Psalms 76

לַמְנַצֵּחַ בִּנְגִינֹת מִזְמוֹר לְאָסָף שִֽׁיר׃
נוֹדָע בִּיהוּדָה אֱלֹהִים
בְּיִשְׂרָאֵל גָּדוֹל שְׁמֽוֹ׃
וַיְהִי בְשָׁלֵם סוּכּוֹ
וּמְעוֹנָתוֹ בְצִיּֽוֹן׃
שָׁמָּה שִׁבַּר רִשְׁפֵי־קָשֶׁת
מָגֵן וְחֶרֶב וּמִלְחָמָה סֶֽלָה׃
נָאוֹר אַתָּה אַדִּיר
מֵֽהַרְרֵי־טָֽרֶף׃
אֶשְׁתּֽוֹלְלוּ ׀ אַבִּירֵי לֵב נָמוּ שְׁנָתָם
וְלֹֽא־מָצְאוּ כׇל־אַנְשֵׁי־חַיִל יְדֵיהֶֽם׃
מִגַּעֲרָתְךָ אֱלֹהֵי יַעֲקֹב
נִרְדָּם וְרֶכֶב וָסֽוּס׃
אַתָּה ׀ נוֹרָא אַתָּה
וּמִֽי־יַעֲמֹד לְפָנֶיךָ
מֵאָז אַפֶּֽךָ׃
מִשָּׁמַיִם הִשְׁמַעְתָּ דִּין
אֶרֶץ יָֽרְאָה וְשָׁקָֽטָה׃
10 בְּקוּם־לַמִּשְׁפָּט אֱלֹהִים
לְהוֹשִׁיעַ כׇּל־עַנְוֵי־אֶרֶץ סֶֽלָה׃
11 כִּֽי־חֲמַת אָדָם תּוֹדֶךָּ
שְׁאֵרִית חֵמֹת תַּחְגֹּֽר׃
12 נִדְרוּ וְשַׁלְּמוּ לַיהֹוָה אֱֽלֹהֵיכֶם
כׇּל־סְבִיבָיו
יֹבִילוּ שַׁי לַמּוֹרָֽא׃
13 יִבְצֹר רוּחַ נְגִידִים
נוֹרָא לְמַלְכֵי־אָֽרֶץ׃

Copyright information for MapM