Psalms 121

שִׁיר לַֽמַּעֲלוֹת
אֶשָּׂא עֵינַי אֶל־הֶהָרִים
מֵאַיִן יָבֹא עֶזְרִֽי׃
עֶזְרִי מֵעִם יְהֹוָה
עֹשֵׂה שָׁמַיִם וָאָֽרֶץ׃
אַל־יִתֵּן לַמּוֹט רַגְלֶךָ
אַל־יָנוּם שֹׁמְרֶֽךָ׃
הִנֵּה לֹֽא־יָנוּם וְלֹא יִישָׁן
שׁוֹמֵר יִשְׂרָאֵֽל׃
יְהֹוָה שֹׁמְרֶךָ
יְהוָה צִלְּךָ עַל־יַד יְמִינֶֽךָ׃
יוֹמָם הַשֶּׁמֶשׁ לֹֽא־יַכֶּכָּה
וְיָרֵחַ בַּלָּֽיְלָה׃
יְֽהֹוָה יִשְׁמׇרְךָ מִכָּל־רָע
יִשְׁמֹר אֶת־נַפְשֶֽׁךָ׃
יְֽהֹוָה יִשְׁמׇר־צֵאתְךָ וּבוֹאֶךָ
מֵעַתָּה וְעַד־עוֹלָֽם׃

Copyright information for MapM