Romans 10

Sigwey, singay sivinag Yowbad bikatinabwes tasiyas min-Yisleil, aninitoug Yowbad waseg pines tasiyas.

Akakin iseiw nuwes silma̱nin Yowbad, tage tatagouwaws tasiyas.

Nag ikakins sinap didumwal meinoy neim Yowbad waseg, mo iyokons kid biva̱ges tatineis asisinap didumwal; tage nag itams Yowbad ansinap didumwal waseg.

Peinan Kelis mwana neim, bo iyakous Moses nakaleiwag va̱gan kid bikidumwal adsinaps ya̱kids, peinan tasimounids waseg.

Yowbad bikatinabwes ven babaw gimgilis

Moses nilel mamagina:

“Kukin kal bikanow kaleiwag towen, mwamovan mo biban waseg.”
Tage bitasimounid waseg Yowbad va̱gan bikidumwa̱luds, inakaleiwag kweitan; ilana, “Awoum kuninuways ‘Kal bein walba̱lab?’” (mamagina Kelis bitatok bitamey watinow).

“Awoum kuninuways ‘Kal beibus bein wanuwan leg?’” (mamagina bitayakit Kelis, kanig waseg). “Awoum.”

Tage ilana, “Livan towen nises, wawdoumiy o waninoumiy.” Livan towen mamagina simounid liva̱nen, waseg nakageiguy.

Kukin bitatam wadoud daGuyaws Yeisuw waseg, o wananoud bitasimounid peinan Yowbad iyakit kanig waseg, e, Yowbad mo bikatinabweid.

10 Gamag ya̱kid nanoud bitasimounid, Yowbad mo bikidumwal adsinap; o bitatam wadoud waseg mo bikatinabweid.

11 Liva̱nen nises Bukitab waseg, mamagina:

“Nag kal bisimounid waseg towen, mo beivag anmwasin, nag.”
12 Nag ilivis min-Yudiy palatan, ven mwasanin gimgilis palatan, nag. Babaw ya̱kids daGuyaws kanatok-wan. Magat bitanitoug waseg mo bisiwyoubud bwein.

13 Adbabaws-wan bitadouws daGuyaws wayagan, mo bikatinabweids.

14 Tage gamag mwasanin ta-ma̱wan bidawes yagan, peinan nag isimounids waseg. Ta-ma̱wan bisimounids peinan nag ikakins yagan. Nag ikakins yagan, peinan tageiguy nag.

15 Kukin go bikayabes tageiguys, mo binekes, biliganes, bisimounids mo bidawes yagan o bikatinabwes. Liva̱nen tageiguy nises mamagina:

“Adbwabwals singay bwein peinan igeiguys livan bwanabwein waseg!”
16 Tage babaw gamag nag itams waseg livan towen bwanabwein. Isaya anilivan kweiboug mamagina:

“O Guyaw nag kavel isimounid agulivan waseg.”
17 Tage bigeiguys liva̱nen Kelis mo biliganes mwasanin, bisimounids.

18 Tage bulagan inekes, tan? Magen! Liva̱nen nises mamagina:

“Ages bo iliganes ven babaw wasigeis.
Asilivan bo ikatiliganes ven babaw wadaban pwepway.”
19 Tage min-Yisleil nag ikakins. Wanamug Moses anilivan mamagina:

“Igaw min-Yisleil yakamiy bukukines makava gamag mwasanin, mo bavag dibamiy bimouvit.
Bod tasiyas tabla̱bols bukukines, mo bavag bikapasal nuwamiy min-Yisleil yakamiy.”
20 Wankuyeim Isaya ikatiginaney, ilel Yowbad anilivan mamagina:

“Tasiyas nag ineveigs tage bo iba̱neigs.
Tasiyas nag ikatugwans silma̱nin yey mo akamat wasigeis.”
21 Tage liva̱nen min-Yisleil ilel mamagina:

“Tut babaw adudouw wasigeis gungamag tasiyas takapidabs o takakons;
adudouw, bo nag.”
Copyright information for `MYW