Psalms 125

שִׁיר הַֽמַּעֲלוֹת
הַבֹּטְחִים בַּיהֹוָה
כְּֽהַר־צִיּוֹן לֹא־יִמּוֹט לְעוֹלָם יֵשֵֽׁב׃
יְֽרוּשָׁלַ‍ִם הָרִים סָבִיב לָהּ
וַיהֹוָה סָבִיב לְעַמּוֹ
מֵעַתָּה וְעַד־עוֹלָֽם׃
כִּי לֹא יָנוּחַ שֵׁבֶט הָרֶשַׁע
עַל גּוֹרַל הַֽצַּדִּיקִים
לְמַעַן לֹא־יִשְׁלְחוּ הַצַּדִּיקִים בְּעַוְלָתָה
יְדֵיהֶֽם׃
הֵיטִיבָה יְהֹוָה לַטּוֹבִים
וְלִישָׁרִים בְּלִבּוֹתָֽם׃
וְהַמַּטִּים עֲֽקַלְקַלּוֹתָם
יוֹלִיכֵם יְהֹוָה אֶת־פֹּעֲלֵי הָאָוֶן
שָׁלוֹם עַל־יִשְׂרָאֵֽל׃

Copyright information for MapM