Romans 8

Yowbad Kululuwan iyamoveids

Magat ya̱kids waseg Yeisuw Kelis bitases, Yowbad ta-ma̱wan biyateleid.

Yowbad Kululuwan iyamoveids ya̱kids sods Kelis. Kululuwan kaleiwag-nen bo ilikud waseg sinap kalbaleb inakaleiwag va̱gan nag bitakanig.

Yowbad kadilok wotet towen, Moses nakaleiwag nag kadilok bilabeids peinan wouds igwey. E, Yowbad nawotet towen, mamagina, Natun ikayeb neim, ikow kaleivin ma̱wana gamag takalbaleb ya̱kids; itawtoun waseg adsinaps kalbaleb, peinan won tonen imlavag mamagina lun bulukwan.

Iwotet ma̱wan va̱gan bitayakousis Moses nakaleiwag, peinan bo bitakanawes Yowbad Kululuwan nakaleiwag; wouds inakaleiwag awoum.

Kukin kal yakamiy bikanow woun nakaleiwag mo beivag sivinan woun wuliyougwan; kukin gog bikanow Yowbad Kululuwan nakaleiwag mo beivag sivinan Yowbad Kululuwan wuliyougwan.

Kukin beivag sivinad woud wuliyougwan mo bitakanig, tage kukin beivag sivinad Yowbad Kululuwan wuliyougwan, mwamovad mo bitaban son niwal.

Kukin kalisiy sivines wous wuliyougwan mo bikamliwes Yowbad, nag beitams Yowbad nakaleiwag waseg. E, ta-ma̱wan gamag tasiyas beitams Yowbad nakaleiwag waseg; o ta-ma̱wan Yowbad bikalin nuwan gamag tasiyas wasigeis, nag.

Peinan wous ikalawages tatineis; yakamiy gog miked kweitan, peinan Kululuwan Yowbad simiy bikalawageimiy. Kal yak Kelis kululuwan ika̱bwag waseg yak, nag Kelis angamag ya̱koum, nag.

10 Tage Kelis niwekeimiy, woumiy bo imta̱mats waseg sinap kalbaleb, tage kululuwamiy imwamovs amisinap didumwal waseg.

11 Yowbad bo iyamov Yeisuw kanig waseg, mo Kululuwan Yowbad simiy nukusesus, woumiy Yowbad biyamov Kululuwan waseg, peinan nises wanuwamiy.

12 Sigwey, awoum bitawotets wouds wuta̱lan. Awoum bitakanawes wouds nakaleiwag. Ked towen beinoy bein kanig waseg. Tage kadiloka bitawotets Yowbad Kululuwan wuta̱lan; waseg bitakatimet wouds inawotet, mo bitamovs.

14 Kukin Yowbad Kululuwan bikaluwageid, mamagina Yowbad nitun ya̱kid; kukin nag bikaluwageid, tobwag gamag nitun ya̱kid.

15 Magat Yowbad nag bisekeids nanouds mamagina nitun ya̱kids, adok mo bivgavaw adpwa̱yats, mamagina natawwotet ya̱kids. Tage bo isekeids nanouds mamagina nitun tatonen, mo tadawes talansa, “Tamad.” (Aga-Ibliw waseg ilansa “Aba.”) Kululuwan tatonen nanon ma̱wana kululuwads ya̱kids, mo takakins Yowbad nitun ya̱kids.

17 O peinan Yowbad nitun ya̱kids mo bitakawes dakiyays. Yowbad bisekeids dakiyays sods Kelis, peinan a̱bads bigeg sods Kelis, yakawanads mo bitaba̱nes sods Kelis.

Tut wanakoug mo bitamwa̱saws

18 Nanoug ma̱wan. Adok a̱bads bigeg tut towen waseg, tage nag bivakaein mouvitan peinan singay bitamwa̱saws igaw tutan Yowbad yakawanan mo bitaba̱nes ya̱kids.

19 Yowbad nakabwabub meivek-wan ikayamat avei-tut Yowbad nitun bikamat waseg mtowen, mo bikines; e, singay sivines bikines.

20 Kweiboug bo iyamkwen inakabwabub. Nanon bo ma̱wan. Nanon nag inek youd tasiyas. Tage tasiyas inmises igaw bikatlow mo beibwein.

