Psalms 81

לַמְנַצֵּחַ ׀ עַֽל־הַגִּתִּית לְאָסָֽף׃
הַרְנִינוּ לֵאלֹהִים עוּזֵּנוּ
הָרִיעוּ לֵאלֹהֵי יַעֲקֹֽב׃
שְֽׂאוּ־זִמְרָה וּתְנוּ־תֹף
כִּנּוֹר נָעִים עִם־נָֽבֶל׃
תִּקְעוּ בַחֹדֶשׁ שׁוֹפָר
בַּכֵּסֶה לְיוֹם חַגֵּֽנוּ׃
כִּי חֹק לְיִשְׂרָאֵל הוּא
מִשְׁפָּט לֵאלֹהֵי יַעֲקֹֽב׃
עֵדוּת ׀ בִּיהוֹסֵף שָׂמוֹ
בְּצֵאתוֹ עַל־אֶרֶץ מִצְרָיִם
שְׂפַת לֹא־יָדַעְתִּי אֶשְׁמָֽע׃
הֲסִירוֹתִי מִסֵּבֶל שִׁכְמוֹ
כַּפָּיו מִדּוּד תַּעֲבֹֽרְנָה׃
בַּצָּרָה קָרָאתָ וָאֲחַלְּצֶךָּ
אֶעֶנְךָ בְּסֵתֶר רַעַם
אֶבְחׇנְךָ עַל־מֵי מְרִיבָה סֶֽלָה׃
שְׁמַע עַמִּי וְאָעִידָה בָּךְ
יִשְׂרָאֵל אִם־תִּֽשְׁמַֽע־לִֽי׃
10 לֹא־יִהְיֶה בְךָ אֵל זָר
וְלֹא תִשְׁתַּחֲוֶה לְאֵל נֵכָֽר׃
11 אָֽנֹכִי ׀ יְהֹוָה אֱלֹהֶיךָ
הַֽמַּעַלְךָ מֵאֶרֶץ מִצְרָיִם
הַרְחֶב־פִּיךָ וַאֲמַלְאֵֽהוּ׃
12 וְלֹֽא־שָׁמַע עַמִּי לְקוֹלִי
וְיִשְׂרָאֵל לֹא־אָבָה לִֽי׃
13 וָאֲשַׁלְּחֵהוּ בִּשְׁרִירוּת לִבָּם
יֵלְכוּ בְּֽמוֹעֲצוֹתֵיהֶֽם׃
14 לוּ עַמִּי שֹׁמֵעַֽ לִי
יִשְׂרָאֵל בִּדְרָכַי יְהַלֵּֽכוּ׃
15 כִּמְעַט אוֹיְבֵיהֶם אַכְנִיעַ
וְעַל צָרֵיהֶם אָשִׁיב יָדִֽי׃
16 מְשַׂנְאֵי יְהֹוָה יְכַחֲשׁוּ־לוֹ
וִיהִי עִתָּם לְעוֹלָֽם׃
17 וַֽיַּאֲכִילֵהוּ מֵחֵלֶב חִטָּה
וּמִצּוּר דְּבַשׁ אַשְׂבִּיעֶֽךָ׃

Copyright information for MapM