Titus 3

Wotet bwanabwein

Kuguyes, kulana, “Kunuways gabman sikaleiwag, kwanawes. Kutams waseg wotet babaw bwanabwein. Awoum kuyagays. Awoum kwamnimans. Tage bweina bukuyama̱nums. Gamag babaw bukuvna̱ses beibwein.”

Kweiboug ya̱kids tadadubs, takapidabs ya̱kids. Idakeds kalbaleb peinan advikeiys nikaliwageids, nitamwa̱saws sinap kalbaleb waseg. Yam katanok katanok imouvit dabads, peinan gamag mwasanin nikamliweids, o ya̱kids-vak nitakamliwes.

Tage Yowbad bo inok nuwan ya̱kids, nasiwa̱youb mo ikamat va̱gan kid bikatinabweids.

Ikatinabweids, nag peinan dawotets didumwal, nag. Misinak ikalin nuwan, mo isiwyoubuds; iwid adsinaps kweiboug, kweivaw nisekeids Kululuwan Bwanabwein waseg.

E, Yeisuw Kelis nikatinabweids dakalbalebs waseg, Yowbad Kululuwan mo ikatimweis ivakaein wasigeis ya̱kids, va̱gan bikidumwa̱luds, nasiwa̱youb tonen waseg, mo bitasiws wanuwan Yowbad nakabkaleiwag, peinan bo tanmises mwamovads bises bisigeg.

Livan towen mounid-wan. Sivinag ya̱koum mutawtoun waseg livan towen kudibakes simwey. Tasiyas nisimounids Yowbad waseg biliganes mo bininuways aw-wotet bwein biwteles. Sinap towen bwanabwein va̱gan bilabes gamag.

Awoum kutita̱kuds mav mo kwamnimans, Moses nakaleiwag liva̱nen, o tammwayas livnes. Awoum bukwata̱yegs mav. Kamniman tasiyas nag bilabeimiy, nag.

10 Kukin kal sivinan bikamniman mav, kukwan sivtanok o sivay. Magat bika̱kin matan bo bwein. Kukin gog nag, kupiyev kalbaleb gamag towen, tapiyavein kaleiwag. Tatonena ikakin ansinap kalbaleb.

Kaleiwag mwasanin

12 Takinew bakayeb Atimas o adok Tukik igaw biwekeim. Biwekeim mo kunuwanaw kum, kumekeig yey ven Nikopol waseg, peinan nanoug ma̱wan bulbeilim waseg bweina basesuna Nikopol.

13 Denas son Apolos simwey nukusesus. Mtowen Denas ikakin ya̱tal sinapun. Nuwanaw kutanes tasiyas asteiy bimeis. Awoum aveiyag bika̱bwag wasigeis tasiyas.

14 Kwatimlakes dagamags va̱gan bikakins wotet bwanabwein biwteles, mo bilabes tasiyas kalisiy abes igeg. Awoum bisimavs; awoum.

15 Tasiyas sigwey nakases asilivan siwa̱youb waseg ya̱koum. Amalivan siwa̱youb wasigeis Yeisuw nagamag tasiyas nisiwyoubuds. Mtowen Yeisuw bisiwyoubumiy yakamiy.

Yey Pawl.

Copyright information for `MYW