Psalms 8

לַמְנַצֵּחַ עַֽל־הַגִּתִּית
מִזְמוֹר לְדָוִֽד׃
יְהֹוָה אֲדֹנֵינוּ
מָֽה־אַדִּיר שִׁמְךָ בְּכָל־הָאָרֶץ
אֲשֶׁר תְּנָה הוֹדְךָ עַל־הַשָּׁמָֽיִם׃
מִפִּי עוֹלְלִים ׀ וְֽיֹנְקִים יִסַּדְתָּ עֹז
לְמַעַן צוֹרְרֶיךָ
לְהַשְׁבִּית אוֹיֵב וּמִתְנַקֵּֽם׃
כִּֽי־אֶרְאֶה שָׁמֶיךָ מַעֲשֵׂה אֶצְבְּעֹתֶיךָ
יָרֵחַ וְכוֹכָבִים אֲשֶׁר כּוֹנָֽנְתָּה׃
מָה־אֱנוֹשׁ כִּֽי־תִזְכְּרֶנּוּ
וּבֶן־אָדָם כִּי תִפְקְדֶֽנּוּ׃
וַתְּחַסְּרֵהוּ מְּעַט מֵאֱלֹהִים
וְכָבוֹד וְהָדָר תְּעַטְּרֵֽהוּ׃
תַּמְשִׁילֵהוּ בְּמַעֲשֵׂי יָדֶיךָ
כֹּל שַׁתָּה תַֽחַת־רַגְלָֽיו׃
צֹנֶה וַאֲלָפִים כֻּלָּם
וְגַם בַּהֲמוֹת שָׂדָֽי׃
צִפּוֹר שָׁמַיִם וּדְגֵי הַיָּם
עֹבֵר אׇרְחוֹת יַמִּֽים׃
10 יְהֹוָה אֲדֹנֵינוּ
מָה־אַדִּיר שִׁמְךָ בְּכׇל־הָאָֽרֶץ׃

Copyright information for MapM