Revelation of John 15

Egiteu la angelo ivitu visibitala la iligiligi ivitu

Tio, eau so popou oata te la ilo la lagele, eau goio hilo isa lou la irovilala uru, eau karutu seselela. Egiteu la angelo ivitu loio sibitala, egite ge visibitala la iligiligi ivitu, eia ge la tapasi la viligila te La Tahalo Uru somai te la maututula, la vuhula eia ge vikaluvu la igototolola tetala.

Goio, eau ga mata lou soio, eau hilo la gale la mago eia malilo tataho, eia sima tataro mai la havi. Oio te la parava, eau hilo la valalua me hatavivile mapaiti magiri, egiteu moli ale bolehohoti la vagagarila te La Bolo Ale Uru, egite kama lotu tavu la puigolo tetala, egite kama abi la irovilala tetala oio te la vovo giteu. Egite magirigiri oilo, egite baubau.
Ale e Ioanes toi seseletia veia oio te la lima giteu, egite ababi la papaga la bilau mai egite toila “la harp”, La Tahalo Uru eia abia giteu.
Egite bau la bilau te Moses, eia la bilalaha sesele te La Tahalo Uru, egite bau la bilau tegirua me e Latu La Sip, la bilau alele eia maie:

  • Tahalo Uru, eme sekela vagari,
  • La igogolu te la limamu eia uru, eia isapolo viruru.
  • La vulovulomu matata tomi moli.
  • Eme pou la mulugaluga te la maratatila tomi.
  • Mave, isa ge veia eia kama ge togome, La Uru?
  • Ouka gologolo. Egite tomi ge vaisaleme.
  • La vuhula eme moli sekela maroka.
  • La maratatila tomi te la galegale tomi,
  • egite ge goio taume, egite ge lotu tavume.
  • La vuhula, la igogolu taume ale matata tomi moli,
  • egite hilotia, eia magiri palalati.
  • Tio, egite bau kaluvuti mai ele, eau goio mata soata te la mori, eau hilo la muli La Tahalo Uru, mai la luma la lotu tetala, eia maroka viruru, eia tikumu veia etato la tahalo la vovo ge tiroro soilo vola, eala moli eau hiloa, eia oio kopeti. Goio, egiteu la angelo ivitu loilo te la luma la lotu gogala, egite visibitala la iligiligi ivitu. La lavalava tegiteu eia maroka sesele, eia sasima, egite kisipoula la kisipou ale ialalo tataho, kara oata la magoro giteu. Goio, isa tegiteu la vagari robola ivaa ale magiri te la pulolou te La Tahalo Uru, eia goio abia giteu la angelo ivitu la keibulu la vaen ivitu ale mememe tataho, oilo vola la bulu la vaen ale egite ge viliu la valalua me hatavivile ovola, eia ama pasi, mai la igototolola te La Tahalo Uru eia moli sekela mahuli, la kaluvula ge ouka. Goio, la luma la lotu eia volu sesele la sosobu, la vuhula la marasala me la vagagarila te La Tahalo Uru eia tivura mai la havi. Isa kama koramulia ge tiroro soilo vola kara ale egiteu la iligiligi tegiteu la angelo ivitu ge kaluvu sapa tomi.

    Copyright information for `NAK