Psalms 137

עַל נַהֲרוֹת ׀ בָּבֶל
שָׁם יָשַׁבְנוּ גַּם־בָּכִינוּ
בְּזׇכְרֵנוּ אֶת־צִיּֽוֹן׃
עַֽל־עֲרָבִים בְּתוֹכָהּ
תָּלִינוּ כִּנֹּרוֹתֵֽינוּ׃
כִּי שָׁם שְֽׁאֵלוּנוּ שׁוֹבֵינוּ דִּבְרֵי־שִׁיר
וְתוֹלָלֵינוּ שִׂמְחָה
שִׁירוּ לָנוּ מִשִּׁיר צִיּֽוֹן׃
אֵיךְ נָשִׁיר אֶת־שִׁיר־יְהֹוָה
עַל אַדְמַת נֵכָֽר׃
אִֽם־אֶשְׁכָּחֵךְ יְֽרוּשָׁלָ‍ִם
תִּשְׁכַּח יְמִינִֽי׃
תִּדְבַּֽק־לְשׁוֹנִי ׀ לְחִכִּי
אִם־לֹא אֶזְכְּרֵכִי
אִם־לֹא אַעֲלֶה אֶת־יְרוּשָׁלַ‍ִם
עַל רֹאשׁ שִׂמְחָתִֽי׃
זְכֹר יְהֹוָה ׀ לִבְנֵי אֱדוֹם
אֵת יוֹם יְֽרוּשָׁלָ‍ִם
הָאֹמְרִים עָרוּ ׀ עָרוּ
עַד הַיְסוֹד בָּֽהּ׃
בַּת־בָּבֶל הַשְּׁדוּדָה
אַשְׁרֵי שֶׁיְשַׁלֶּם־לָךְ
אֶת־גְּמוּלֵךְ שֶׁגָּמַלְתְּ לָֽנוּ׃
אַשְׁרֵי ׀ שֶׁיֹּאחֵז וְנִפֵּץ אֶֽת־עֹלָלַיִךְ
אֶל־הַסָּֽלַע׃

Copyright information for MapM