1 Thessalonians 3

Keyepmti nin ingat keŋ sindem ke tetak ku nânâyelen nâmtiyepm neŋmak Silwanusmak kapigok nâmtalati nit ndak Aten mka teman tati nit Timoti Kilaismagen meniŋnit ek nitmak Kawawaŋgat mulup mamnup ek pemalu eweŋan inmagen koge. Egaŋ Kilaisiyelen Zet Zapat Dolakŋaŋ Penaŋ mampalakŋaŋ bein kogogapmti egaŋ indamukulem mme Kilaismagen nâmkiŋpepeŋin windeŋaŋbeŋ ŋep butem wat indendeyelen mulupmaŋ mge. Kogogapm inmagengatnaŋaŋ kukŋaŋ palen tati gilik pemti naman mamaŋin itnaŋan ku mebep. In nâmtalip kukŋaŋ keboŋ kapi Kawawaŋaŋ nin titiyet nâmti bempeye. Nin in eweŋan amnaŋ sisipeŋpeŋ mimindawep e mandiindomtemenn. Keyet kataŋ masokbemindamkwazin e in nâip. Âpme neŋ ingat keŋ sindem tetak ku nânâyelen nâmti keyepmti Timoti inmagen pema nâmkiŋpepeŋinaŋgat yaŋaŋ eegalen koge. Mneti Sadaŋaŋ tetimindeme ningalen mulup belak penaŋepiŋ benakgapmti ek pema koge.

Keyaŋgut Timotilak ninmagen gilik pem koti ingalen nâmkiŋpepeŋin ewe tapme nolinaŋgat keŋin mambein keyet zapatnaŋ ilak minndame nâmbenn. Nin inmagen mulup pembenaŋ mbenn ke nâmti in kot ndidikgalen manâip nin sepem kegogak imkot indidikgalen manânup. Kilaismagen notnne, ninmagen nukŋaŋ ma sisipeŋpeŋ kogeen ingalen nâmkiŋpepeŋin ewe kaliŋaŋ tazin keyet zapatnaŋ nâmbenn keyaŋ keŋŋ m eleŋ belaŋ bemndeye. In Amobotnaŋmak penaŋ wetekumti ewe mamambep beme nin keyaŋ keŋŋ m eleŋ beleŋ bemndeme nin nukŋaŋ sambe e ŋep timann dukŋnanen mopme mulup nâmisimti mbanup. Nin mulupmnaŋgat penaŋaŋ in sokbewien ke nâmti keŋŋ segeyegaŋ bemisikme oloŋen palen tati Kawawaŋgat wisikŋ manzenup. 10 Nin tambu msa pi Kawawaŋaŋ set ŋen aikndame in ewe kot indikti nâmkiŋpepeŋinan nukŋaŋ ŋen taindain beme ke ekti indamukulem mimiyet nâmti dundundu mulup katikŋaŋ maminup.

11 Kawawaŋ Bipm ikŋaŋ ma Amobotnaŋ Zisasiyaŋ set ŋen weyaŋme inmagen kokogalen nâmti mandundunup. 12 Nin Amobotnaŋaŋ indamukulem mimindeme tuŋguwinan ma am notnaŋ ekŋenmak gogot palenegak etaŋ mamayet nâmti mandundunup. Sepem kegogak nin ingat gogot mimindamti manup 13 Kegok mme Amobotnaŋaŋ gwatnaŋ mimindeme tapmetnepeme Amobotnaŋŋ Zisasiyaŋ gilik zem koti am egalen bembeŋaŋ indatimkobe kan keyet in Kawawaŋ Bipmgat ŋenzimosetnan keŋin kwetetepmaŋ ma yompiŋ piyaŋ motabepgat nâmti mandundunup.

Copyright information for `NAF