Psalms 99

יְהֹוָה מָלָךְ יִרְגְּזוּ עַמִּים
יֹשֵׁב כְּרוּבִים תָּנוּט הָאָֽרֶץ׃
יְהֹוָה בְּצִיּוֹן גָּדוֹל
וְרָם הוּא עַל־כׇּל־הָעַמִּֽים׃
יוֹדוּ שִׁמְךָ גָּדוֹל וְנוֹרָא
קָדוֹשׁ הֽוּא׃
וְעֹז מֶלֶךְ מִשְׁפָּט אָהֵב
אַתָּה כּוֹנַנְתָּ מֵישָׁרִים
מִשְׁפָּט וּצְדָקָה בְּיַעֲקֹב ׀ אַתָּה עָשִֽׂיתָ׃
רוֹמְמוּ יְהֹוָה אֱלֹהֵינוּ
וְֽהִשְׁתַּחֲווּ לַהֲדֹם רַגְלָיו
קָדוֹשׁ הֽוּא׃
מֹשֶׁה וְאַֽהֲרֹן ׀ בְּֽכֹהֲנָיו
וּשְׁמוּאֵל בְּקֹרְאֵי שְׁמוֹ
קֹרִאים אֶל־יְהֹוָה וְהוּא יַעֲנֵֽם׃
בְּעַמּוּד עָנָן יְדַבֵּר אֲלֵיהֶם
שָׁמְרוּ עֵדֹתָיו וְחֹק נָֽתַן־לָֽמוֹ׃
יְהֹוָה אֱלֹהֵינוּ אַתָּה עֲנִיתָם
אֵל נֹשֵׂא הָיִיתָ לָהֶם
וְנֹקֵם עַל־עֲלִילוֹתָֽם׃
רוֹמְמוּ יְהֹוָה אֱלֹהֵינוּ
וְֽהִשְׁתַּחֲווּ לְהַר קׇדְשׁוֹ
כִּי־קָדוֹשׁ יְהֹוָה אֱלֹהֵֽינוּ׃

Copyright information for MapM