21 Tut towen nakabwabub babaw ipsa̱pwas. Nag kweitan youd bises bisigeg. Igaw Yowbad mo bilikus youd tasiyas; mo bisesus wamnat bimwa̱saws bisigagas, ma̱wan Yowbad nitun ya̱kids.

22 Taninuways peinan youd katanok katanok meiveka Yowbad nakabwabub nilidelids sigidaged waseg ee... tut towen bo ma̱wan.

23 Ya̱kids-vak bo ma̱wan talidelids. Yowbad Kululuwan anagin bo isilamaw wasigeis ya̱kids, tage nanouds waseg talidelids, takayamats avei-tut Yowbad bikanatun wasigeis ya̱kids mamagina bikatinob wouds ya̱kids.

24 E, bo ikatinabweids son danamis, peinan igaw wouds mo bikatuneib. Bitakin nawotet towen mo beikous danamis, peinan bo beitout nanoud.

25 Tut towen ya̱kids nag takines tage bitanmises, bitakaymates sona dakapatuls.

26 Yowbad Kululuwan ma̱wan ilabeids, peinan tougwey ya̱kids; nag takakins ama̱wan igaw bitanitougs waseg Yowbad, tage Yowbad Kululuwan tonen initoug peinads, singaya igel waseg Yowbad. Nag bitalivan!

27 Yowbad ikakina nanouds ya̱kids. E, mapuna Kululuwan nanon ikakin-wan, kululuwan tonen initoug peinads ya̱kids tayakelesiys ma̱wana Yowbad nanon.

28 Taninuways. Kukin nanoud waseg bitasiwyoubus Yowbad, mtowen mo bikaleiwag youd bwanabweins wasigeis ya̱kids, nidaweids, nitimek nanon wasigeis ya̱kids.

29 Kweiboug ikakin ya̱kids mo ikaleiwag va̱gan bitamlavags ma̱wana Natun ankakin tatonen; mtowen wanamug, budan ya̱kids wankuyeim.

30 E, kweiboug bo ikaluweg mo idaweids; idaweids mo ikidumwa̱luds; ikidumwa̱luds mo isekeids yakawanads.

Yowbad nasiwa̱youb

31 Adok livan towen bo misinak. Peinan Yowbad bilabeids, nag kal bisilbwadeids.

32 Nag ikayus Natun tatonen, tage bo itam peinads ya̱kids, igaw mo bisekeids youd babaw son Kelis.

33 Nag kal biyateleids peinan Yowbad bo ilivnek nagamag ya̱kids. Yowbad bo ikidumwa̱luds; nag kal biban adsinaps kalbaleb. Yeisuw Kelis nikanig mo ikit vayuwein, mtowen misikey Yowbad wanaka̱tay, ininitoug kid peinads ya̱kids.

35 Nag aveiyag kadilok bisilbwed Kelis nasiwa̱youb wasigeis ya̱kids. Takinew gamag biyagageids, o bikamliweids; takinew beivag adamouns, o bitamwadoys, o bitakatouns; takinew gamag beiweids; nag gog.

36 Liva̱nen nises Bukitab waseg mamagina:

“Mugwamag yakamey, bo iwawemas,
bakamta̱mat yam katanok katanok.
Yakamey mamagina mansiyas sip, yakamey;
idokes beiwemas mo bigabumas.”
37 E, a̱bad bigeg youd katanok katanok waseg, tage mtowen nisiwyoubuds ilabeids mo tatakayways singay.

38 Mounid akakin nag aveiyag bigidem Yowbad nasiwa̱youb wasigeis ya̱kids. Ya̱kids bitasesusa bwein; takinew bitakanig, o takinew tamwamov, takinew Seitan siney nagamag biyagageids, o aveiyag binuwakeids tut towen o takinew tut wanakougwaw; takinew takaleiwags mwasanin biyagageids, o bikaweid binaweid wanakaew, o takinew bigimkuluds wabwanit; peinan nag aveiyag nises son natawtoun va̱gan bigidem Yowbad nasiwa̱youb wasigeis ya̱kids, nag. Nasiwa̱youb towen singay avakaein daGuyaws Yeisuw Kelis nisekeids.

Copyright information for `MYW