John 21

Zisasiyaŋ nembaŋane 7 sokbemindaye

Mamoti Zisas nembaŋane 7 ke nin kapigok: Saimon Pita, Tomas kwitnaŋ ŋen Nemba pepet, Natanael Galili mkaengatnaŋ ma Zebediyet nemulatnenet ma nembaŋane zut nit ewe Taibilias tundua ganzenan met ondek tapmmann Saimon Pitayaŋ nin pigok dinndoye, “Neŋ aŋgalayet timasât tapmiap.” Zeme nin nsakwep meti waŋgaen moti meti tambu tetak pi mulup temaŋ mti aŋgala ŋen ku atawenn.

Ke tapmimetnepemann ilak msaye. Âpme Zisasiyaŋ gambibik palen daen tapmame ekbenn. Yaŋgut nin an ke Zisas ke ku nâmâtâpewenn. Mme Zisasiyaŋ ndikti kwizet pigok kuye, “An ekŋen da, in aŋgala ŋen mandayo ma yek?”

Ndayaŋkwesime nin zewenn, “Yek, ŋen ku mandann.”

Zeme pigok dinndoye, “In eleŋgolamin mti naman waŋga ganzenan bet penaset peme topme aŋgala omba mandait.” Zeme nin eleŋgolam mti waŋga nembeleset pemann towepme aŋgalayaŋ totne totne eleŋgolam bepi gak zem tapme eleŋgolam mandamann kwasâgât teŋteŋ penaŋ siwenn.

Âpme neŋ Zisasiyaŋ nâmneme dolakŋaŋ mambemtan keyaŋ Pitayet pigok zewan, “Pita, an kanda ilak Amobotnaŋaŋ ikŋaŋ tazin nânik.” Zeme Saimon Pitayaŋ nânâŋak kâlâpmaŋ mti biman kaikti tuyen palam toti tukutumti tu paleset zelelaŋ mege. Âpme waŋga bugan nembu sutnanik daen 100 mita mee kegok tage keyepmti nemba notnaŋ nin waŋga mme kaiŋan mopmann eleŋgolam aŋgala melesiŋ mandapemann kaiŋanik motapme gambibik palen gwaen moti ekmann tep kwetnanen aŋgala ma meu mee piyaŋ tazimaŋge.

10 Âpme Zisasiyaŋ dinndoye, “In aŋgala tiyo e notnaŋ pienen mti kolit.”

11 Zeme Saimon Pitayaŋ waŋgaen moti eleŋgolam tekŋaŋ pi kwaleti eleŋgolam aŋgala melesiŋ mandamti katikŋan mot peme weŋge. Keŋanen bee aŋgala temaŋ temaŋ penaŋ 153 bekapiyaŋ tabien yaŋgut eleŋgolam tekŋaŋ ku etiye. 12 Mme Zisasiyaŋ pigok dinndoye, “In aŋgala ke tapme pien kot meu timti nit.”

Zeme nin ilak Amobotnaŋ elak nâmpewenn keyepmti nin, “Geŋ pe an kwi?” kegok ke ku yaŋkwesiwenn.
13 Âpme Zisasiyaŋ kot totati aŋgalamak meu tewen tapmaŋge ke timti kalaŋ ndame nimbenn.

14 Zisasiyaŋ gakikiengatnan wati nin sek zut ilak sokbemndaye yalak kan piyet sokbemndame sek tuk bein.

Zisasiyaŋ Saimon Pita sek tuk kapi yaŋkwesiye

15 Nin meu ke ndame nimann delaŋ zeme Zisasiyaŋ Saimon Pita pigok yaŋkwesiye, “Saimon, Zângat nemuŋaŋ, nodine ekŋenaŋ nâgât keŋin temaŋ penaŋ bemti gogot mamimneip. Âpme geŋ nâgât zigok penaŋ manâmnenik?”

Zeme Pitayaŋ zeye, “Amobotnaŋ, neŋ gâgât gogot omba penaŋ mamiyap elak ŋep nâmnenik.”

Zeme Zisasiyaŋ zeye, “Geŋ nâlen sipsip maŋge maindadamuŋ mmambanik.”
16 Kegok zemti ewe keyegak sakwalamti zeye, “Saimon, Zângat nemuŋaŋ, geŋ penaŋ nâgât gogot penaŋ maminik?”

