Revelation of John 22

Ikatimlakeig mo akin lay uwyatan, sipinen mwamov silma̱nin, ma̱wana gilas; lay uwyawen meinoy neim nakabsis Yowbad son La̱miy. E, ila̱tay mo in wavtakon ven. Wadadan lay kay nitatos anagin mwamov silma̱nin. Anagin sinawatan kweiy, kweitan magin, kweitan magin; katanok tibukon anagin kweitan imwanoug, kweitan tibukon anagin kweitan imwanoug. Yageivein gog ven babaw sikaybuy.

Nag aveiyag Yowbad nipiyev mo beisiw ven towen waseg, nag.

Nakabsis Yowbad son La̱miy bises ven towen; o natouwats bikanawes aygan, bikikines magin tonen, o yagan bilel wadibes.

Boug nag beivag; tage nag sivines wodam o ka̱las va̱gan bimteil ven, peinan bo ivanoum mititeilin siGuyaw Yowbad; o angamag tasiyas bikaleiwags, tut nag beikous.

Igaw Yeisuw Kelis beiyum beim

Mo idibakeig, ilana, “Livan towen mounid-wan. Guyaw Yowbad kweiboug ikatipel kululuwan isekes tasiyas palopit; nagein gog mo ikayeb gum-liba̱lab teitan va̱gan bikatimlakeimiy nagamag yakamiy, bukukwakins aveiyag nuwanaw mo bikamat. Nuwanaw ba̱yum baw. Kal yak bukwanow aveiyag buk towen nilivnek, mo bukumwa̱saw.”

Yey Yon aligen o akin youd tasiyas. Akin, aligen ikous, mo akulul avakaein wamatan Yowbad nataka̱yob towen nikatimlakeig youd tasiyas.

Mtowen nidibakeig, ilana, “Awoum! Soug yak, o sidayas budam tasiyas takanaweins aygan Yowbad, babaw ya̱kids; o yey ma̱wana budam tasiyas palopits, o tasiyas takanaweins livan towen nises buk towen waseg. Anmwa̱net Yowbad kukulul wamatan.”

10 Mo idibakeig, ilana, “Awoum kwayus livan buk towen nilivnek, peinan tut kayakus mo bikamat.

11 “Towen ansinap kalbaleb, nakalbaleb bisesun-wan. Towen ansinap bikibik, e nabikibik bisesun-wan. Towen ansinap didumwal, nadidumwal bisesun-wan; o towen ansinap kamnat, gamag towen nakamnat bisesun-wan.

12 “Nuwanaw baw, maysamiy bakow basekeimiy katanok katanok ma̱wan miwotet yakamiy.

13 “Yey A son Z, yey; yey nakabsilamaw, o yey nakabiyokous. Yey amug; yey akuyeim.

14 “Bo bimwa̱saws tasiyas kalisiy biwidis o bivkalines asikweim, kadilokes mo beikams makaywen kay mwamoves silma̱nin; bweina beisiws ven towen awkwedan waseg.

15 “Watoulan nisesus awuk babaw, o tabbwagaws, o tassubwans, o tawa̱yins gamag, o tamgamegs, sisiyas tasiyas sivines biyyaweids.

16 “Yey Yeisuw, bo akayeb guntaka̱yob va̱gan kid bikatimlakeimiy sinap towen, tayekelesiys babaw yakamiy. Yey Deibid delen yey, Deibid gidwa̱lin yey bo asunap; mititeilig avakaein ma̱wana Utuyam yey.”

17 Yowbad Kululuwan son La̱miy nakwav ilansa, “Kum.”

Kukin tanganeg yak, kulana, “Kum.”

Kal yak amdak, kukin sivinam soup, mwamovam silma̱nin, bweina kum kumoum makaw.

18 Adibakeim yak, kal yak bukuligen livan buk towen nilivnek, awoum bukwatimweis. Kukin bukwatimweis, o kweitan livan bukusen, Yowbad mo bikatimweis moumouvit waseg yak; bisekeim youd babaw moumouvit, liva̱nen nises wanuwan buk towen.

19 Awoum gog bukwablev livan kweitan buk towen nilivnek. Kukin bukwalbev, Yowbad mo bigidem waseg yak kam waseg makaywen kay mwamov silma̱nin, o bigidem mukwasis ven towen kamnat waseg, liva̱nen nises buk towen waseg.

20 Takawein livan towen ilana, “Mounid, nuwanawa baw.”

Eimen; bweina bukum Guyaw Yeisuw.

21 Tut towen daGuyaws Yeisuw bisiwyoubumiy tayekelesiys yakamiy.

Copyright information for `MYW