Job 23

וַיַּעַן אִיּוֹב וַיֹּאמַֽר׃
גַּם־הַיּוֹם מְרִי שִׂחִי
יָדִי כָּבְדָה עַל־אַנְחָתִֽי׃
מִֽי־יִתֵּן יָדַעְתִּי וְאֶמְצָאֵהוּ
אָבוֹא עַד־תְּכוּנָתֽוֹ׃
אֶעֶרְכָה לְפָנָיו מִשְׁפָּט
וּפִי אֲמַלֵּא תוֹכָחֽוֹת׃
אֵדְעָה מִלִּים יַעֲנֵנִי
וְאָבִינָה מַה־יֹּאמַר לִֽי׃
הַבְּרׇב־כֹּחַ יָרִיב עִמָּדִי
לֹא אַךְ־הוּא יָשִׂם בִּֽי׃
שָׁם יָשָׁר נוֹכָח עִמּוֹ
וַאֲפַלְּטָה לָנֶצַח מִשֹּׁפְטִֽי׃
הֵן קֶדֶם אֶהֱלֹךְ וְאֵינֶנּוּ
וְאָחוֹר וְֽלֹא־אָבִין לֽוֹ׃
שְׂמֹאול בַּעֲשֹׂתוֹ וְלֹא־אָחַז
יַעְטֹף יָמִין וְלֹא אֶרְאֶֽה׃
10  כִּֽי־יָדַע דֶּרֶךְ עִמָּדִי
בְּחָנַנִי כַּזָּהָב אֵצֵֽא׃
11  בַּאֲשֻׁרוֹ אָחֲזָה רַגְלִי
דַּרְכּוֹ שָׁמַרְתִּי וְלֹא־אָֽט׃
12  מִצְוַת שְׂפָתָיו וְלֹא אָמִישׁ
מֵחֻקִּי צָפַנְתִּי אִמְרֵי־פִֽיו׃
13  וְהוּא בְאֶחָד וּמִי יְשִׁיבֶנּוּ
וְנַפְשׁוֹ אִוְּתָה וַיָּֽעַשׂ׃
14  כִּי יַשְׁלִים חֻקִּי
וְכָהֵנָּה רַבּוֹת עִמּֽוֹ׃
15  עַל־כֵּן מִפָּנָיו אֶבָּהֵל
אֶתְבּוֹנֵן וְאֶפְחַד מִמֶּֽנּוּ׃
16  וְאֵל הֵרַךְ לִבִּי
וְשַׁדַּי הִבְהִילָֽנִי׃
17  כִּֽי־לֹא נִצְמַתִּי מִפְּנֵי־חֹשֶׁךְ
וּמִפָּנַי כִּסָּה־אֹֽפֶל׃

Copyright information for MapM