Luke 20

Yeisuw nakaleiwag

(Matiw 21:23-27; Mak 11:27-33)

Yam kweitan Yeisuw ikatimlakes gamag Yowbad wanbunatum, o igeiguy livan bwanabwein, mo inekes Yeisuw tasiyas tanuwgwes lun sisiyas takatimlakeins kaleiwag, sisiyas tasiyas tammwayas.

Inekes Yeisuw, ilansa, “Aw-kaleiwag waseg kuwotet ma̱wan? o kal isekeim mukwaleiwag towen?”

Iw to Yeisuw, ilana, “Kweitan youd bakatugan wasigeis yakamiy. Kudibakeigs. Yon inakaleiwag waseg nibapta̱yses gamags, Yowbad isek nakaleiwag? o nag? gamag mwasanin isekes nakaleiwag?”

Sisiyas illivans, ilansa, “Kukin bitalivans ‘Yowbad isek,’ mo bikatimop aygads bilana, ‘Aveiyag wawun kupiyaves?’ Tage kukin bitalivans, ‘Gamag isekes’ mo gamag biwaweids, peinan idokes Yon palopit teitan.”

Mapuna ikatimapus Yeisuw anilivan, ilansa, “Yakamey nag kakakin kal isek Yon nakaleiwag.”

Iw to Yeisuw, ilana, “Yey-vak nag badibakeimiy kal nisekeig gunakaleiwag silma̱nin wotet towen.”

Tawteleins tamwey inabag.

(Matiw 21:33-46; Mak 12:1-12)

Mo isekes nakabebay towen, ilana, “Teitan tamwey isop bigulen gleip, isekes gamag mwasanin siwotet va̱gan bimtakavates, mo inoun in kweitan ven, isik tut kadiveiyov.

10 “Tutan gleip bimwanoug ikayeb natouwat bikow bag anagin, bimey, mo beikam, tage tamtakavateins bag bo kayuses anagin, iwaweiys tamwey natouwat towen ikous, mo ikayabes. Makava inoun, iyum.

11 “Wankuyeim tamwey ikayeb tayuwein natouwat, iwaweiys-vak mtowen, iyagages, ivag anmwasin seikwan. Ikous mo ikayabes. Makava iyum.

12 “Wankuyeim tamwey ikayeb tatounun, ibasis mtowen sikayal waseg, ikines bwayan kayal wa̱won, mo ilaves in watoulan ven.

13 “Tanuwagan bag nag ikakin seik ama̱wan biwkek, mo ilana, ‘O, bo bakayeb natug bwanabwein; tasiyas bigoulus, bisekes anagin bimey.’

14 “Inoun in natun, kakita binekes, tamtakavateins bag iwtusis, ilansa, ‘Natun mtowen. Tamwey bikanig mo nakiyay bikow, bag towen. Bo bitaweiys mo takawes dakiyays ya̱kids.’

15 “E, ituts, iwekes, iyousis, inawes watoulan bag ikatimates. Tanuwagan bag igaw mo beim, aveiyag binuwakes tasiyas?

16 “Adok beim biwaweiys biyakous gamag tasiyas, mo binineiv gamag mwasanin, bisekes siwotet bimtakavates inabag.” Iliganes anilivan towen; ilansa, “Awoum.”

17 Tage Yeisuw ikikines tasiyas, ilana, “Silawun agulivan towen Bukitab waseg nileles mamagina:

‘Wululay towen tawteleins bunatum
nipiyaves,
tage bo imlavag anmwamwan bunatum.’
18 “Wululay towen yey. Kukin kal bikalivatow wakunuwatan wululay towen mo bibilek won; tage wululay towen bikalouw wakunuwatan gamag mo bikanimimey.”

Sisal nata̱kis

(Matiw 22:15-22; Mak 12:13-17)

19 Tut towen tasiyas takatimlakeins kaleiwag sisiyas tanuwgwes lun sivines kid biyousis Yeisuw, peinan ikakins Yeisuw nakabebay silawun mamagina asisinap tatineis. Sivines kid biyousis Yeisuw. Ta-ma̱wan, peinan iwenes gamag babaw.

20 Deisa ikaymates Yeisuw, o ikayabes sitouwat mwasanin, askakin mamagina tasimounids tage tayyaweids; bikatiliganes Yeisuw anilivan va̱gan biliganes silawun ya̱tal, waseg biyateles Yeisuw wamatan takaleiwag avakaein, ven Yudiy waseg. Takaleiwag mo biligen ya̱tal, bikaluweg.

21 Tasiyas inekes Yeisuw ilansa, “Takatimlakay yak, kakakin amlivan bwein o mukwatimlakay bwein, o nag kuwenes gamag mwasanin o mukwatimlakay katanok-wan gamag babaw wasigeis. Peinan Yowbad inaked kwatimlakem mounid.

