Revelation of John 15

Youd moumouvit mwasanin

Mo akin youd singay tawtoun walba̱lab, isom nanoug waseg. Akin Yowbad nataka̱yob teinim teiy, ikokews youd moumouvit kweinim kweiy, Yowbad ankavikun nakabiyokous waseg. Youd kweinim kweiy biyagages ven, bo misinak.

Mo akin mamagina yol, magina gilas son kov; akines tasiyas nitakayways waseg man son yagan ananamb, o nitakayways waseg youd towen nibunis magin ma̱wana mana̱wen man; e, gamag tasiyas itamanaws wadadan yol towen, Yowbad alen hap wanimes.

E, ikanweles Moses anawous, mtowen Yowbad natouwat; son La̱miy anawous, ilansa,

“MaGuyaw Yowbad, Tatawtoun yak,
muwotet kavka̱vek, tawtous;
amsinap mounid, didumwal,
ven babaw maGuyaw yak.
O guyaw, gamag babaw bigoulums yak,
bikavasis yagam toneim,
peinan ammwa̱net amsinap kamnat ya̱koum;
mapuna ven babaw gimgilis bimeis, bikululs wamatam,
peinan bo ikamat mukwaleiwag didumwal.”
Ikous, mo akin ikaliyow Yowbad nabunatum walba̱lab, magin mawa̱na nabunatum kweiboug nakaleiwag nilel nises waseg; e, akin ikaliyow nabunatum towen walba̱lab, mo isaps Yowbad nataka̱yob teinim teiy, nikokews youd moumouvit kweinim kweiy, asikweim pwapwa̱kawa tonen singay gimagim, wavtakous abva̱lag mamagina goul.

Mwana̱vas man nisesus, mwantanok mo isekes tasiyas teinim teiy sikabmavin won goul tatonen, kweinim kweiy, boumsiyas abmavin ika̱lawt waseg ankavikun Yowbad, mtowen nises bo isigeg.

Yowbad natawtoun o nakamnat mo ivag mamagina musew, ika̱lawt nabunatum. Ta-kal beisiw bein wanuwan nabunatum. Igaw beikous youd moumouvit kweinim kweiy nikokews nataka̱yob teinim teiy, gamag mo beisiws Yowbad wanbunatum.

Copyright information for `MYW