinap kalbaleb.”

Tasiyas Yudiy gimgilis mo ilansa, “Peinan taw towen anilivan, ilana, ‘Yey Yowbad Natun yey,’ kadiloka bikanig. Makaleiwag ma̱wan.”

Paylat iligen asilivan towen, singay ivag anpwa̱yat.

Iyum in wanbunatum wanuwan, idibek Yeisuw, ilana, “Avanuy mukunoy nukum?” Tage nag ikatimop anilivan, isesuna ikika̱pay.

10 Paylat mo ilivan, ilana, “Bo kukwa̱pway ne? Tabta kukwakin yey takaleiwag. Bakaleiwag balikum, o nag, bukukwanig waklos?”

11 Iw to Yeisuw, ilana, “Misinaka Yowbad beitam aveiyag bukunuwakeig. Kukin gog nag, bo nag. Bukuweig, sinap towen kalbaleb, tage mtowen nimayeig waseg yak, ansinap towen singay kalbaleb.”

12 Paylat iligen Yeisuw anilivan ikous, mo iyokon va̱gan bilik; tage min-Yudiy iwkuwaks, ilansa, “Kukin bukulik taw towen, Sisal mo bigeg nanon. Peinan taw towen anilivan, ilana, ‘Yey king yey,’ mamagina isilponay Sisal nakaleiwag waseg.”

13 Paylat iligen asilivan, isin kabkaleiwag kabanen waseg, waven towen ag-Ibliw waseg idokes Gabat, peinan dakul babaw nisesus wavtakon ven, mo imey Yeisuw va̱gan bikaleiwag waseg. 14 Bo iya̱nay yam towen bikatunags silma̱nin Kaltuwon sigeilin nubweig. Paylat mo idibakes min-Yudiy, ilana, “Kukines miking.”

15 Tasiyas gog iwkuwaks, ilansa, “Kunawes taw towen, kwatimates waklos.”

Iw to Paylat, ilana, “Tabta ba̱weiy miking, ne?”

Iweis tanuwgwes lun, ilansa, “Making anmwa̱net Sisal.”

16 Wankuyeim Paylat mo itam Yeisuw va̱gan binawes beiweiys waklos.

Ikatikavates Yeisuw waklos

(Matiw 27:32-44; Mak 15:21-32; Luk 23:26-43)

17 Itokes Yeisuw, isekes anklos va̱gan bikow binow ven to yagan Busabwes (Ag-Ibliw waseg idokes Golgot.) 18 Ven towen waseg mo ikatikavates Yeisuw, ikayagweg waklos. Asteiy ikatikavates ikayagwegs wasiklos, teitan palatan, teitan palatan, Yeisuw gog wanuwein.

19 Paylat ilel liva̱nen, isen wakunuwatan klos, mamagina, “Gum-Nasalet Yeisuw, min-Yudiy siking.” Nileles gog ag-Ibliw waseg, aga-Lom waseg, o aga-Gilis waseg; min-Yudiy singay babaw ivinis, peinan ven towen kadilakus Yelusalem. 21 Min-Yudiy babaw mo ivnivins lelel towen: “Min-Yudiy siking,” mapuna tasiyas tanuwgwes lun situwa̱vek mo idibakes Paylat, ilansa, “Awoum kulel: Min-Yudiy siking. Tage kadiloka kulel: Taw towen anilivan, ilana, ‘Min-Yudiy siking yey.’” 22 Paylat ilana, “Nag; to nalel bo bisesuna, bisigeg.”

23 Tasiyas takannaviy ikatikavates Yeisuw ikous, mo ikawes anakweim, ilagus kalguvas; katanok katanok mo ikawes asikweim. Anakweim mwaynavakaein mo iyousis, ilansa, “Awoum bitabwabwes maynawen kweim, peinan aniwniwoun katanok-wan; ta-ivag ankatuvas. Bitalaves youd kweitan, makav bikalouw bein wapwepway, takines kal nakabivatus biton, towen mo bikow anakweim. Sona bikow. Awoum bitabob.”

E, iva̱ges ma̱wan va̱gan bikamat lelel towen Bukitab nilivnek mamagina.

