Mark 3

Zisasiyaŋ Sabat tagoŋgo kan sutnateman an betnaŋ seleuuŋaŋ ŋen weyaŋpeye

(Matiyu 12:9-14; Luk 6:6-11)

Zisasiyaŋ ewe gilik zemti Zuda ilinaŋgalen sesewat mkaen negak moti an betnaŋ seleuuŋaŋ ŋen tapme ege. Âpme Palisi notnaŋ tabien ekŋenaŋ Zisasiyaŋ an kapi Sabat tagoŋgo kanen kapi weyaŋpeme ekti wapmet zelen pesenup, zemti ekdamuŋ mtabien. Âpme Zisasiyaŋ an betnaŋ seleuuŋaŋgat zeye, “Geŋ wati ŋeŋaŋ pienen kwatat.” Zemtetime motapme Zisasiyaŋ am pigok indayaŋkwesiye, “Sabat tagoŋgo kanen mulup dolakŋaŋ mimiyelen ma bekanaŋ mimiyelen am mamaŋin ewe weyaŋindendeyelen ma indawalapme gakikiyelen? Ze zeme nâmbi.” Indayaŋkwesime ekŋenaŋ zelinpiŋ buzak tabien. Âpme amnaŋ keŋ katik mme Zisasiyaŋ nâme ŋep ku beme ŋenzinziŋmak tokwaindikti an betnaŋ seleuuŋaŋgat zeye, “Bedi mututut.” Zeme betnaŋ mututupme betnaŋwan dolakŋaŋ beye. Ke mme Palisi ekŋenaŋ sesewat mkaengatnan toti meti keyegak amobotnaŋ Elotgat mukulem mimiŋane ekŋenmak ondekti, “Set zigoset aikti Zisas kumann gakiwe,” zemti zemkabewien.

Am sambe penaŋ tundua ganzenan ondekbien

Âpme Zisasmak nembaŋane ekŋenaŋ Galili tunduaen mesât mme Galili msalengatnan am sambe penaŋaŋ indikti indamâpmebien. Mepme am sambe Zudia msalengatnaŋ ma Zelusalem mka temaŋgatnaŋ ma Idumea msalengatnaŋ ma Zodan tu nembetgatnan ma Taia ma Saidon mka temaŋ keyet nembet nembet mka isisikŋaŋ notnaŋgatnaŋ am sambe penaŋaŋ Zisas mulup mimiŋaŋgat zapatnaŋ mekopme nâmbiengapmti ekmagen ondek kopmâbien. Am sambeyaŋ kot bembuluŋti Zisas neŋ ekbi geŋ ekbi mti Zisas bekan maŋgalaŋpeme weweyelen mbiengapmti nembaŋaneyaŋ waŋga ŋen sakwep aiksasayet zeye. 10 Zisasiyaŋ am sambe maweyaŋindemtangapmti am zawatmak sepem igak igagaŋ koondakti Zisas timekti dolakŋaŋ bembeyet âmandamti dopmaŋ âtâpe dopmaŋ âtâpe mti maŋgalaŋpeme weweyelen mge keyepmti, “Waŋga aiigat,” ke zeye. 11 An we bekanaŋinmak kwep kwep ekŋenaŋ Zisas zimosetnaŋ kot ekti kandaŋan tokutumti ŋagak temaŋ palen tazemambien, “Geŋ Kawawaŋgat Nemuŋaŋ.”

12 Âpme Zisasiyaŋ we bekanaŋaŋ egat kegok zemkawaŋ kumbembeyelen zemkulumindeye.

Zisasiyaŋ an 12 ombemindeme Kawawaŋgalen Zet Zapat Dolakŋaŋ Penaŋ zempalakŋaŋ bembeyet zemindeye

(Matiyu 10:1-4; Luk 6:12-16)

13 Âpme tunduaengatnan am notnaŋ Zisasmak ilinsakwep kalaŋan mobien. Motati Zisasiyaŋ am kwiyet nâme ŋep beye ekŋen ke indazemandame ekmagen kopme 14 12 ekŋen pi ikŋaŋmak mamayelen indaombemti an Kawawaŋgalen Zet Zapat Dolakŋaŋ zempalakŋaŋ bembe an zenzeyelen ma we bekanaŋ indapmobogalen zemindemti winde indaye.

16 An ekŋen keyelen kwilin kapigok:

Saimon (kwitnaŋ ŋen Zisasiyaŋ Pita kuye) ma

17 Zebedi nemulatnenet Zemsmak meniŋaŋ Zân egelaŋ ŋenzinziŋ mti kwizet ŋagak temaŋ makumtemun, keyepmti Zisasiyaŋ egegat kwilit Boaneges kuye. Kwit keyet yaŋaŋ ningalen zeleset gilik zemann kululuŋ kwisak kegok bein.