22 “E, tab kadilok bitapa̱yin Sisal nata̱kis? o nag?”

23 Tage Yeisuw ikakin asisinap, idibakes ilana, “Money dakul kusekeig kweitan, bakin.” Isekes mo ilana, “Kal kululuwan nileles? o kal yagan nileles waseg?”

Ilansa, “Sisal.”

25 Iwa̱ge Yeisuw, ilana, “Kadiloka Sisal navavag bitasekes Sisal; o Yowbad navavag bitasekes Yowbad.”

26 Peinan tasiyas iyokons; bo nag. Ta-ma̱wan biba̱nes aveiyag kalbaleb Yeisuw bilivan wamtes gamag babaw va̱gan biyateles. Iliganes gog Yeisuw nakatumap, bo isom ninous, isesusa ikka̱pays.

Takanigs beikits vayuwein

(Matiw 22:23-33; Mak 12:18-27)

27 Ikous asilivan tasiyas, mo Sadusiy mwasanin mo inekes. Gamag tasiyas Sadusiy idokes gamag ya̱kids bitakanigs, nag bitakits vayuwein.

28 Tasiyas ikatiga̱nes Yeisuw, ilansa, “Takatimlakay yak. Moses nilel dakaleiwags va̱gan kukin kal taw bikanig, nakwav sam, tage natun nag, takanig bwadan o tuwan mo beivay son nakwab, mo bikop natun bimlavag takanig natun.

29 “Taw teitan siney budan teinim tatanok, ivay son nakwav, ikanig, natun nag. Isiken ivay son nakwab, mo ikanig, natun nag. Isiken ivay son nakwab, ikanig, natun nag. Ma̱wana ma̱wana ee... tasiyas teinim teiy ivays sisiy vin mana̱wen ikanka̱nigs ikous, nitus nag.

32 “Ikous, mo vin ikanig.

33 “Igaw beikits vayuwein, kal nakwav mana̱wen? Peinan sikwev asibabaw.”

34 Yeisuw ikatimop asilivan, ilana, “Ven watinow gimgilis nibokeimiy kuveivays, tage tasiyas Yowbad idok asisinap kadilok beikits vayuwein silma̱nin tut wanakoug, tasiyas gog nag iveivays o nag ibokes, nag. Ta-ma̱wan bikanigs vayuwein, peinan imlavags min-liba̱lab tasiyas. Peinan ikits vayuwein bo imlavags Yowbad nitun tasiyas.

37 “Takanka̱nigs ikits vayuwein. Moses ikatimlakeids ma̱wan. Bukitab bitavin kweiboug liva̱nen Moses iligen Yowbad aygan wanuwan kaligweg makaywen nigidaged kov, peinan Moses idok Yowbad mamagina Ebelam naYowbad, Aysak naYowbad, Yekob naYowbad. Nag takanig tasiyas. Yowbad tamwamovs gamag siYowbad; nag takanig siYowbad. Yowbad waseg babaw tamwamovs.”

39 Iweis tasiyas takatimlakeins kaleiwag ilansa, “Mounid, takatimlakay ya̱koum amlivan bwein.”

40 Asilivan babaw ikatimop bwein, mapuna iwenes vayuwein bikatiga̱nes.

Kelis Deibid tabun

(Matiw 22:41-46; Mak 12:35-37)

41 Yeisuw mo ikatiga̱nes tasiyas, ilana, “Ama̱wan gamag bidokes Kelis Deibid tabun?

42 “Deibid anilivan, nilel, nises buk yagan Sam waseg:

‘DaGuyaws idibek gunguyaw, ilana:
Kusin wagunka̱tay va̱gan bava̱ges tasiyas
astameiliw yak, mo bimlavags mamagina
mukwabtatet, bukuvnivans wakunuwtes.’
44 “E, kuninuways Deibid idok Kelis inaguyaw. Kukin Kelis meinoy neim Deibid waseg, ama̱wan bivkek bikativin bimlavag naguyaw?”

Yeisuw ikatiga̱nes, ta-ma̱wan bikatimapus anilivan.

Takatimlakeins kaleiwag asisinap kalbaleb

(Matiw 23:1-36; Mak 12:38-40; Luk 11:37-54)

45 Yeisuw mo iguyes tasiyas inavamul, o gamag babaw niliganes, ilana, “Kadiloka kupiyaves tasiyas takatimlakeins kaleiwag asisinap, sivines kid asikweim vayvayov, o sivines gamag bikakoks binounas wamtes, o tapwa̱loul waseg sivines keb wanakaew, o sivines bimliguyaws sagal waseg.

47 “Tage ikukwayes nakwabs sivavag, mo ikululs initougs aveiyov, va̱gan gamag bisimounids, bidokes asisinap bwein. Nag gog, kalbaleb. Igaw Yowbad bimop asisinap. Singay kalbaleb bilivatus.”

Copyright information for `MYW