Psalms 93

יְהֹוָה מָלָךְ גֵּאוּת לָבֵשׁ
לָבֵשׁ יְהֹוָה עֹז הִתְאַזָּר
אַף־תִּכּוֹן תֵּבֵל בַּל־תִּמּֽוֹט׃
נָכוֹן כִּסְאֲךָ מֵאָז
מֵעוֹלָם אָֽתָּה׃
נָשְׂאוּ נְהָרוֹת ׀ יְֽהֹוָה
נָשְׂאוּ נְהָרוֹת קוֹלָם
יִשְׂאוּ נְהָרוֹת דׇּכְיָֽם׃
מִקֹּלוֹת ׀ מַיִם רַבִּים
אַדִּירִים מִשְׁבְּרֵי־יָם
אַדִּיר בַּמָּרוֹם יְהֹוָֽה׃
עֵֽדֹתֶיךָ ׀ נֶאֶמְנוּ מְאֹד
לְבֵיתְךָ נַאֲוָה־קֹדֶשׁ
יְהֹוָה לְאֹרֶךְ יָמִֽים׃

Copyright information for MapM