Luke 4

Seitan iyakwen Yeisuw

(Matiw 4:1-11; Mak 1:12-13)

Yowbad Kululuwan Bwanabwein bo itawtoun waseg Yeisuw, ilisow Yoldan iyum in wanawoud. Yowbad Kululuwan imgwey Yeisuw inoun yam sinwavas, waseg Seitan iyyakwen. Yam tasiyas nag ikamkwam ee... nakabiyokous waseg mo ivag anamoun.

Yeisuw anamoun, Seitan mo idibek, ilana, “Magat Yowbad Natun yak, kadiloka kudibek dakul towen, mo bimlavag kam.”

Iw to Yeisuw, ilana, “Liva̱nen nises Bukitab waseg mamagina:

‘Makava kan nag biyamov gamag.’”
Wankuyeim Seitan mo itok inow wanakaew, ikatimlek ven babaw wadaban pwepway. Sivtanok ikin ikous; mo Seitan ilivan, ilana, “Ven tasiyas son yakawanan basekeim mukwaleiwag, peinan gunakaleiwag towen. Am-towen sivinag mo basek. Magat yak bukukulul wamatag, mo basekeim silma̱nin mukwaleiwag.”

Iw to Yeisuw, ilana, “Liva̱nen nises Bukitab waseg mamagina:

‘Kadiloka bukukulul wamatan Guyaw Yowbad.
Mtowen anmwa̱net bukwanow aygan.’”
Mo itok Yeisuw inow Yelusalem, isen Yowbad nabunatum wankunumwan, idibek, ilana, “Magat Yowbad Natun yak, kwaspepel kun watinow. Liva̱neim nises Bukitab waseg,

‘Bo bisek nataka̱yobs siwotet mo
bimtakavateims.’
11 “Kweitan livan nises mamagina:

‘Nimes waseg binupeims;
Mata ge kakeim beiweiy dakul.’”
12 Iw to Yeisuw, ilana, “Livan nises mamagina:

‘Awoum kuyakwen muGuyaw Yowbad.’”
13 Seitan iyakous ansinap babaw waseg iyakwen Yeisuw, mo ilisow, in, ikayamat kweitan tut, idok beiyum binek.

Yeisuw isilamaw nawotet

(Matiw 4:12-17; Mak 1:14-15)

14 Yowbad Kululuwan natawtoun waseg Yeisuw, mo iyum in Galiliy; bulagan in ven babaw Galiliy walasin.

15 Ven babaw sisinagog katanok katanok waseg ikkatimlakay, mapuna gamag babaw ikavasis mtowen Yeisuw.

Min-Nasalet ipiyaves

(Matiw 13:53-58; Mak 6:1-6)

16 Ikous, mo in Nasalet, ven towen nituyay-yay waseg; isiw in wasinagog, ma̱wan ankikun, peinan Sa̱bat. Mo itamanaw va̱gan bivin Bukitab.

17 Itamanaw, mo isekes buk bivin. Buk towen palopit Isaya inabuk. Ikaliyow buk towen iban mwaynatan yageivein waseg nilel mamagina:

18 “Yowbad Kululuwan waseg yey.
Bo isekeig gunawotet va̱gan bageiguy livan bwein, basekes tasiyas tasimavs.
Bo ikayabeig nam badibakes tasiyas wa̱deil mo bisaps bineis wamnat.
O tasiyas toukwaws mo bikines.
O tasiyas, abes igeg, batokes banawes
bwanabwein keb waseg.
O baliwon baka̱mat Yowbad anbweilim waseg igaw mo bilabeimiy.”
20 Ivin ikous, ikatibog buk towen, isek tanuwagan, mo isin. Tasiyas nisesus wasinagog mites meivek-wan igintoves Yeisuw.

21 Isin towen, mo idibakes, ilana, “Kweiboug Bukitab nilivnek youd towen, tage nagein bo ikamat; yakamiy nukuliganes.”

22 Asibabaw asilivan idokes Yeisuw ansinap bwein. Ikatiliganes anilivan peinan singay bwein, mo isom ninous, ikatugans; ilansa, “Tabta mtowen Yosep natun, ne? Ama̱wan bikakin sinap towen?”

