Psalms 150

הַלְלוּ יָהּ ׀
הַֽלְלוּ־אֵל בְּקָדְשׁוֹ
הַֽלְלוּהוּ בִּרְקִיעַ עֻזּֽוֹ׃
הַלְלוּהוּ בִגְבוּרֹתָיו
הַלְלוּהוּ כְּרֹב גֻּדְלֽוֹ׃
הַלְלוּהוּ בְּתֵקַע שׁוֹפָר
הַלְלוּהוּ בְּנֵבֶל וְכִנּֽוֹר׃
הַלְלוּהוּ בְּתֹף וּמָחוֹל
הַֽלְלוּהוּ בְּמִנִּים וְעֻגָֽב׃
הַלְלוּהוּ בְצִלְצְלֵי־שָׁמַע
הַֽלְלוּהוּ בְּֽצִלְצְלֵי תְרוּעָֽה׃
כֹּל הַנְּשָׁמָה תְּהַלֵּל יָהּ
הַֽלְלוּ־יָֽהּ׃

Copyright information for MapM