Romans 15

Bitalabes sidayas

Ya̱kids magat bitasimounids bwein, kadiloka bitalabes tasiyas tougweys. Awoum ya̱kids nanoud tatoneids bitavag.

Tatanok tatanok ya̱kids kadiloka bitalabes sidayas, aveiyag sivines va̱gan bikatimweisis asisinap beibwein.

Kelis-vak nag tatonena nanon iwtel, nag. Liva̱nen Bukitab waseg nises, peinan idibek Yowbad mamagina:

“Peinan ivtokeims livan mamagina bo iyagageigs yey.”
Bukitab anilivan tasiyas nileles kweiboug-o. Bo ileles va̱gan bikatimlakeids, mo bitakaptuleids, o livan towen biguyeids mo bitanamis Yowbad waseg.

Yowbad waseg kapatul nises son geiguy. Sivinag Yowbad bilabeimiy mo bukumsamwas simsimiyas singay bwein, ma̱wan Yeisuw Kelis nanon.

E, mo beivag ninoumiy katanok o amilivan katanok, waseg bukuyakawanes Yowbad, mtowen daGuyaws Yeisuw Kelis taman.

Kadiloka bukuta̱meimiy simsimiyas amibwabwal yakamiy, ma̱wan Kelis nita̱meimiy, yakawanan Yowbad silma̱nin.

Adibakeimiy mamagina: Kelis bo imlavag min-Yudiy sitouwat, peinan Yowbad nilivnek mounid wasigeis tammwayas, ilana,

“Igaw mo baw balabeimiy o balabes tobwag ven gimgilis peinan inok nuwag tasiyas.”
E, tasiyas mo biyakawanes Yowbad. Liva̱nen nises Bukitab waseg mamagina:

“Mapuna bakakavasim sigwayas tobwag ven gimgilis, o yagan waseg bakanuwel.”
10 Kweitan livan nises mamagina:

“Kumwa̱saws tobwag ven gimgilis yakamiy,
simiyas Yowbad inagamag.”
11 Kweitan livan-vak:

“Kukwavasis daGuyaws, tobwag ven gimgilis yakamiy. E, kadiloka gamag babaw bikavasis.”
12 Isaya anilivan-vak mamagina:

“Yeisuw delen igaw mo beim, mtowen bitamanaw bikaleiwag tobwag ven gimgilis wasigeis. E, tasiyas mo binnamis waseg.”
13 Nitannamis waseg Yowbad. Ivag sivinag bukusimounids waseg, va̱gan namis bivakaein wasigeis yakamiy mo beitaw nuwamiy o bukumwa̱saws. E, Kululuwan Towen Bwanabwein bikatimweis minamis singay bivakaein.

Pawl inawotet

14 Sigwey yakamiy, mounid akakin amisinap bwein, tawtoun, o kadilokeimiy sinap kwatimlakes simiyas.

15 Tage agulivan tawtoun mwasanin bo alel wamilet towen waseg, va̱gan bukuninuways. Yowbad bo isiwyoubug va̱gan bakokew sinapun Yeisuw Kelis banuwakes ven babaw gimgilis wasigeis. Gunawotet ma̱wana tanuwagan lun, akokew Yowbad anilivan bwanabwein assekeimiy ven babaw gimgilis yakamiy, bukumlavags ma̱wan lun bulukwan. E, Yowbad mo bikalin nuwan wasigeis yakamiy, peinan Kululuwan Bwanabwein biwekeimiy mo bukwamnats.

17 Yeisuw Kelis waseg yey, gunawotet towen silma̱nin Yowbad. Kadiloka beimwan woug peinan.

18 Agulivan bitawtoun sinap katanok waseg. Nag kwayuwein livan bakaypom. Misinaka Kelis iwotet waseg yey mo ven babaw gimgilis itams waseg, isimounids waseg o ikanawes aygan. Kelis nilabeig natawtoun waseg, mo ageiguy o awotet tawtoun, mamagina naman mulin Yowbad, o Yowbad kululuwan ikimtuweig. E, Kelis waseg yey, gunawotet bo ageiguy liva̱nen Yeisuw vena babaw ikous. Asilamaw Yelusalem, aninoun ven babaw ee... Ililikam. Ma̱yum yay.

20 Peinan nanoug bo ma̱wan. Awoum bageiguy ven tasiyas ikakins Kelis liva̱nen. Kadiveiyov ven wasigeis bo ageiguy. Kukin teitan gamag bikelay kakol, awoum yey wululay basen wakunuwatan. Awoum ban ageiguy ven tasiyas bo ikakins.

21 Liva̱nen gunawotet nises Bukitab waseg, mamagina:

“Liva̱nen towen nag kal idibakes,
tage bikines mo bikakins.”

Sivinan bikin Lom

22 Gunawotet ven tasiyas wasigeis singay babaw. Ta-ma̱wan baw bakineimiy.

23 Bweilim babaw nein wankuyeim sivinag baw, bo nag. Tage tut towen gunawotet bo ayakous ven tasiyas.

24 Igaw bakilev ban Spein wanamugwa ba̱lug wamiven bakineimiy, bitamsamwas sigwey yakamiy tut kayakus waseg, mo kutaneigs ba̱kuk ban Spein.

25 Nagein gog ga banow muloul silma̱nin tasiyas tayakelesiys ven Yelusalem.

26 Tasiyas min-Masidoniy sisiyas min-Akay sivines, mo imulouls pines tasiyas tasimavs tayakelesiys nisesus Yelusalem. Peinan ninous ma̱wan. E, kadiloka bimulouls wasigeis min-Yelusalem peinan min-Yudiy yakamey nakakow liva̱nen Kelis nakasekes ven babaw gimgilis, va̱gan bimwa̱saws. E, kadiloka ven babaw gimgilis bilabes tasiyas simoney waseg.

28 E, bakow simuloul towen, banow basekes, mo baw balakwaneimiy beikous, mo bakilev ban Spein.

29 Yey akakin igaw mo baw waseg Kelis nasiwa̱youb avakaein mo bitamwa̱saws sigwey yakamiy.

30 Aguyeimiy sigwey, daGuyaws Yeisuw Kelis waseg, o Kululuwan nasiwa̱youb waseg, kadiloka bitatawtouns sigwey yakamiy, bitannitougs waseg Yowbad. E, sigwey, kunitougs peinag, va̱gan Yowbad bikatinabweig. Peinan min-Yudiy tasiyas tapiyavein Kelis sivines kid biyagageigs. E, kunitougs peinag va̱gan tasiyas tayakelesiys Yelusalem mo bikalin nuwes waseg muloul towen; awoum ge bipiyaves.

32 E, kuntougis Yowbad bikaliyow gunaked mo baw, mwa̱saw waseg. Magat Yowbad nanon ma̱wan mo beibwein amnag sigwey yakamiy.

33 DaYowbads waseg niwal nises. Mtowen simiy yakamiy mo beitaw nuwamiy. Eimen.

Copyright information for `MYW