23 Iw to Yeisuw, ilana, “Mounid bukudibakeigs adilivans mamagin: ‘Doket ya̱koum, kuva̱geim tatoneim mo bukubwein!’ Adok bukulana, ‘Bulagam Kapaneyum waseg nakaligen, kuvag ma̱wan, wamven tatoneim.’”

24 Yeisuw mo ilivan, ilana, “Mounid adibakeimiy, gamag nag biliganes palopit anilivan wanven tatonen.”

25 Yeisuw ilivan-vak, ilana, “Anatut Ilaytiy nag ikweis kweis kweitoun bweilim mo tibukon kweinim katanok, o nakwabs singay babaw ven towen Yisleil waseg, tage Yowbad nag ikayeb Ilaytiy binek nakwab vinen-Yisleil va̱gan bimtakavet kan Ilaytiy, nag. Ikayeb Ilaytiy inek vinen-Sidon, nakwab na̱tan inaven Salepat.

27 “Toulepel-vak singay babaw ven Yisleil waseg, tage palopit Ilays nag ivag ibweins; misinaka ivag ibwein gum-Siliy teitan yagan Na̱man.”

28 Tasiyas wanuwan sinagog iliganes Yeisuw anilivan towen, mo ikapasal nuwes, ituts, iyousis Yeisuw, inawes watoulan ven, itokes inawes dibwadeb tigtageg waseg, ven nikabis wakunuwatan, idokes bilaves bein watinow.

30 Tage Yeisuw ilavay wanuwana gamag babaw, inoun in, ilisawes.

Inakatimlakay tawtoun

31 Iwloubus in Galiliy ven yagan Kapaneyum. Sa̱bat waseg ikatimlakes gamag, mo isom ninous, peinan inakatimlakay tawtoun, ma̱wana takaleiwag tatonen.

Ikawsep yeiluw

(Mak 1:21-28)

33 Wasinagog towen gamag teitan, yeiluw kalbaleb nises wa̱won. Aygan avakaein iwak, ilana, “Ya! Aveiyag bukunuwakeig ya̱koum gum-Nasalet Yeisuw? Adok bukuyagageig, ne? Akakina yak, Yowbad Natun yak.”

35 Tage Yeisuw ikan yeiluw towen, ilana, “Kukwa̱pay, kukilev taw towen.” Yeiluw ivag taw towen ikalouw imasis wapwepway wanuwes gamags, ikilev taw towen, inoun; tage taw towen bo ibwein, nag iyageg, nag.

36 Bo isom ninous tasiyas, illivans sisiyas, ilansa, “Aw-sinap towen? Inakaleiwag tawtoun idibakes tasiyas yeiluw kalbaleb mo ikilaves gamags.”

37 Bulagan in ven babaw Kapaneyum walasin.

Ivag takatouns babaw ibweins

(Matiw 8:14-17; Mak 1:29-34)

38 Yeisuw itamanaw ilisow sinagog, inoun in Saymon wanbunatum. Saymon yawan nimmasis ankatoun, won mana̱wen vin singay muyamuy, initougs waseg Yeisuw va̱gan bileb.

39 Iligen, inoun in, itamanaw itoun walasin, ikayeb katoun towen, mo iyenom. Bo ibwein, nuwanaw mo itamanaw ivag kaeis mo ikams.

40 Wankuyeim ka̱las iseilil, mo imeyes takatouns waseg Yeisuw, askatoun kweitan kweitan; isen naman wawous tatanok tatanok, mo ibweins.

41 Bwagaw-vak nibugawus gamag mwasanin, Yeisuw ivag mo ilisawes; iwkuwaks, ilansa, “Ya̱koum Yowbad Natun ya̱koum!” Tage Yeisuw ika̱nes; nag itam va̱gan bilivans, peinan iwtusis, ikakins mtowen Kelis, takatinabwein gamags.

Ita̱vin igeiguy

(Mak 1:35-39)

42 Iyam ga̱boug mo inoun in ven makaw. Gamag babaw mo ineis ineves; iba̱nes mo inekes. Bikayuses kid Yeisuw; ilansa, “Awoum bukulisawem.”

43 Iwa̱ge Yeisuw, ilana, “Nag! Kadiloka bageiguy liva̱nen Yowbad nakaleiwag, wasigeis ven kweitan kweitan. Yowbad nikayabeig nam silma̱nin nawotet towen.”

44 Mo ita̱vin in igeiguy sinagog kweitan kweitan Yudiy waseg.

Copyright information for `MYW