Psalms 122

שִׁיר הַֽמַּעֲלוֹת לְדָוִד
שָׂמַחְתִּי בְּאֹמְרִים לִי
בֵּית יְהֹוָה נֵלֵֽךְ׃
עֹמְדוֹת הָיוּ רַגְלֵינוּ
בִּשְׁעָרַיִךְ יְרוּשָׁלָֽ‍ִם׃
יְרוּשָׁלַ‍ִם הַבְּנוּיָה
כְּעִיר שֶׁחֻבְּרָה־לָּהּ יַחְדָּֽו׃
שֶׁשָּׁם עָלוּ שְׁבָטִים שִׁבְטֵי־יָהּ
עֵדוּת לְיִשְׂרָאֵל
לְהֹדוֹת לְשֵׁם יְהֹוָֽה׃
כִּי שָׁמָּה ׀ יָשְׁבוּ כִסְאוֹת לְמִשְׁפָּט
כִּסְאוֹת לְבֵית דָּוִֽד׃
שַׁאֲלוּ שְׁלוֹם יְרוּשָׁלָ‍ִם
יִשְׁלָיוּ אֹהֲבָֽיִךְ׃
יְהִי־שָׁלוֹם בְּחֵילֵךְ
שַׁלְוָה בְּאַרְמְנוֹתָֽיִךְ׃
לְמַעַן אַחַי וְרֵעָי
אֲדַבְּרָה־נָּא שָׁלוֹם בָּֽךְ׃
לְמַעַן בֵּית־יְהֹוָה אֱלֹהֵינוּ
אֲבַקְשָׁה טוֹב לָֽךְ׃

Copyright information for MapM