Psalms 70

לַמְנַצֵּחַ לְדָוִד לְהַזְכִּֽיר׃
אֱלֹהִים לְהַצִּילֵנִי
יְהֹוָה לְעֶזְרָתִי חֽוּשָׁה׃
יֵבֹשׁוּ וְיַחְפְּרוּ מְבַקְשֵׁי נַפְשִׁי
יִסֹּגוּ אָחוֹר וְיִכָּלְמוּ
חֲפֵצֵי רָעָתִֽי׃
יָשׁוּבוּ עַל־עֵקֶב בׇּשְׁתָּם
הָאֹמְרִים הֶאָח ׀ הֶאָֽח׃
יָשִׂישׂוּ וְיִשְׂמְחוּ ׀ בְּךָ כׇּֽל־מְבַקְשֶׁיךָ
וְיֹאמְרוּ תָמִיד יִגְדַּל אֱלֹהִים
אֹהֲבֵי יְשׁוּעָתֶֽךָ׃
וַאֲנִי ׀ עָנִי וְאֶבְיוֹן
אֱלֹהִים חוּשָׁה לִּי
עֶזְרִי וּמְפַלְטִי אַתָּה
יְהֹוָה אַל־תְּאַחַֽר׃

Copyright information for MapM