Psalms 13

לַמְנַצֵּחַ מִזְמוֹר לְדָוִֽד׃
עַד־אָנָה יְהֹוָה תִּשְׁכָּחֵנִי נֶצַח
עַד־אָנָה ׀ תַּסְתִּיר אֶת־פָּנֶיךָ מִמֶּֽנִּי׃
עַד־אָנָה אָשִׁית עֵצוֹת בְּנַפְשִׁי
יָגוֹן בִּלְבָבִי יוֹמָם
עַד־אָנָה ׀ יָרוּם אֹיְבִי עָלָֽי׃
הַבִּיטָֽה עֲנֵנִי יְהֹוָה אֱלֹהָי
הָאִירָה עֵינַי פֶּן־אִישַׁן הַמָּֽוֶת׃
פֶּן־יֹאמַר אֹיְבִי יְכׇלְתִּיו
צָרַי יָגִילוּ כִּי אֶמּֽוֹט׃
וַאֲנִי ׀ בְּחַסְדְּךָ בָטַחְתִּי
יָגֵל לִבִּי בִּֽישׁוּעָתֶךָ
אָשִׁירָה לַֽיהֹוָה
כִּי גָמַל עָלָֽי׃

Copyright information for MapM