Revelation of John 7

Isenas inasil wawous min-Yisleil

Wankuyeim mo akin Yowbad nataka̱yob asteivas itamanaws itonas ven watinow matan palavas, iyousis yag kweivas, awoum ge beitow yag waven, awoum beitow yag wa̱yol, awoum beitow yag wanawoud; makava niwal.

Yowbad nataka̱yob tanimen mo isap wanuvid, im; wanaman ikow nasil Yowbad Tamwamov. Iwak, aygan avakaein, idibek nataka̱yobs teivas tasiyas nikawes sikaleiwag va̱gan kid biyagages ven son yol;

Ilana, “Kukwayamats tut kadiyakus; igaw bakasen daYowbads inasil inagamag wadibes; ikous, mo bukuygages ven o yol o nawoud wasigeis.”

Mo aligen sikavnivin baba̱wan isenas Yowbad nasil wadibes min-Yisleil asikum katanok katanok wasigeis, babiweis gog lakatutan sinawavas kweivas tawsans.

Isenas nasil wadibes tasiyas asikum Yud sinawatan kweiy tawsans.
Tasiyas asikum Luben sinawatan kweiy tawsans.

Tasiyas asikum Gad sinawatan kweiy tawsans.

Tasiyas asikum Asel sinawatan kweiy tawsans.

Tasiyas asikum Naptal sinawatan kweiy tawsans.

Tasiyas asikum Ma̱nas sinawatan kweiy tawsans.

Tasiyas asikum Simiyon sinawatan kweiy tawsans.

Tasiyas asikum Livay sinawatan kweiy tawsans.

Tasiyas asikum Isakal sinawatan kweiy tawsans.

Tasiyas asikum Seblon sinawatan kweiy tawsans.

Tasiyas asikum Yosep sinawatan kweiy tawsans.

Tasiyas asikum Binyamin sinawatan kweiy tawsans, isenas nasil wadibes.

Meiveka ven gimgilis singay babaw

Wankuyeim akinew mo aban gamag singay babaw, nag kadilok bitavinis, gimgilis ven babaw, o kum babaw, o dal babaw, o kaeig babaw wasigeis, itamanaws wamatan Yowbad nakabsis o La̱miy wamatan, asikweim pwapwa̱kaw, molay wanimes, ages avakaein illivans-wan, ilansa, “Abkatuneib nises waseg daYowbads towen wanakabsis, o la̱miy waseg.”

11 Yowbad nataka̱yobs min-liba̱lab babaw itamanaws isiwnis nakabsis sineyas tammwayas o mansiyas man mwana̱vas, mo ikululs avakaein mamagina imasis kantukovs wamatan Yowbad, ilivans;

12 Ilansa, “Eimen. DaYowbads waseg, anilivan bwanabwein, nakamnat, o ansinap, o nasiwa̱youb, o yakawanan, o natawtoun avakaein, bises bisigeg-wan. Eimen.”

13 Tamwey teitan mo idibakeig, ilana, “Kalisiy tasiyas asikweim pwapwa̱kaw? O avanuy meinoy nimeis?”

14 Akatimop anilivan, alana, “O, tamwey, adok ya̱koum kukwakin.”

Mo idibakeig, ilana, “Tasiyas nilisawes abes singay kalbaleb, niwidis asikweim La̱miy buya̱vin waseg mo ilapupwa̱kaw tonen.

15 “Mapuna nisesus wamatan Yowbad nakabsis ikannawes aygan yam waseg o boug waseg wanbunatum tonen; o Towen wanakabsis siney tasiyas nissikes-yay, bimtakavates.

16 “Nag beivag vayuwein asimoun o asidak, nag; ka̱las avakaein nag bilapulikas wous, o kov avakaein nag bilamyamuy wous; nag.

17 “Tage La̱miy towen Yowbad nakabsis wanuwan misik, mtowen imtakavates, mamagina tamtakavatein alen bimtakavates tasiyas, bikatimlakes va̱gan beimoums yevagam towen ibwabwab mwamov silma̱nin; o Yowbad mo bitanob mitingis.”

Copyright information for `MYW