Psalms 25

לְדָוִד
אֵלֶיךָ יְהֹוָה נַפְשִׁי אֶשָּֽׂא׃
אֱֽלֹהַי בְּךָ בָטַחְתִּי אַל־אֵבוֹשָׁה
אַל־יַעַלְצוּ אוֹיְבַי לִֽי׃
גַּם כָּל־קֹוֶיךָ לֹא יֵבֹשׁוּ
יֵבֹשׁוּ הַבּוֹגְדִים רֵיקָֽם׃
דְּרָכֶיךָ יְהֹוָה הוֹדִיעֵנִי
אֹרְחוֹתֶיךָ לַמְּדֵֽנִי׃
הַדְרִיכֵנִי בַאֲמִתֶּךָ ׀ וְֽלַמְּדֵנִי
כִּֽי־אַתָּה אֱלֹהֵי יִשְׁעִי
אוֹתְךָ קִוִּיתִי כׇּל־הַיּֽוֹם׃
זְכֹר־רַחֲמֶיךָ יְהֹוָה וַחֲסָדֶיךָ
כִּי מֵעוֹלָם הֵֽמָּה׃
חַטֹּאות נְעוּרַי ׀ וּפְשָׁעַי אַל־תִּזְכֹּר
כְּחַסְדְּךָ זְכׇר־לִי־אַתָּה
לְמַעַן טוּבְךָ יְהֹוָֽה׃
טוֹב־וְיָשָׁר יְהֹוָה
עַל־כֵּן יוֹרֶה חַטָּאִים בַּדָּֽרֶךְ׃
יַדְרֵךְ עֲנָוִים בַּמִּשְׁפָּט
וִילַמֵּד עֲנָוִים דַּרְכּֽוֹ׃
10 כׇּל־אׇרְחוֹת יְהֹוָה חֶסֶד וֶאֱמֶת
לְנֹצְרֵי בְרִיתוֹ וְעֵדֹתָֽיו׃
11 לְמַֽעַן־שִׁמְךָ יְהֹוָה
וְֽסָלַחְתָּ לַעֲוֺנִי כִּי רַב־הֽוּא׃
12 מִי־זֶה הָאִישׁ יְרֵא יְהֹוָה
יוֹרֶנּוּ בְּדֶרֶךְ יִבְחָֽר׃
13 נַפְשׁוֹ בְּטוֹב תָּלִין
וְזַרְעוֹ יִירַשׁ אָֽרֶץ׃
14 סוֹד יְהֹוָה לִירֵאָיו
וּבְרִיתוֹ לְהוֹדִיעָֽם׃
15 עֵינַי תָּמִיד אֶל־יְהֹוָה
כִּי הֽוּא־יוֹצִיא מֵרֶשֶׁת רַגְלָֽי׃
16 פְּנֵה־אֵלַי וְחׇנֵּנִי
כִּֽי־יָחִיד וְעָנִי אָֽנִי׃
17 צָרוֹת לְבָבִי הִרְחִיבוּ
מִמְּצוּקוֹתַי הוֹצִיאֵֽנִי׃
18 רְאֵה עׇנְיִי וַעֲמָלִי
וְשָׂא לְכׇל־חַטֹּאותָֽי׃
19 רְאֵֽה־אֹיְבַי כִּי־רָבּוּ
וְשִׂנְאַת חָמָס שְׂנֵאֽוּנִי׃
20 שׇׁמְרָה נַפְשִׁי וְהַצִּילֵנִי
אַל־אֵבוֹשׁ כִּֽי־חָסִיתִי בָֽךְ׃
21 תֹּם־וָיֹשֶׁר יִצְּרוּנִי
כִּי קִוִּיתִֽיךָ׃
22 פְּדֵה אֱלֹהִים אֶת־יִשְׂרָאֵל
מִכֹּל צָרוֹתָֽיו׃

Copyright information for MapM