John 4

Yeisuw ilivans son nen-Samaliy

Tasiyas Palisiy iliganes liva̱nen Yeisuw peinan ibapta̱yses gamag babaw mo imlavags navamul; o iliganes liva̱nen Yon ibapta̱yses gamag nag ibabaw; tage Yeisuw nag ibaptays, navamul gog ibapta̱yses gamags. Yeisuw ikakin ninous tasiyas Palisiy, mapuna ilisow Yoldan, inoun, vayuwein mo in Galiliy.

Ked towen waseg kadiloka bikanapel Samaliy mo bein Galiliy.

Isap gog min-Samaliy wasiven yagan Saykal, walasin pwepway towen Yekob nisek natun Yosep pwa̱mug-o.

Yevagam towen kweiboug Yekob ikaviyeil. Yeisuw ininoun wa̱ked ee... mo isap, bo isoumat; isin wadadan yevagam.

Navamul ineis waven bigimwals kan. Bo ya̱nay. Nen-Samaliy mo im beikil soup. Yeisuw idibek, ilana, “Soup kumey, ba̱moum.”

Vin mana̱wen mo ilana, “Adok ya̱koum gum-Yudiy ya̱koum. Aveiyag wawun kunitoug soup waseg vinen-Samaliy yey?” (Peinan min-Yudiy isisina̱les min-Samaliy.) 10 Yeisuw ikatimop anilivan, ilana, “Magat bukukwakin Yowbad nasiwa̱youb, o magat bukukwakin kavel yey anitoug yevagam waseg yak, adok mo bukunitoug waseg yey va̱gan kid basekeim soup mwamov silma̱nin.”

11 Vin idibek, ilana, “Ta-kweitan mukwayagweg nises. Ta-ma̱wan bukukil amsoup to kadiveiyov. Avanuy bukukil mo bukusekeig soup mwamov silma̱nin? Datoveks Yekob kweiboug guyaw avakaein, nikaviyeil yevagam towen, imwamoum, alen imwamoums, nitun tibun imwamoums ee... igawa kamwamoum yakamey. Tabta ya̱koum bukumgwey tamwey towen Yekob?”

13 Yeisuw ilana, “Kalisiy beimoums soup towen, igaw vayuwein mo beivag asidak. Tage kukin kal beimoum soup towen yey basek, nag vayuwein beivag anadak; nag. Soup towen basek bimlavag mamagina yuwyeiwl bibwabwab wanuwan, silma̱nin mwamovan nag beikous.”

15 Vin mana̱wen ilana, “O guyaw, soup towen kumey ba̱moum, va̱gan beikous agudak; awoum ge bamimeim bakilikil agusoup.”

16 Yeisuw ilana, “Kun kudibek mumwan, kumeis amiteiy.”

17 Vin mana̱wen ikatimop anilivan, ilana, “Ta-ivag gunamwan.”

Yeisuw ilana, “Mounid amlivan. ‘Ta-ivag gunamwan.’ Adok mumwa̱nas asteinim; towen gog soum kusesus nag mumwan tonen, to amlivan mounid-wan.”

19 Vin mana̱wen ilana, “O guyaw, akakin ya̱koum palopit ya̱koum. Tammwayas bo ikululs wamatan Yowbad koy towen waseg; min-Yudiy yakamiy kulansa, ‘Kadilokeids bitakululs Yelusalem waseg.’”

21 Yeisuw ilana, “Kadiloka kusimounid agulivan towen. Igaw nag bitakulul wamatan Yowbad koy towen waseg, o Yelusalem waseg, peinan kweivaw kaleiwag bo bisap.

22 “Yakamiy nag kukwakins aveiyag towen kukululs wamatan. Yakamey kakakin, peinan wawun katuneib nises wasigeis min-Yudiy yakamey.

23 “Igaw kweivaw sinap bisilamaw. Mounid bo isilamaw tut towen waseg, peinan tasiyas ikululs mounid wamatan Yowbad, kululuwes waseg bikululs, sitapwa̱loul mounid. Peinan Tamads sivinan sinap towen, waseg gamag bitapwa̱louls bwein.

24 “Yowbad kululuwan mav. Tasiyas gog sivines bikululs wamatan Yowbad, kadiloka kululuwes waseg bikululs, mounid-wan; awoum bikululs mav.”

25 Vin mana̱wen mo idibek, ilana, “Akakin igaw Mesay beim, mtowen gamag mwasanin idokes Kelis. Igaw beim, mo bikatimlakeids youda babaw.”

26 Yeisuw ilana, “Mesay yey, mtowen nukulivans soum.”

27 Ilivan ma̱wan ikous, navamul mo iyums imeis; bo isunasun ninous peinan Yeisuw ilivans son kuda̱vin; (peinan min-Yudiy idokes nag kadilok taw bilivans son vin watapwan ven); tage nag teitan ilana, “Aveiyag sivinam?” o nag teitan ilana, “Aveiyag wawun kullivans soum mana̱wen vin?” nag. Ikika̱pays-wan.

