Mark 12

Tawteleins bag asisinap kalbaleb

(Matiw 21:33-46; Luk 20:9-19)

Ikous, mo isilamaw nakabebay, isekes mamagina, “Bigulen gleip teitan tamwey isop; kal ilev ikous wadadan bag palavas; wayn kasinen ivkaes ikous; tamtakavatein bag nabunatum iwlul ikous; mo isekes gamag mwasanin siwotet va̱gan biwwotets inabag, mo inoun in kweitan ven, isiw.

“Wankuyeim anagin tutan bo bimwanoug ivag sivinan bikamkwen, mo ikayeb natouwat binekes tasiyas tawteleins bag, anagin bikow bimey, tamwey towen bikamkwen.

“Inekes, mo iwaweiys; nag kan isekes, ikayabes, makava iyum.

“Mo ikayeb tayuwein-vak, inekes tasiyas tawteleins bag, iwaysa wakunun iyagages; mo iyum.

“Im, ikayeb-vak tatounun; in mo iweiys, ikatimates. Wankuyeim ikayabes babaw, mwasinis iwaweiys, mwasinis ikatimates.

“Ikous natouwats babaws, anmwa̱net natun tatonen nises, mo ikayeb binekes; ilana, ‘Bo bivna̱ses natug o bisiwyoubus.’

“Nag gog. Tasiyas tamtakavateins bag illivans, ilansa, ‘Kukines tamwey towen natun beim. Kumeis, taweiys; igaw gog tamwey towen bikanig, mo bitakawes dakiyays, bag towen.’

“Mo ituts, inekes, iweiys taw mtowen, tamwey natun, mo inupes, ilaves, in watoulan bag.

“Tamwey taginibag towen ininuway, ilana, ‘Aveiyag bavag?’ Adok bo binekes, tasiyas tamtakavateins bag bikatimates, bisek gog siwotet gamag mwasinis wasigeis.

10 “Adok nag kukwakins liva̱nen, Bukitab waseg nises mamagina:

‘Wululay towen, tawteleins bunatum nipiyaves,
tage bo imlavag anma̱wamwan bunatum.
11 DaGuyaws nawotet towen; bo isom nanouds.’”
12 Yeisuw anilivan iyakous, tasiyas ikakins-wan Yeisuw anilivan peinan asisinap kalbaleb, mo ikapasal nuwes, idokes kid biyousis Yeisuw beiweiys. Nag gog; aspwa̱yat peinan ikines gamag singaya babaw, mapuna bo ilisawes, inounas.

Pa̱yin silma̱nin Sisal

(Matiw 22:15-22; Luk 20:20-26)

13 Min-Yudiy tasiyas mo ikayabes Palisiy mwasanin sisiyas Elod nagamag mwasanin, binekes Yeisuw bikatiga̱nes, bikines kukin beibol anilivan mo biyateles kid.

14 Inekes Yeisuw, idibakes, ilansa, “Tamwey, kakakina ya̱koum amsinap kamnat. Nag bukuvnas gamag teitan mo bukupiyev kid son, nag. Nag kuninuway gamag askakin watoulan, nag. Tage mukwatimlakay mounid, Yowbad inaked silma̱nin. Tab kadilok bitapa̱yins Sisal nata̱kis, ne? Bitatams Sisal waseg o bitapiyaves adok?”

15 Tage Yeisuw bo ikakin tayyaweids tasiyas, idibakes ilana, “Wawun kuyakwaneigs, ne? Money silma̱nin ta̱kis kumeyes bakin.”

16 Imeyes money dakul towen yagan danaliyus, ikin, ikatiga̱nes, ilana, “Kal gamag kululuwan nileles money towen waseg, o kal yagan nileles towen?”

Iweis tasiyas, ilansa, “Sisal.”

17 Yeisuw mo idibakes, ilana, “Sisal navavag kutams Sisal waseg, o Yowbad navavag kutams Yowbad waseg.”

Iliganes anilivan towen, bo isom ninous tasiyas.

Gamag beikits vayuwein

(Matiw 22:23-33; Luk 20:27-40)

18 Tasiyas Sadusiy asilivan, ilansa, “Takanigs nag beikits vayuwein.” Tasiyas gog inekes Yeisuw, ikatiga̱nes, ilansa, “Tamwey, kweiboug Moses nilel dakaleiwags mamagina: Kukin kal taw bikanig, natun nag, bwadan mo beivays son nakwab va̱gan bikop natun mo bimlavag tuwan natun.

20 “Tamwey teitan, budan gog teinim tatanok; tamwey iginivay son nakwav, mo ikanig, natun nag.

21 “Isiken mo ivay son nakwab, mo ikanig, natun nag. Isiken, isiken, isiken iveivaysa sisiy nakwab, imta̱mats, nitus nag, ee... iyakous tawaw, mo ikanig kuda̱vin na̱wen. Igaw beikits vayuwein takanigs tasiyas, vin namwan kavel; peinan babaw neivays sisiy?”

