Revelation of John 4

La hililo te Ioanes oata te la ilo la lage

E Kraist vikara kaluvuti mai ele, eau karutu, eau hilo la mata la ilo la lage, eia oio kopeti. Tio la muluga la golu la tahalo ale eau loloa eia vikarakara, la golula tali mai la vaivai. Eia veia mago “Eme ge goata tavuau, eau ge vahilo leme la pulolou tegiteu la valalua, ale ge sibitala mulimuli.”

Tio, oio moli ovola, La Kalulu La Tahalo Uru vitivura la tiagu, eau karutu, eau hilo la pulolou te la uru isasa oata te la ilo la lage, la tahalo pou ovola. Eau hiloa eia mai la matagaga isa uru. La matagaga uru ele sasima, eia mememe, eia magesegese. La malai la hura, eia grin tataho, eia sivo galili la pulolou uru ele. La pulolou te la uru ale savulu lua gete vaa, egite pou galili la pulolou te la uru. Egite ururu ale savulu lua gete vaa, egiteu oio popou oio vola, egite kai la kairobola ale kakea, oata la gama giteu egite tau e vevea ale mememe. La sima, eia sibitala loio te la pulolou te la uru. La mori kuraraba, la golu la valalua isahari vikara boboboe. Egiteu la selu ale ivitu, egite magiri mamuga te la lagu La Tahalo Uru. Egiteu la selu ale ivitu ele, egite mai La Kalulu La Tahalo Uru. Oio la lagu La Tahalo Uru, eau hilo la mago uru, eia matagaga tataho, eia sasima. Egite la vagari robola te La Tahalo Uru tai ivaa, egite isapolo sesele, egite magiri galili la pulolou te La Tahalo Uru. La mata giteu mapaiti oio te la lagu giteu, oio te la poke giteu tai. La muluga la vagari robola eia mai la laion. La vailuala, eia mai la kau ale la togo. La vaitolula, la lagula mai la lagu la tahalo. La vaivaala, eia mai e loauru isasa ale lovolovo.
La laion, la masovala veia La Tahalo Uru, eia vagari, eia uru. La kau, la masovala veia La Tahalo Uru pou tigi, eia gogo etatou. La tahalo, la masovala veia La Tahalo Uru, la mari tetala oio. E loauru, la masovala veia La Tahalo Uru, eia vikaluvu harari la paga ale eia igoa.


Egiteu la vagari robola ale ivaa, la palapala giteu iuolouolo, la mata giteu usu. Egite kama maila te la bilau te la haro me la logo, egite bau maie:

  • La Tahalo Uru, La Uru miteu,
  • eme sekela moli la vagagarila.
  • Taritigi, taritigi, taritigi pepeho soata taume,
  • Tahalo La Marokala!
  • Eme mahuli moli, la kaluvumu ge ouka.
Egiteu la vagari robola ale ivaale, egite ge bau la bilau la vaisalela soio te La Tahalo Uru, eia ale pou te la pulolou te La Uru, eia ge mahuli moli, la kaluvula ge ouka. Egite ge togoa, egite ge vei tatahoa mai ele. 10 Egite ururu ale savulu lua gete vaa, egite ge boru lagu tugu te la lagu La Tahalo Uru, egite ge lotu tavua, la vuhula eia uru, eia mahuli moli, la tapasila ge ouka. Egite ge lotu tavua, egite ge pigi e vevea tegiteu sotalo la lagu La Tahalo Uru, egite ge bau maie:

11 
  • Hilage, eme La Tahalo Uru tamiteu,
  • eia koramulia veia amite ge veipala
  • la vaisalela me la tilogo soio taume,
  • la vuhula eme sekela vagari.
  • La vuhula, eme vipou la golugolu tomi.
  • Te la masasagala moli taume,
  • eme visibitala egiteu, egite poutio.
Tio la bilau la vaisalela tegite ururu tavu La Tahalo Uru, eia mai alele.

Copyright information for `NAK