Matthew 12

Yeisuw takaleiwag yam tapwa̱loul waseg

(Mak 2:23-28; Luk 6:1-5)

Misumkwey towen Yeisuw siney navamul inoyes kweitan ked wanuwan bag, yam tapwa̱loul waseg; navamul asimoun, ilapes wit anagin, ikams.

Tasiyas Palisiy ikines, idibakes Yeisuw, ilansa, “Kukin muvamul, nag igoulus Sa̱bat.”

Yeisuw ilana, “Adok nag kukwakins liva̱nen Deibid, nises Bukitab wanuwan. Peinan asimoun siney nagamag, isiws Yowbad wanbunatum, ikams bled towen nises Yowbad wamatan. Tanuwgwes lun bo ikatibomes bled towen. Na-ikadilok Deibid beikam; nagamag-vak nag beikams; misinaka tasiyas tanuwgwes lun. Tage tanuwagan lun isek Deibid sen nagamag, mo ikams, peinan singaya asimoun.

“O adok nag kuvinis Moses nakaleiwag, peinan Sa̱bat waseg tasiyas tanuwgwes lun iwotets lun, Yowbad wanbunatum, tage nag ivag asisinap kalbaleb.

“Gunakaleiwag towen kweivaw imug-wan Yowbad nabunatum waseg.

“Livan nises Bukitab waseg, ‘Makava lun apiyev; sivinag kid siwa̱youb.’ Magat bukukwakins Yowbad anilivan towen, adok nag bukuygages tasiyas toubweins.

“Peinan Gimgilitoun yey, Sa̱bat tanuwagan yey.”

Sa̱bat waseg Yeisuw ileb teitan, naman ipam

(Mak 3:1-6; Luk 6:6-11)

Yeisuw ilisawes, inoun, isiw sisinagog silma̱nin tapwa̱loul.

10 Sinagog wanuwan teitan nises, naman ipam. Tasiyas sivines biyateles Yeisuw, ikatiga̱nes, ilansa, “Tab kadilok bitavag takatouns beibweins, Sa̱bat waseg?”

11 Iwa̱ge Yeisuw ilana, “Adok nag teitan yakamiy a̱len sip bikalivatow bein wa̱leg Sa̱bat waseg, bilivan, bilana, ‘Deisa bisiw, peinan Sa̱bat.’ Adok nag. Adok biyous, bikatinob, ne? E, gamag singay imgwayes wasigeis aleimiyas. Mapun bweina bitaleb sod Sabat waseg.”

13 Yeisuw mo idibek taw towen, ilana, “Kusayel namam palawen neipam.” Iyasel mo ibwein, ma̱wana paliyuwein.

14 Siyas Palisiy bo igeg ninous, isaps, illivans sisiyas, sivines kid biyagages mtowen Yeisuw.

Yowbad natouwat

15 Yeisuw ikakin ninous, inoun in. Gamag babaw ibwa̱kuns Yeisuw waseg; takatouns ivag mo ibweins; idibakes, ilana, “Awoum kwamteles youd towen; awoum!”

17 Mo ikamat Yowbad anilivan palopit towen Isaya nilivnek mamagina:

‘Kukines guntouwat, bo adouw silma̱nin gunawotet.
Singay ikalin nuwag mtowen.
Basek kululuwag, mo bisek nakaleiwag didumwal, ven babaw wasigeis.
19 Nag biwkuwak, nag bikamniman, gamag nag biliganes aygan wavtakon ven, nag.
20 Kaytuk isasal, nag biwut bilev, nag.
Wodam nakagidaged kalbaleb, nag bisuwmet, nag.
Igaw nawotet waseg sinap didumwal mo biton.
21  E, tobwag ven gimgilis binmises va̱gan mtowen bilabes.’

Ivtokes livan Yeisuw

(Mak 3:20-30; Luk 11:14-23; 12:10)

22 Wankuyeim itokes teitan gamag, baloum neiweiy, imeyes Yeisuw waseg, ankatoun mamagina ikaw matan, o wadon ikapet; ta-ma̱wan bikapwageg bilivan. Inekes Yeisuw, ivag mo ikilev, bo ibwein gamag towen, ikin, ilivan bwanabwein. 23 Gamag babaw ikines, bo isom ninous, ilansa, “Adok mtowen Deibid tabun, Mesay.”

24 Siyas gog Palisiy iliganes, mo ivtokes livan, ilansa, “Siyas baloum sitovek Seitan mtowen ileb Yeisuw, mo ikayabes baloum.”

25 Yeisuw ikakin ninous, mapuna idibakes, ilana, “Kukin bod avakaein tawtoun nises; tage bod to gimgilis bikavikuns sisiyas; bilivis, bo beigwey bod towen, beikous. O ven o kum ma̱wan, kukin gamag bilivis biva̱ges bod babaw, bo beigwey ven towen o kum towen.

26 “Mapuna kuninuways Seitan inabod, kukin Seitan bilabeig mo bakayeb Seitan natouwat tasiyas baloum, mogo Seitan inabod bilivis, bo beikous nakaleiwag tonen. Tage nag.

27 “O kuvtokeigs livan, kulansa, ‘Seitan ileb mo ikayabes baloum,’ o kal ilabes mivamul mo ikayabes baloum? Kuninuways asisinap tasiyas mo bukukwakins bo ibol amilivan.