24 Iw to Yeisuw, idibakes, ilana, “Adok bo ibol amilivan yakamiy, peinan nag kukwakins Bukitab anilivan, o nag kukwakins Yowbad natawtoun. Igaw beikits vayuwein mamagina anelos tasiyas walba̱lab, nag beivays, nag.

26 “Tage takanigs bo beikits vayuwein. Adok nag kukwakins Yowbad anilivan Bukitab waseg, Moses kweiboug ikin kaligweg nigigob kov. Yowbad mo idibek, ilana, ‘Yey Ebelam naYowbad yey, vey Aysak naYowbad yey, yey Yekob naYowbad yey.’ Yowbad tamwamovs tasiyas siYowbad, nag imtakavates tasiyas takanigs, nag. Singay ibol ninoumiy.”

Kaleiwag avakaein

(Matiw 22:34-40; Luk 10:25-28)

28 Teitan takatimlakein kaleiwag iligen sikatugwan waseg Yeisuw, ikakina nakatumap tawtoun, mo inek Yeisuw, ikatigan, ilana, “Aw-kaleiwag imug?”

29 Iw to Yeisuw, ilana, “Kaleiwag tamumug mamagina: Kuliganes min-Yisleil yakamiy, daGuyaws Yowbad anmwa̱net. Kadiloka kusiwyoubus daGuyaws Yowbad, ateimiy mounid kuta̱mes waseg, mwamovamiy mounid kuta̱mes waseg, ninoumiy mounid kuta̱mes waseg, mitawtoun mounid kuta̱mes waseg.

31 “Kwayuwein kaleiwag mamagina: Kuvnas soum ma̱wana ya̱koum tatoneim nukuvna̱seim. Nag kweitan kaleiwag imgwayes tasiyas.”

32 Takatimlakay towen idibek Yeisuw, ilana, “Singaya bwein mukwatimlakay. Amlivan mounid, peinan daYowbads anmwa̱net; nag tayuwein nises. Kaleiwag tasiyas nukulivan ilisawes mansiyas man bitagob va̱gan bitalun Yowbad waseg. E, bo imug kaleiwag tasiyas va̱gan bitasiwyoubus Yowbad a̱teids mounid waseg, datawtouns mounid waseg, o bitavnas sod ma̱wana ya̱kid tatoneid nitavna̱seid.”

34 Yeisuw iligen, ikakina taw towen anilivan bwanabwein, idibek, ilana, “Ya̱koum kadilakusa Yowbad nakabkaleiwag bukukwakin.”

Ikous, mo igoulus Yeisuw; bo iyakousis sikatugwan.

Deibid tabun

(Matiw 22:41-46; Luk 20:41-44)

35 Wankuyeim ikatimlakes gamag wanuwan Yowbad nabunatum, ilana, “Aveiyag wawun takatimlakeins kaleiwag asilivan, ilansa, ‘Kelis Deibid tabun.’ Kweiboug Yowbad Kululuwan ansinap ikatipel isek Deibid, ilana:

‘DaGuyaws idibek gunguyaw, ilana:
Kusin wagunka̱tay va̱gan bava̱ges beibus siyas astameiliw yak, bukuvnivans wakunutes.’
37 “Mtowen Deibid tamwey, ama̱wan bidok tabun naGuyaw?”

Yeisuw nakatimlakay gamag babaw sivines binganegs.

Ika̱nes tasiyas takatimlakeins kaleiwag

(Matiw 23:1-36; Luk 20:45-47)

38 Yeisuw nakatimlakay wasigeis, ilana, “Kupiyaves asisinap tasiyas takatimlakeins kaleiwag. Sivines binounas asikweim vayvayov mo gamag bikululs wamtes wavtakon ven. Tapwa̱loul waseg sivines bisinis wa̱keb, o sagal waseg bisinis wapwa̱siw.

40 “Tage tasiyas asisinap kalbaleb kupiyaves, peinan ikwekways nakwabs sivavag, mo sinitoug iveiyov. Tayyaweids tasiyas. Igaw Yowbad mo bimop asisinap kalbaleb, biyagagesa singay.”

Nakwab namuloul

(Luk 21:1-4)

41 Yeisuw isin wanuwan Yowbad nabunatum, ikin gamag babaw imimeis bimulouls. Simuloul ilaves in wanuwan didawag avakaein. Ikin guyawaw simuloul singaya avakaein.

42 Wankuyeim mo ikin nakwab na̱tan nasimav isiw im, ilev namoney dakul kekel akweiy, mamagina akweiy toya.

43 Yeisuw ikin, idawes navamul, imeis, idibakes, ilana, “Mounid adibakeimiy nakwab mana̱wen nasimav namuloul ilisow simuloul tasiyas gamag babaw.

44 “Tasiyas imulouls ikous, tage babaw simoney nises. Mana̱wen gog nasimav bo ililavena iyakous. Nag kweitan namoney nises va̱gan bigimwel kan beikam; nag.”

Copyright information for `MYW