28 Vin gog mana̱wen bo ilisow nakunasoup, inoun in waven, idibakes gamags; ilana, “Kumeis taneis kukines gamag teitan nidibakeig agusinap babaw kweiboug navvag. Tabta mtowen Kelis?”

30 Iliganes, mo ilisawes ven towen, inounas kid binekes Yeisuw.

31 Tage navamul bo nisimkakins waseg Yeisuw va̱gan kid beikam kan to nimeyes.

32 Togo Yeisuw ilana, “Yey kag nises. Yakamiy nag kukwakins.”

33 Tasiyas ilansa, “Tabta kal-tan kan isek ikam?”

34 Yeisuw ilana, “Yey kag nises. Bo bakanow Yowbad aygan, aveiyag sivinan, mo bayakous nawotet. To silma̱nin nikayabeig nam. Agusinap towen kag-wan.

35 “Adok yakamiy kulansa, ‘Kweivas tibukon mo bitata̱yoys kan.’ Tage kukin bikiplal mitamiy mo bukukines kan bo iyebwel, peinan bo imatuw. Tatayaweins kan ikawes maysan wotet, o ita̱yoys anagin towen, gamag mwamoves nag beikous.

Mapuna mo bimwa̱saws tasiyas tasapweins kan sisiyas tasiyas tatayaweins kan.

37 “Livan towen mounid-wan, mamagina, ‘Tasapwein kan kweitan; tatayawein kan kweitan.’

38 “Yey akayabeimiy va̱gan bukuta̱yoys bag towen. Mwasanin gamag niwteles bag, yakamiy nag; misinaka kuta̱yoys-wan; tage bo niwteles nanawan.”

39 Ven towen Samaliy gimgilis babaw mo isimounids Yeisuw waseg, peinan vin anilivan, “Nidibakeig agusinap babaw kweiboug navvag.”

40 Min-Samaliy tasiyas mo inekes Yeisuw, ilansa, “Kum kuyeiwas wamaven, amabwabwal ya̱koum.” Itam. Siney tasiyas nisesus akweiy yam, iliganes anilivan. Iliganes, singay babaw mo isimounids waseg; idibakes vin mana̱wen, ilansa, “Kaligen amlivan, kakit kasimounid; tage tut towen yakameyan-wan nakaligen anilivan, mo kakakin mounid mtowen takatinabweids ven watinow gimgilis ya̱kids.”

Gabman natun Yeisuw ivag mo ibwein

(Matiw 8:5-13; Luk 7:1-10)

43 Yam akweiy ikous mo ilisawes; inoun in Galiliy.

44 Yeisuw anilivan tonen mamagina, “Wanven tatonen nagamag nag biliganes palopit anilivan.”

45 Tutan isap Galiliy mo ibwein ninous min-Galiliy, peinan bo ineis Yelusalem, sagal silma̱nin, bo ikines Yeisuw nawotet sagal towen waseg.

46 Vayuwein mo in Ken, wawnuwan Galiliy, kweiboug nivag yevagam to mo imlavag wayn.

Gabman nises, natun ikatoun ven Kapaneyum waseg; natun kuda̱taw.

47 Gabman towen iligen Yeisuw bo ilisow Yudiy, meinoy neim Galiliy; mapuna inek Yeisuw, ilana, “Kum, biten, natug kuda̱taw kukin, bo ikatoun avakaein. Adok kakita bikanig. Kuvag beibwein.”

48 Yeisuw ilana, “Magat bukukines wotet tawtoun, mamagina naman mulin Yowbad, mo bukusimounids. Kukin gog nag, bo nag.”

49 Iw to Gabman, ilana, “Kum, kukin natug. Mata ge bikanig!”

50 Yeisuw ilana, “Kuyum kun. Natum bo ibwein.” Gabman mo isimounid peinan Yeisuw anilivan; iyum in silma̱nin naven.

51 Iwloubus ininoun ee... ilivatus natouwat mwasanin; bo nikatulags nimimeis, ilansa, “Natum bo ibwein.”

52 Gabman ikatiga̱nes, ilana, “Asina̱vin mo ibwein?”

Ilansa, “Nov, ya̱nay kansow, mo iloulun won. Ankatoun bo ikous.”

53 Taman mo inuway nov ya̱nay anatut kansow, Yeisuw nilivan, “Kuyum kun. Natun bo ibwein”; mo isimounids sen nagamag asibabaw-wan.

54 Tut towen Yeisuw nilisow Yudiy, meinoy neim Galiliy, naman mulin kwayuwein ivag, peinan Gabman natun towen ivag mo ibwein.

Copyright information for `MYW