“Ilagus agukweim, ikokews asikweim;
makava mo ilaves kweitan youd,
idokes kal bikow agukweim tonen.”
Mapuna takannaviys iva̱ges ma̱wan.

25 Yeisuw anklos walasin itowas inan Meliy, son inan kweitan, sisiy Kilopas nakwav yagan Meliy, sisiy vinen-Magdal yagan Meliy. 26 Yeisuw ikines inan son navamul teitan nitatos, mtowen singay isiwa̱youb waseg, mo idibek inan, ilana, “Inag kukin natum towen.” Mo idibek navamul, ilana, “Kukin inam.” Navamul iligen, tut towen waseg mo itok ineis wanven, imlavag inan tonen.

Yeisuw ikanig

(Matiw 27:45-56; Mak 15:33-41; Luk 23:44-49)

28 Wankuyeim Yeisuw mo ikakin nawotet bo ikous, ilana, “Agudak! Ta-ma̱wan!” (Peinan Bukitab kweiboug nilivnek mamagin.) 29 Kwavitan kwa̱vig wayn yayan nises; yotout ikawes, isenas wakwa̱vig, ibasis kaligweg yagan yisop wamatan, iyaseles, isekes Yeisuw, imoum.

30 Wankuyeim, ilivan, ilana, “Bo ikous!” Itagud kayon, mo ikanig.

Ibes viligan Yeisuw

31 Yam towen iyouluks, ikatunags peinan nubweig Sa̱dad towen mamagina Sa̱bat, sagal Kaltuwon waseg; singay ikayuses mamagina siSa̱bat avakaein; mapuna min-Yudiy initougs waseg Paylat va̱gan takannaviys bikatupwes kikeis tasiyas ikayagwegs wasiklos, mo beimats, bikawes bilavewas. Awoum takanigs bikayagwegs ven walasin nubweig to Sa̱bat waseg.

32 Mapuna takannaviy inekes teitan ikayagweg waklos, ikatupwes kaken, ikanig; ikous, mo inekes teitan ikatupwes kaken, ikanig; ikous mo inekes Yeisuw, ikines nanawan bo nikanig, to na-ikatupwes kaken, nag. 34 Misinaka takannaviy teitan ikow nakayal, ibes viligan, ila̱tay buyav son yevagam.

35 Yey atamanaw towen akakin, agulivan mounid peinan bo akin wamatag; agulivan towen asekeimiy va̱gan kid bukusimounids yakamiy. 36 Kweiboug Bukitab nilivnek mamagina:

“Awoum bikatup tatuwan tonen.”
Kweitan livan nises:

“Bo bikines towen nibasis.”
E, takannaviy ivkakes ma̱wan va̱gan bikamat Bukitab liva̱nen Yeisuw silma̱nin.

Itakus Yeisuw

(Matiw 27:57-61; Mak 15:42-47; Luk 23:50-56)

38 Gum-Alimatiy teitan yagan Yosep, kweiboug isimounid Yeisuw waseg, tage nag ika̱mat, peinan anpwa̱yat min-Yudiy situwa̱veks wasigeis. Towen Yosep nag sivinan Yeisuw won tasiyas takannaviys bilaves mav, to initoug waseg Paylat, mo itam Yeisuw won, isek; Yosep ikow inow.

39 Nikodimos mo inek Yosep, kweiboug nikaypuls son Yeisuw, boug waseg. Nikodimos imey kaybuy singay avakaein va̱gan won Yeisuw nag beipwas, mouvitan magina sinwavas kilos; mul son alow nisesus wanuwan kaybuy towen. Kaybuy son itabwes won Yeisuw, iyawanis kweim pwapwa̱kaw waseg, ma̱wan asigulagul tasiyas min-Yudiy.

41 Walasin ven towen neiweiys Yeisuw, bag kweitan nises, o bag wanuwan alawag kweivaw; kweiboug nag teitan takanig isenas, nag.

42 Peinan kadiyakus siSa̱bat avakaein, o peinan alawag towen kadiyakus nises, to inawes Yeisuw, itakus.

Copyright information for `MYW