Matthew 10

Isekes siwotet navamul sinawatan teiy

(Mak 3:13-19; Luk 6:12-16)

Yeisuw mo idawes navamul sinawatan teiy, imeis, mo isekes sikaleiwag va̱gan bwagaw bikayyabes, o takatouns biva̱ges beibweins, askatoun kweitan kweitan waseg. Tasiyas sinawatan teiy takaweins liva̱nen Yeisuw yiges mamagina:

Saymon, yagan kwayuwein Pita;
Saymon bwadan Andiluw;
Yemes, mtowen Sebediy natun;
Yemes bwadan Yon;
Pilip son Batolomiw;
Tomas son Matiw, mtowen takawein ta̱kis;
Yemes, mtowen Alpiyow natun, son Tadiw;
kweitan gum-Kenan yagan Saymon,
son Yudas Iskaliyot, mtowen tasikodein Yeisuw.

Yeisuw ikayabes navamul, bineis iwotets

(Mak 6:7-13; Luk 9:1-6)

Tasiyas sinawatan teiy Yeisuw ikayabes silma̱nin nawotet; iguyes, ilana, “Misinaka kunekes sidayas min-Yisleil, mtasiyas ikanka̱nigs peinan ilassulis ked. Awoun kunekes tobwag ven gimgilis tasiyas ages kweitan; awoum bukuneis ven Samaliy waseg; awoum.

“Igaw bukunounas, kuguyes gamag, kulansa, ‘Yowbad nakaleiwag kakita bisap.’ Takatouns kuva̱ges beibwein; takanigs kuymoves; tasiyas toulepel kuva̱ges kalivis beibwein, bwagaw kwayabes binounas bineis tana̱ban. Peinan Yowbad nisiwyoubumiy, bweina kusiwyoubus tasiyas.

“Money awoum kukwawes, goul dakul, o silib dakul, o kopa dakul; awoum. 10 Awoum kunamiy kukwawes wa̱ked. Amikweim mwayntanok kusikams; awoum mwaynatan kukwawes; misandol awoum; mikaytuk awoum. Peinan wotet towen bukukwawes, kaeimiy mo bukuba̱nes, maysan wotet.

11 “Amata ven waseg bukuneis, kwatugwans gamag wasigeis kavel ansinap bwanabwein, mo kusiw wanbunatum, kusesus ee... mo kunounas.

12 “Aw-bunatum bukusiws waseg, kumulouls wasigeis tasiyas, mo livan siwa̱youb kusekes. Kukin asisinap bwanabwein, mo bimwa̱saws tasiyas; kukin gog nag, livan towen bwanabwein mo beiyum wasigeis yakamiy. 14 Kukin bipiyaveimiy o bipiyaves amilivan, igaw bukulisawes ven towen kwatsapis kikeimiy musamusan bein ven towen, mo bikakins asisinap kalbaleb.

15 “Kweiboug Yowbad iweiys min-Sodom, min-Gomol peinan asisinap kalbaleb; tage wunsiyas ven ipiyaveimiy asisinap singay kalbaleb. Igaw tutan Yowbad bikatukin, kalamwey-nen beiweiys min-Sodom, min-Gomol, tage singaya-wan beiweiys wunsiyas ven nipiyaveimiy.

Gamag mwasanin igaw mo bikamliwes

(Mak 13:9-13; Luk 21:12-17)

16 “Akayabeimiy silma̱nin wotet towen. Igaw bukuneis, bukunekes babaw gamag bikamliweimiy. Yakamiy mamagina mansiyas sip tage tasiyas mamagina awuk bulawud biyagageimiy. Kadiloka kuva̱ges amisinap bitawtoun, o kuyma̱nums mamagina bwabun yakamiy.

17 “Kumtakavateimiy, peinan gamag biyateleimiy ya̱tal avakaein waseg, o sisinagog wasigeis biwaweimiy vatul waseg; biyateleimiy wamtes tasiyas takaleiwags kavka̱veks, o king mwasanin wamtes, peinan gungamag yakamiy; mo bukukwa̱mats liva̱neig. Tasiyas binganegs, sisiyas tobwag ven gimgilis.

19 “Igaw biyateleimiy ya̱tal avakaein waseg, awoum ninoumiy bibabaw, awoum kuninuways ama̱wan bukulivans; peinan ya̱tal wanuwan, amilivan tawtoun Yowbad mo bisekeimiy. Nag tatineimiy bukulivans, peinan Tamads Kululuwan bikatipel ansinap, anilivan waseg bukulivans.