18 Ma Endulumak

Pilip ma

Batolomiyumak

Matiyu ma

Tomasimak (Alipiasiyet nemuŋaŋ)

Zems ma

Tadiasmak

Saimon Zelot
(3:18)Kwit keyet yaŋaŋ Matiyu 10:4 ekbak.


19 ma Zuda Iskaliot mkaengatnaŋ. An keyaŋ maneti bam Zisas zemkuye.

Amnaŋ Zisasiyaŋ mulup we bekanaŋ ekŋengat ŋeŋaŋin Beelsebulmak tapm kegok zewien

(Matiyu 12:22-32; Luk 11:14-23; 12:10)

20 Meti mkaen motapme am sambeyaŋ ekti ewe kobem misik tapme keyepmti Zisas nembaŋane ekŋenaŋ tu meu niniyelen set ku sokbemindaye. 21 Âpme Zisasiyet mamnotnaneyaŋ zapatnaŋ ke nâmti, “An pi keŋaŋ kilom beme mene tapm,” zemti aiksât mebien.

22 Âpme zii zet zikat indanda an notnaŋ ekŋenaŋ Zelusalem mka temaŋgatnaŋ koti Zisasiyet zewien, “An kapi Beelsebul
(3:22)Beelsebul ek we bekanaŋ ekŋengalen an ŋeŋaŋ bembe an. Zuda am ekŋenaŋ Sadaŋgat kogok manâmtemien.
keŋan tazin.” Ma am notnaŋaŋ zewien, “An kapi we bekanaŋ ekŋengalen ŋeŋaŋinaŋ winde same we bekanaŋ ekŋen am keŋinangatnan tapmâindeme melip.”

23 Zeme Zisasiyaŋ nâmti am ekŋen ke indamandame kopme bemzenze zet ŋen kapigok diindoye, “Sadaŋaŋ zigoset Sadaŋ ikŋaŋak mâpme medak? 24 Ma msat kwepgalen am maŋgeyaŋ kalaŋti âmandawiek beme msat kwep am maŋge keyaŋ windeŋinbeŋ ku tabiek. 25 Ma mka ŋen keyet keŋan amnaŋ kalaŋti âmandawiek beme mka keyet kwitnaŋ bekanaŋ benak. 26 Âpme Sadaŋgalen mulup an ekŋenaŋ epeemti ilinak âwiek beme windembeŋ ku tabiek ma ekŋengalen mamaŋin dolakŋaŋ ŋep ku tatnak.

27 Âpme an ŋen windeŋaŋbeŋ penaŋ e nâmtiŋgut kwindiŋ moti milawatnaŋ kilom kambu ku matip. Egaŋ ŋeŋaŋ an katikŋaŋ beke ambeti setnaŋ betnaŋ zampeme tadak beme ŋep milawatnaŋ tinak. Bemzenze zet kapi Sadaŋgat zenzeŋaŋ. Sadaŋ ŋeŋaŋ ambeti zampeme tapmeŋgut we bekanaŋ am keŋinan talip ekŋen ke ŋep indamâbâgalen.”

28 Amnaŋ Zisasiyet, “We bekanaŋ keŋan tazin,” kegok zewiengapm Zisasiyaŋ zet kapi zeye, “Neŋ zet kapigok penaŋ zema nâit, amgalen mama mimi bekanaŋ sambe ŋep katikpepeyelen ma Kawawaŋgat zet mobotnaŋ mimi keyelen yom kegogak ŋep katikpepeyelen. Neŋ Emetak Teŋaŋ winde name we bekanaŋ taindapmâlapgapmti Emetak Teŋgat zet mobotnaŋ zenze keyelen yom ŋep ku katikpepeyelen. Yom ke delaŋ zenzeŋepiŋ tapmetnepeme yom keyet dopmaŋ time delaŋ zewe.”

Am Kawawaŋgalen zet maŋgawepuwen Zisasiyet sipbutnaŋene

(Matiyu 12:46-50; Luk 8:19-21)

31 Âpme Zisasiyet mamnotnane ekŋenaŋ mka solonan baen kotati Zisasiyaŋ kwatotogat zepeme mopme tapmambien. 32 Zeme am sambe ekmak mka keŋan tabienaŋ Zisasiyet zewien, “Mamnodine ekŋenaŋ zupman baen kotati gâgât tazeip.”

33 Zeme egaŋ am ekŋengat pigok indayaŋkwesiye, “Kwiyaŋ nâgât mamnotnne beip?” 34 Zemti am tabien ekŋen meindik koindik mti zeye, “In talip kapiyaŋ nâgât mamnotnne penaŋ beip! 35 Am ekŋen Kawawaŋgalen zet maŋgawepup ekŋenaŋ nâgât mamnotnne penaŋ beip.”

Copyright information for `NAF