Zeme Pitayaŋ zeye, “Amobotnaŋ, neŋ gâgât gogot penaŋ mamimgeyap e nâmnenik.”

Zeme Zisasiyaŋ zeye, “Geŋ sipsip maŋganne maindikdamuŋ mmambanik.”

17 Zeme Zisasiyaŋ ewe sakwalamti pigok yaŋkwesiye, “Saimon, Zângat nemuŋaŋ, geŋ penaŋ nâgât gogot mamimnenik?”

Egaŋ zet sepemaŋ kwep ke yaŋkwesime sek tuk beme Pitayaŋ nâmti keŋaŋ bekanaŋ penaŋ beme zeye, “Amobotnaŋ, geŋ kwitnaŋ kwitnaŋ sambeyet yaŋaŋ nâmane delaŋ manzein. Neŋ gâgât gogot mamimgeyap e kegogak nâmnenik.”

Zeme Zisasiyaŋ zeye, “Geŋ sipsip maŋganne kapi maindikdamuŋ mmambanik.
18 Neŋ penaŋ sukwep penaŋ pigok diŋgoma nâmbak, geŋ nembaengatnan mamkwabanan yaŋ ewe mamobanik pi bitimdi giti zamti set deset ma deset mesâti giti nâmtati mamepmambanik. Yaŋ maneti an penaŋ bewanik kan keyet geŋ bedi etaŋ mwapmane am notnaŋ ekŋenaŋ bitimdi zamgemti geŋ mesât ku nâmbanigen ke gaik mebep.” 19 Zisasiyaŋ kegok zemti Pitayaŋ zigok gakiwe keyet zet bimbim zet zeye gakikiŋaŋ sepemaŋ igak keyaŋ Kawawaŋgat kwizet buŋamaŋ mim wawagat zeye. Zet kegok dundumâti pigok dunduye, “Geŋ nâlen nemba penaŋ kwati mamambanik.”

20 Âpme Pitayaŋ gilik zemti ekme Zisasiyaŋ neŋ nemba ektikŋaŋ mampemtan keyaŋ egegat bamidan penaŋ mepma nikbun. Neŋ Aŋgalalaŋ Kendoen meu tatnimambenn kan keyet neŋ Zisasiyet wakŋan bemti pigok yaŋkwesiwan, “Amobotnaŋ, pe kwiyaŋ geŋ zemgowe?”

21 Neŋ bamidan taidamâtmepma Pitayaŋ nikti Zisas pigok yaŋkwesiye, “Amobotnaŋ, nemba kapi bam amnaŋ zigok msame gakiwe?”

22 Yaŋkwesime Zisasiyaŋ pigok dunduye, “Egaŋ ewe alik mame neŋ gilik zemti kobap ma gakime kobap e nen nâyap. Âpme geŋ zet keyet eneyet tatnayaŋkwesinik? Geŋ nâlen nemba penaŋ kwati mamambanik.”

23 Âpme am Zisas nâmkiŋpemti mamtemien notnaŋ ekŋenaŋ zet ke nâmti Zângat pigok zemyuŋguwien, “Nemba kapi ku gakiwe.” Wa Zisasiyaŋ ek gakikipiŋ telepgat mamambe keyet nâmti ku zeye.

Pitayaŋ yaŋkwesime keyepmti Zisasiyaŋ pigok zeye, “Egaŋ ewe alik mame neŋ gilik zemti kobap ma gakime kobap e nen nâyap. Âpme geŋ zet keyet eneyet tatnayaŋkwesinik?”

24 Neŋ kwitnaŋ kwitnaŋ sambe ke eknâm mima delaŋ zemâge keyepmti zet sambe beke papiaen kapi weyaŋ zemâtâti kumâti peyap. Keyepmti nin zet meluwaŋ kumpeye kapiyet nâmann penaŋ penaŋak bein.

Zânaŋ zet kapigok zemdelaŋ zeye

25 Âpme Zisasiyaŋ kwitnaŋ kwitnaŋ mkwage sambe bee ilindiŋ papiaen kuma topmâdak ze papia ŋotekŋaŋ sambe penaŋ sokbemâdak.

Copyright information for `NAF