Mark 4

Talavein kaytul

(Matiw 13:1-9; Luk 8:4-8)

Vayuwein inoun in yevagam avakaein wadadan mo ikatimlakes gamags, peinan singay babaw gamag katuyouns inekes, mapuna itouw wa̱wag, isin, ikatimlakes gamag tasiyas wanakaew nisesus.

Ikatimlakes, nakabebay babaw isekes, idibakes mamagina:

“Kuliganes yakamiy. Talavein kaytul wit inoun in wa̱bag, ilivelov nakaytul.

“Kaytul mwasanin ikalka̱louw ininein waked, man iyoyows imimeis, ikoums ikamiyeivis.

“Kaytul mwasanin ikalka̱louw ininein wadikuda̱kul; nag ivag pwepway-nen, tage nuwanaw isob, wankuyeim ikal ka̱las, ikalayag peinan gidwa̱lin nag inek pwepway.

“Kaytul mwasanin ikalka̱louw inek doudiw kaytul-nen, isibwa̱sobs son doudiw, tage doudiw itawtoun; wit nag ivag anagin.

“Tage kaytul mwasanin ikalka̱louw ininein wasapon isibwa̱sobs, ivakaein, ivag kan babaw; kaytan wit anagin sinawatoun, kaytan wit anagin sinawanim, kaytan wit lakatutan.”

Ikous nakabebay towen, ilivan, ilana, “Kal yak sam teigam, bweina kuligen.”

Silawun nakabebay

(Matiw 13:10-17; Luk 8:9-10)

10 Wankuyeim gamag babaw ilisawes Yeisuw, asteiyuy sisiy nisesus, mo ikatiga̱nes Yeisuw sisiyas inavamul sinawatan teiy; sivines bikakins nakabebay silawun.

11 Iw to Yeisuw, mo idibakes, ilana, “Sinapun Yowbad o nakaleiwag kukwakins yakamiy, tage tasiyas watoulan biliganes kabebay, tage nag bikakins silawun.

12 “Mapuna

‘Mites bikines tage nag biwtusis.
Tiges biliganes tage nag bikakins.
Va̱gan nag bikanavin ninous, nag biwidis
asisinap kalbaleb, nag.’”

Yeisuw ilik ankabebay

(Matiw 13:18-23; Luk 8:11-15)

13 Yeisuw mo idibakes, ilana, “Adok nag kukwakins kabebay towen. Ama̱wan bukuwkakes mo bukukwakins kabebay babaw?

14 “Mtowen talavein kaytul mamagina livan bilivelov.

15 “Siyas nikalka̱louw wa̱ked man bikawtawes mamagina gamag iliganes bwanabwein, nag inuwes beibwein livan towen, mo isap Seitan, ikwey livan towen.

16 “Siyas nikalka̱louw wadikuda̱kul mamagina gamag tasiyas bo iliganes livan bwanabwein, sona simwa̱saw mo itams waseg. Tage nag ikakins livan silawun, mamagina gidwa̱lis nag binek pwepway, nuwanaw mo ikalouws. Gamag tasiyas beitams livan towen waseg, mapuna gamag mwasanin biyagages, abes bigeg, nuwanaw mo bikalouws.

18 “Siyas gog nisibwa̱sobs son doudiw mamagina gamag tasiyas iliganes livan towen, tage ininuways sinapun ven watinow, o sivines biguyaws o bimwa̱saws youd kweitan kweitan waseg, mapuna inumlaves livan towen; nag ivag anagin; mamagina bo ikwen doudiw.

20 “Tage tasiyas wasapon, mamagina gamag tasiyas iliganes livan, itams waseg, ivag angis, mwasinis sinawatoun, mwasinis sinawanim, mwasinis lakatutan.”

Lamp bitasen wateibol

(Luk 8:16-18)

21 Wankuyeim mo ikabebay, idibakes, ilana, “Nag teitan bikow nalamp bikatgubwel loutan wakunuwatan; nag bisen keb waskawan, nag. Tage dalamp bitasen wateibol.

22 “Aveiyag bitasowum, igaw mo bikamat. Aw-livan bitakatmwa̱lag, igaw gamag babaw mo biliganes.

23 “Kal ya̱koum sam teigam, bweina kuligen.”

24 Ikous, mo idibakes, ilana, “Kuvna̱ses livan to kuliganes. Aveiyag kusekes gamags, Yowbad mo bisekeimiy, o bikatimweis bibabaw.

25 “Kukin mivavag nises, Yowbad mo bisekeimiy bibabaw; kukin gog mivavag nag, mo biyamen aveiyag nises, bikow, va̱gan bukudeivs.”

Kaytul isibwa̱sobs

26 Wankuyeim ilivan, ilana, “Yowbad nakaleiwag ama̱wan? Adok ma̱wan gamag teitan ilivelov kaytul ininein wa̱bag, iyum in, ises, ee... yam mwasanin ikous, kaytul mo isob, ivakaein; tage nag ikakin silawun.

28 “Pwepway nakaleiwag tatonen, kan isob, ivakaein mo ilal, ivag anagin.

29 “Anagin bimatuw, nuwanaw mo bitayow, peinan anatut ta̱yoy.”

Tipol kaytul-nen

(Matiw 13:31-32; Luk 13:18-19)

30 Wankuyeim ilivan, ilana, “Kweitan kabebay ma̱wan towen kuliganes va̱gan bukukwakins Yowbad nakaleiwag. Adok ma̱wana tipol kaytul-nen, bitasop singay kakit, tage beisob mo bimlavag kay avakaein, yayagen kawka̱veks; man biyoyows bimimeis biwlules sibwan wayayagein.”

Yeisuw nakabebay babaw

(Matiw 13:34-35)

33 Nakabebay ma̱wan singay babaw ansinap ikatpel isekes. Aveiyag ikadilokes bikakins mo isekes ma̱wan.

34 Nag anilivan didumwal isekes, nag; kabebay-wan. Wankuyeim siney navamul tatonen, tasiyas-wan mo ilik va̱gan silawun meiveka kabebay bikakins.

Bwaw idibek mo iyenom

(Matiw 8:23-27; Luk 8:22-25)

35 Yam towen kwayav, Yeisuw wa̱wag nises, idibakes, ilana, “Kumeis kutouws tadopels, taneis palatan.”

36 Itouws tasiyas, ilisawes gamag babaw nisesus waven mo idopels bineis palatan, ikavetans sisiyas mwasanin wag.

37 Isisawls, bwaw avakaein ilivatus, soup inay-o; kakita bimukul wag.

38 Togo Yeisuw nikow abeikun, nisen wawawun wag, imasis kangagay, mo inekes, iwgunis, ilansa, “Tamwey, kukit, tabta kukwakin kakita bitamta̱mats?”

39 Iligen, ikit, idibek yag son kaysay, ilana, “Deisa! Beitay!” Yag mo idabab, niwal avakaein.

40 Ikous, mo idibakes tasiyas, ilana, “Wawun amipwa̱yat? Adok nag kusimounids waseg yey, ne?”

41 Singaya igoulus, sisiyas illivans, ilansa, “Amata taw towen? Idibakew yag son kaysay, mo ikanawes aygan.”

Copyright information for `MYW