Proverbs 11

מֹאזְנֵי מִרְמָה תּוֹעֲבַת יְהֹוָה
וְאֶבֶן שְׁלֵמָה רְצוֹנֽוֹ׃
בָּֽא־זָדוֹן וַיָּבֹא קָלוֹן
וְֽאֶת־צְנוּעִים חׇכְמָֽה׃
תֻּמַּת יְשָׁרִים תַּנְחֵם
וְסֶלֶף בֹּגְדִים ושדם יְשָׁדֵּֽם׃
לֹא־יוֹעִיל הוֹן בְּיוֹם עֶבְרָה
וּצְדָקָה תַּצִּיל מִמָּֽוֶת׃
צִדְקַת תָּמִים תְּיַשֵּׁר דַּרְכּוֹ
וּבְרִשְׁעָתוֹ יִפֹּל רָשָֽׁע׃
צִדְקַת יְשָׁרִים תַּצִּילֵם
וּבְהַוַּת בֹּגְדִים יִלָּכֵֽדוּ׃
בְּמוֹת אָדָם רָשָׁע תֹּאבַד תִּקְוָה
וְתוֹחֶלֶת אוֹנִים אָבָֽדָה׃
צַדִּיק מִצָּרָה נֶחֱלָץ
וַיָּבֹא רָשָׁע תַּחְתָּֽיו׃
בְּפֶה חָנֵף יַשְׁחִת רֵעֵהוּ
וּבְדַעַת צַדִּיקִים יֵחָלֵֽצוּ׃
10  בְּטוּב צַדִּיקִים תַּעֲלֹץ קִרְיָה
וּבַאֲבֹד רְשָׁעִים רִנָּֽה׃
11  בְּבִרְכַּת יְשָׁרִים תָּרוּם קָרֶת
וּבְפִי רְשָׁעִים תֵּהָרֵֽס׃
12  בׇּז־לְרֵעֵהוּ חֲסַר־לֵב
וְאִישׁ תְּבוּנוֹת יַחֲרִֽישׁ׃
13  הוֹלֵךְ רָכִיל מְגַלֶּה־סּוֹד
וְנֶאֱמַן־רוּחַ מְכַסֶּה דָבָֽר׃
14  בְּאֵין תַּחְבֻּלוֹת יִפׇּל־עָם
וּתְשׁוּעָה בְּרֹב יוֹעֵֽץ׃
15  רַע־יֵרוֹעַ כִּי־עָרַב זָר
וְשֹׂנֵא תֹקְעִים בּוֹטֵֽחַ׃
16  אֵֽשֶׁת־חֵן תִּתְמֹךְ כָּבוֹד
וְעָרִיצִים יִתְמְכוּ־עֹֽשֶׁר׃
17  גֹּמֵל נַפְשׁוֹ אִישׁ חָסֶד
וְעֹכֵר שְׁאֵרוֹ אַכְזָרִֽי׃
18  רָשָׁע עֹשֶׂה פְעֻלַּת־שָׁקֶר
וְזֹרֵעַ צְדָקָה שֶׂכֶר אֱמֶֽת׃
19  כֵּן־צְדָקָה לְחַיִּים
וּמְרַדֵּף רָעָה לְמוֹתֽוֹ׃
20  תּוֹעֲבַת יְהֹוָה עִקְּשֵׁי־לֵב
וּרְצוֹנוֹ תְּמִימֵי דָֽרֶךְ׃
21  יָד לְיָד לֹא־יִנָּקֶה רָּע
וְזֶרַע צַדִּיקִים נִמְלָֽט׃
22  נֶזֶם זָהָב בְּאַף חֲזִיר
אִשָּׁה יָפָה וְסָרַת טָֽעַם׃
23  תַּאֲוַת צַדִּיקִים אַךְ־טוֹב
תִּקְוַת רְשָׁעִים עֶבְרָֽה׃
24  יֵשׁ מְפַזֵּר וְנוֹסָף עוֹד
וְחֹשֵׂךְ מִיֹּשֶׁר אַךְ־לְמַחְסֽוֹר׃
25  נֶֽפֶשׁ־בְּרָכָה תְדֻשָּׁן
וּמַרְוֶה גַּם־הוּא יוֹרֶֽא׃
26  מֹנֵֽעַ בָּר יִקְּבֻהוּ לְאוֹם
וּבְרָכָה לְרֹאשׁ מַשְׁבִּֽיר׃
27  שֹׁחֵֽר טוֹב יְבַקֵּשׁ רָצוֹן
וְדֹרֵשׁ רָעָה תְבוֹאֶֽנּוּ׃
28  בּוֹטֵחַ בְּעׇשְׁרוֹ הוּא יִפּוֹל
וְכֶעָלֶה צַדִּיקִים יִפְרָֽחוּ׃
29  עֹכֵר בֵּיתוֹ יִנְחַל־רוּחַ
וְעֶבֶד אֱוִיל לַֽחֲכַם־לֵֽב׃
30  פְּֽרִי־צַדִּיק עֵץ חַיִּים
וְלֹקֵחַ נְפָשׁוֹת חָכָֽם׃
31  הֵן צַדִּיק בָּאָרֶץ יְשֻׁלָּם
אַף כִּֽי־רָשָׁע וְחוֹטֵֽא׃

Copyright information for MapM