21 “Tut towen wanakougwaw, tuwan bisilkod bwadan, va̱gan takaleiwags bikatimates, o taman bisilkod natun va̱gan takaleiwags bikatimates; o nitsiyas bipiyaves sikaleiwag timsiyas insiyas, bisilkodes va̱gan gamag mwasanin bikatimates. 22 O peinan kukwawes yagag yey, gamag babaw mo bikamliweimiy yakamiy. Kukin gog bukusimkines gunawotet waseg, igaw mo bukusesus bwein.

23 “Kukin gamag mwasanin biyagageimiy ven kweitan waseg, kusawls, kuneis kweitan ven. Mounid adibakeimiy, igaw vena babaw Yisleil waseg, bukutita̱vins ee... Gimgilitoun yey mo ba̱yum bam, tage yakamiy igaw-wan; nag bukuyakousis.

24 “Navamul awoum bimgwey natakatimlakay waseg; natouwat awoum bikaleiwag natovek waseg. Tage gunavamul yakamiy ma̱wana mitakatimlakay yey, o guntouwat yakamiy ma̱wan mitovek yey. Bo idokeigs baloum yey, singay bo bitawyageimiy, peinan gungamag yakamiy.

Liva̱nen pwa̱yat

(Luk 12:2-9)

26 “Awoum kuwenes gamag tasiyas. Sinap babaw gamag mwasanin nikawwumes, tage igaw gamag babaw mo bikines kamnat waseg, bikakins.

27 “Sinap bo akatamwa̱lag boug waseg, nukuliganes, va̱gan bukugeiguys wavtakon ven, wuda̱yam waseg.

28 “Awoum kuwenes tasiyas bikatimates kalivimiy, peinan nag kadilok bikatimates kululuwamiy. Tage kadiloka kuwenes towen biyageg kululuwamiy son kalivimiy wadiginasim, ven to kalbaleb waseg.

29 “Adok maysan skwa̱sik mwanay misinak kweinim toya, tage mwanatan beimat Tamads mo bikakin. Kunukun babewein Tamads bo ivin babewein wakunuds; ansinap tawtoun, bo kadiloka bimtatavateimiy. Awoum kuwenes gamag tasiyas, peinan Tamads imtakavatemiy; maysamiy singay imug mansiyas skwa̱sik wasigeis.

32 “Kal yak bukwamtel wamtes gamag, bukulana, ‘Yey Yeisuw nagamag yey’, igaw mo bakamtel wamatan Tamag wanakaew, balana, ‘Towen gungamag tonen.’ 33 Kukin gog kavel yak bukwaya̱neig wamtes gamag, yey mo bakaya̱neim wamatan Tamag wanakaew.

Niwal nag, tage naviy silma̱nin

(Luk 12:51-53; 14:26-27)

34 “Awoum kunuways yey nam ven watinow niwal silma̱nin; niwal awoum, tage naviy silma̱nin. 35 Yey nam va̱gan magaltawaw mwasanin bivatays wasigeis timsiyas, o magalvinay bivatays wasigeis insiyas o wasigeis yiwsiyas, peinan gamag taliven bo bikamliwes.

37 “Kal yak kusiwyoubus avakaein tamam son inam, tage yey kusiwyoubug kakit, nag kadilok bukusesuna gungamag ya̱koum. Kal yak kusiwyoubus avakaein nitum, tage yey kusiwyoubug kakit, nag kadilok bukusesuna gungamag ya̱koum.

38 “Kadilok bukukow amklos, bukwabkunig va̱gan mo bukukwanig; tage kukin bukupiyev, nag kadilok bukusesuna gungamag ya̱koum.

39 “Kukin bukwayus mwamovam, bo biyamkwaneim; kukin gog biyamkwen mwamovam peinag yey, igaw mo bukuba̱nes.

Maysamiy

(Mak 9:41)

40 “Kukin kal beitam waseg yak, mamagina bo itam waseg yey; mo itam-vak waseg Yowbad, peinan Yowbad nikayabeig nam.

41 “Kukin kal yak bukwaveiyon waseg palopit teitan, peinan palopit towen, mogo palopit maysan bukukow. Kal yak bukwaveiyon waseg tadidumwal, peinan tadidumwal towen, mogo maysan tadidumwal bukukow.

42 “Kal yak bukusiwa̱youb kakit teitan gwad waseg, peinan gunavamul towen, mamagina kwavtanok anasoup bukusek, mounid adibakeim maysam nag biyamkwen.”

Copyright information for `MYW