Luke 13

Kadiloka kulaves amisinap kalbaleb

Misiya̱mun towen gamag mwasanin idibakes Yeisuw, ilansa, “Min-Galiliy mwasanin iwaweiys man iluns waseg Yowbad, mo Paylat iweiys gamag tasiyas, imta̱mats sisiyas mansiyas man neiweiys.”

Iw to Yeisuw ilana, “Awoum kudokes min-Galiliy tasiyas asisinap singay kalbaleb mapuna imta̱mats. Nag. Min-Galiliy babaw asisinap kalbaleb; o yakamiy-vak, kukin nag bukulaves amisinap kalbaleb mo bukukwanigs ma̱wana tasiyas.

“Awoum kudokes min-Yelusalem tasiyas sinwatan teinim teitoun asisinap kalbaleb, mo bunatum bunaveiyov yagan Siloum ikalivatouw iwaweiys. Nag. Min-Yelusalem babaw asisinap kalbaleb; o yakamiy-vak, kukin nag bukulaves amisinap kalbaleb, mo bukukwanigs ma̱wana tasiyas.”

Yaveinun nag ivag anagin

Yeisuw mo isekes nakabebay mamagina: “Taw teitan, wanabag nisop yaveinun nitet. Sivinan wuwan bikow; iwekey, nag.

“Idibakes tasiyas tawtelein bag, ilana, ‘Kweitoun bweilim aninek yaveinun makaywen, anineiv wuwan; nag. Kuteiy, awoum biteta mav, biyamkwen pwepway.’

“Ikatimop aygan, ilana, ‘Bweina ga itet bweilim towen. Bakaviyeil leis wadadan palavas, basen bulumakaw pwes. Kukin bweilim wamatads beiwuw wuwan, bo bwein. Kukin nag, mo bateiy.’”

Na̱tan vin ivag ibwein Sa̱bat waseg

10 Sa̱bat waseg, Yeisuw igeiguy wanuwan sinagog.

11 Na̱tan vin nises, sinwatan kweinim kweitoun bweilim ankatoun waseg tapwan idadog. Ta-ma̱wan bitamanaw bidamoms tapwan.

12 Yeisuw ikin, idibek, ilana, “Vin yak, bo kubwein, amkatoun waseg.”

13 Isen naman wa̱won, nuwanaw mo idamoms tapwan; mapuna ikaves Yowbad.

14 Tage tanuwagan sinagog ikin Yeisuw nivag takatoun ibwein Sa̱bat waseg, ikapasal nuwan, idibakes gamag tasiyas, ilana, “Yam kweinim katanok waseg bitawotets. Awoum kumeis Sa̱bat va̱gan amikatoun biva̱geimiy bukubweins.”

15 Yeisuw ikatimop aygan, ilana, “Tayyaweid yakamiy. Sa̱bat waseg kulikus aleimiy bulumakaw o donkiy wasibunatum nisesus mo kutokes kunawes wayvagam beimoums.

16 “Tage mana̱wen vin, Ebelam tabun na̱tan, Seitan niyawen bweilim babaw, bweina balik Sa̱bat waseg. Peinan Seitan ankatoun nivag sinwatan kweinim kweitoun bweilim.”

17 Anilivan ma̱wan, mo ivag asimwasin tasiyas nivtokays livan, tage gamag babaw imwa̱saws peinan ikines nawotet singay tawtoun.

Yowbad nakaleiwag

(Matiw 13:31-33; Mak 4:30-32)

18 Mapuna idibakes, ilana, “Yowbad nakaleiwag ama̱wan? Aw-kabebay basekeimiy va̱gan bukuliganes o bukukwakins.

19 “Adok ma̱wan tipol veitun, peinan gamag teitan ikow inow isop wanabag; isob, ivakaein, mo mansiyas man iyoyows iwlules sibunatum yayagein waseg.”

20 Vayuwein ilivan, ilana, “Ama̱wan bakabebay va̱gan bukukwakins Yowbad nakaleiwag? Adok ma̱wana yist, na̱tan vin ikow isen waseg pwalaw avakaein, tamkwa̱lan mo ilol.”

Koukwed kabkakit

(Matiw 7:13-14; 21-23)

22 Inoun, in, silma̱nin Yelusalem, ita̱vin ven babaw, ven mwasanin wunoveks, o ven mwasanin wunkekels, ikatimlakes gamags.

23 Teitan gamag ikatigan, ilana, “Tamwey, tabta Yowbad bikatinabwes gamag asteiyuye?” Iwa̱ge, ilana, “Kuyokons va̱gan bukusiws koukwed kabkakit waseg. Mounid, gamag babaw sivines beisiws, biyokons, bo nag.

25 “Igaw tanuwagan bunatum bitamanaw, bikatibog koukwed, mo bukutowas watoulan, bukugipits, kulansa, ‘Tamwey, kwaliyow koukwed pinem yakamey,’ tage mtowen bikatimop agamiy, bilana, ‘Nag akakin avanuy mukunoy nukumeis yakamiy.’

26 “Mo bukulansa, ‘Nakakamkwam nakamwamoum wamatam yak, o nukwatimlakay wamaven.’

27 “Towen gog bilivan, ‘Mounid nag akakin avanuy mukunoy nukumeis yakamiy. Kunounas, kuneis, takalbalebs yakamiy.’

28 “Mo bukuvva̱lams o bukwakilis kumtumiy, peinan bukukines Ebelam, Aysak, Yekob sisiyas tasiyas palopits, Yowbad nakabkaleiwag waseg, o yakamiy bukusiwas watoulan.

29 “Gamag babaw meinoys wanuvid, wayavat, wabomat, wa̱yals, bimeis bisinis beikams Yowbad nakabkaleiwag waseg. Tage mwasanin wankuyeim bo bimugwas, o mwasanin wanamug bo bikuyeims.”

Yeisuw beimat Yelusalem waseg

(Matiw 23:37-39)

31 Tut towen Palisiy mwasanin inekes Yeisuw, ilansa, “Kusawl, kun, Elod sivinan beiweim.”

32 Iw to Yeisuw, ilana, “Kuneis, kudibakes bulawud towen agulivan mamagin: Nagein nubweig siyas bwagaw bakayabes, takatouns bavag mo beibweins, tage bugiy bo bayakous gunawotet.

33 “Kadiloka ba̱noy gunaked nagein, nubweig, bugiy. Peinan palopit babaw yakamey bakamta̱mat Yelusalem. Tobwag ven awoum.

Min-Yelusalem bo iwaweiys palopits

34 “O Yelusalem. Min-Yelusalem yakamiy kuwaweiys tasiyas palopits, o tasiyas nissekeimiy Yowbad anilivan kuwaweiys dakul waseg, kwatimates. Tut babaw sivinag badaweimiy bukumeis bamtakavateimiy ma̱wan kolkolek imtakavates nitun; nag gog; kupiyaves aygag.

35 “Nagein mibunatum makaw, o nag bukukineigs ee... igaw anatut wanakoug bukulansa, ‘Kalin nuwads mtowen neim silma̱nin Yowbad nawotet,’ mo bukukineigs vayuwein.”

Copyright information for `MYW