28 “Kukin gog Yowbad Kululuwan bilabeig mo bakayeb baloum, mapuna Yowbad nakaleiwag bo isap wasigeis yakamiy.

29 “Kweitan sinap kuninuways: Ta-ma̱wan bitasiw tawtoun gamag wanabunatum mo bitaven navavag. Deisa bitayous taw towen, tayawen naman, kaken, va̱gan nag binoun, mo bitaven navavag, tayakousis.

30 “Kukin kal nag bilabeig gunawotet waseg, gamag towen isilbwed gunawotet. O kalisiy nag bikatikunakus wagunseigous, tasiyas gog bikatigayes.

31 “Mapun adibakeimiy, amisinap kalbaleb o amilivan kalbaleb Yowbad biwid babaw beikous; tage kweitan sinap nag. Magat bukuyeg Yowbad Kululuwan, nag biwid sinap towen, nag.

32 “Kukin bukutawyageig Gimgilitoun yey, Yowbad biwid amsinap towen; tage bukutawyeg Yowbad Kululuwan Bwanabwein, Yowbad nag biwid, tut towen nag, o tut wanakougwaw nag.

Kay anagin

(Luk 6:43-45)

33 “Magat kay bwein, anagin bwein. Magat kay kalbaleb, anagin kalbaleb. Takin anagin mo takakin kay ama̱wan, bwein o kalbaleb.

34 “Yakamiy takalbalebs magina mwatet yakamiy, ta-ma̱wan bukulivans bwein, peinan ninoumiy kalbaleba singay; mapun amilivan kalbaleb.

35 “Tasiyas toubweins asisinap bwein, mapuna siwotet bwein; tage tasiyas takalbalebs asisinap kalbaleb, mapuna siwotet kalbaleb.

36 “Kukin bukulivans mav, Yowbad mo biyateleimiy, igaw tutan bikatukin sinap babaw gamag wasigeis.

37 “Magat amilivan bwein bo bukunounas bwein, o kukin gog amilivan kalbaleb mo bukulivatus kalbaleb.”

Gamag mwasanin sivines bikines naman mulin

(Mak 8:11-12; Luk 11:29-32)

38 Wankuyeim takatimlakeins kaleiwag mwasanin sisiy tasiyas Palisiy mwasanin idibakes Yeisuw, ilansa, “Tamwey, sivinem namam mulin bakakin, mo bakasimounid waseg yak.”

39 Yeisuw ikatimop, ilana, “Kalbaleb gamag, tapiyaveins Yowbad yakamiy, sivinamiy bukukwakins namag mulin. Nag kweitan sinap bukukwakins; misinaka sinap towen, peinan palopit towen kweiboug Youna nises uloulas wanuwan, yam kweitoun o boug kweitoun, ma̱wan yey Gimgilitoun yey bo basesun pwepway wanuwan, yam kweitoun o boug kweitoun.

41 “Min-Ninavek igaw mo bitamanaws ya̱tal waseg, bilivans va̱gan bukukwakins amisinap kalbaleb, gudwouvaws yakamiy. Peinan tasiyas iliganes Youna nageiguy mo ilaves asisinap kalbaleb; tage kaleiwag nagein nukuliganes ikalsow Youna nageiguy. Kuliganes; nag gog, nag kulaves amisinap kalbaleb.

42 “Igaw tutan Yowbad biya̱tal wasigeis gamag babaw, mo kwin mana̱wen kweiboug inaven wa̱yals mo bilivan va̱gan bukukwakins amisinap kalbaleb, gudwouvaws yakamiy. Peinan mana̱wen kwin inoun in singay kadiveiyov va̱gan biligen Solomon ansinap; tage sinap towen nagein nukuliganes ikalsow Solomon ansinap waseg.

Gamag ibwein mo ilivet kalbaleb singay

(Luk 11:24-26)

43 “Magat yeiluw bikilev gamag, mo bita̱vin ven babaw, binineiv nakabiyeiwas. Binineiv nag, bilivan bilana, ‘Ba̱yum ban wagunbunatum to nalisow.’

“Beiyum biban nabunatum makaw, bo itaneivis, youd babaw bo ilivkases bwein; bikalin nuwan, bein ikin siney teinim teiy asisinap singaya kalbaleb, tasiyas asibabaw mo beisiws wabunatum, bisesus bisigagas. Kweiboug gamag towen nakalbaleb peinan yeiluw neisiw, tage nakabiyokous waseg singaya kalbaleb. Gudwouvaws yakamiy mikalbaleb bukulivatus ma̱wan.”

Yeisuw taliven

(Mak 3:31-35; Luk 8:19-21)

46 Yeisuw igawa ilivan gamag wasigeis, inan budan itamanaws watoulan gamag babaw, sivines binekes, bilivans sisiy Yeisuw.

47 Teitan ilana, “Inamwa budam nitatos watoulan.”

48 Yeisuw idibek taw towen, ilana, “Kuninuways kalisiy inag budag,” mo ikatimlek navamul tasiyas nitatos wadadan, ilana, “Mtasiyas-one inag o budag.

50 “Kal yak bukukow nanon Tamag walba̱lab, mounid ya̱koum bwadag o nagut o inag.”

Copyright information for `MYW