Psalms 128

שִׁיר הַֽמַּעֲלוֹת
אַשְׁרֵי כׇּל־יְרֵא יְהֹוָה
הַהֹלֵךְ בִּדְרָכָֽיו׃
יְגִיעַ כַּפֶּיךָ כִּי תֹאכֵל
אַשְׁרֶיךָ וְטוֹב לָֽךְ׃
אֶשְׁתְּךָ ׀ כְּגֶפֶן פֹּרִיָּה בְּיַרְכְּתֵי בֵיתֶךָ
בָּנֶיךָ כִּשְׁתִלֵי זֵיתִים
סָבִיב לְשֻׁלְחָנֶֽךָ׃
הִנֵּה כִי־כֵן יְבֹרַךְ גָּבֶר
יְרֵא יְהֹוָֽה׃
יְבָרֶכְךָ יְהֹוָה מִצִּיּוֹן
וּרְאֵה בְּטוּב יְרוּשָׁלָ‍ִם כֹּל יְמֵי חַיֶּֽיךָ׃
וּרְאֵֽה־בָנִים לְבָנֶיךָ
שָׁלוֹם עַל־יִשְׂרָאֵֽל׃

Copyright information for MapM