Psalms 140

לַמְנַצֵּחַ מִזְמוֹר לְדָוִֽד׃
חַלְּצֵנִי יְהֹוָה מֵֽאָדָם רָע
מֵאִישׁ חֲמָסִים תִּנְצְרֵֽנִי׃
אֲשֶׁר חָשְׁבוּ רָעוֹת בְּלֵב
כׇּל־יוֹם יָגוּרוּ מִלְחָמֽוֹת׃
שָׁנְנוּ לְשׁוֹנָם כְּֽמוֹ־נָחָשׁ
חֲמַת עַכְשׁוּב
תַּחַת שְׂפָתֵימוֹ סֶֽלָה׃
שׇׁמְרֵנִי יְהֹוָה ׀ מִידֵי רָשָׁע
מֵאִישׁ חֲמָסִים תִּנְצְרֵנִי
אֲשֶׁר חָשְׁבוּ לִדְחוֹת פְּעָמָֽי׃
טָמְנֽוּ גֵאִים ׀ פַּח לִי
וַחֲבָלִים פָּרְשׂוּ רֶשֶׁת לְיַד־מַעְגָּל
מֹקְשִׁים שָׁתוּ־לִי סֶֽלָה׃
אָמַרְתִּי לַיהֹוָה אֵלִי אָתָּה
הַאֲזִינָה יְהֹוָה קוֹל תַּחֲנוּנָֽי׃
יֱהֹוִה אֲדֹנָי עֹז יְשׁוּעָתִי
סַכֹּתָה לְרֹאשִׁי בְּיוֹם נָֽשֶׁק׃
אַל־תִּתֵּן יְהֹוָה מַאֲוַיֵּי רָשָׁע
זְמָמוֹ אַל־תָּפֵק יָרוּמוּ סֶֽלָה׃
10 רֹאשׁ מְסִבָּי
עֲמַל שְׂפָתֵימוֹ יכסומו יְכַסֵּֽימוֹ׃
11 ימיטו יִמּוֹטוּ עֲלֵיהֶם גֶּחָלִים
בָּאֵשׁ יַפִּלֵם
בְּמַהֲמֹרוֹת בַּל־יָקֽוּמוּ׃
12 אִישׁ לָשׁוֹן בַּל־יִכּוֹן בָּאָרֶץ
אִישׁ־חָמָס רָע
יְצוּדֶנּוּ לְמַדְחֵפֹֽת׃
13 ידעת יָדַעְתִּי כִּֽי־יַעֲשֶׂה יְהֹוָה דִּין עָנִי
מִשְׁפַּט אֶבְיֹנִֽים׃
14 אַךְ צַדִּיקִים יוֹדוּ לִשְׁמֶךָ
יֵשְׁבוּ יְשָׁרִים אֶת־פָּנֶֽיךָ׃

Copyright information for MapM