Psalms 65

לַמְנַצֵּחַ מִזְמוֹר לְדָוִד שִֽׁיר׃
לְךָ דֻֽמִיָּה תְהִלָּה אֱלֹהִים בְּצִיּוֹן
וּלְךָ יְשֻׁלַּם־נֶֽדֶר׃
שֹׁמֵעַ תְּפִלָּה
עָדֶיךָ כׇּל־בָּשָׂר יָבֹֽאוּ׃
דִּבְרֵי עֲוֺנֹת גָּבְרוּ מֶנִּי
פְּשָׁעֵינוּ אַתָּה תְכַפְּרֵֽם׃
אַשְׁרֵי ׀ תִּבְחַר וּתְקָרֵב יִשְׁכֹּן חֲצֵרֶיךָ
נִשְׂבְּעָה בְּטוּב בֵּיתֶךָ
קְדֹשׁ הֵיכָלֶֽךָ׃
נוֹרָאוֹת ׀ בְּצֶדֶק תַּעֲנֵנוּ אֱלֹהֵי יִשְׁעֵנוּ
מִבְטָח כׇּל־קַצְוֵי־אֶרֶץ וְיָם רְחֹקִֽים׃
מֵכִין הָרִים בְּכֹחוֹ
נֶאְזָר בִּגְבוּרָֽה׃
מַשְׁבִּיחַ ׀ שְׁאוֹן יַמִּים
שְׁאוֹן גַּלֵּיהֶם
וַהֲמוֹן לְאֻמִּֽים׃
וַיִּירְאוּ ׀ יֹשְׁבֵי קְצָוֺת מֵאוֹתֹתֶיךָ
מוֹצָֽאֵי בֹקֶר וָעֶרֶב תַּרְנִֽין׃
10 פָּקַֽדְתָּ הָאָרֶץ וַתְּשֹׁקְקֶהָ רַבַּת תַּעְשְׁרֶנָּה
פֶּלֶג אֱלֹהִים מָלֵא מָיִם
תָּכִין דְּגָנָם כִּי־כֵן תְּכִינֶֽהָ׃
11 תְּלָמֶיהָ רַוֵּה נַחֵת גְּדוּדֶהָ
בִּרְבִיבִים תְּמֹגְגֶנָּה צִמְחָהּ תְּבָרֵֽךְ׃
12 עִטַּרְתָּ שְׁנַת טוֹבָתֶךָ
וּמַעְגָּלֶיךָ יִרְעֲפוּן דָּֽשֶׁן׃
13 יִרְעֲפוּ נְאוֹת מִדְבָּר
וְגִיל גְּבָעוֹת תַּחְגֹּֽרְנָה׃
14 לָבְשׁוּ כָרִים ׀ הַצֹּאן
וַעֲמָקִים יַֽעַטְפוּ־בָר
יִתְרוֹעֲעוּ אַף־יָשִֽׁירוּ׃

Copyright information for MapM