1 Corinthians 3

Nantoong Birevireꞌarima Tanuaang Meekung Bakaang Matau Bekoiꞌauꞌnaꞌ

Nka ninge tee diiꞌ mmaikoriꞌ Tanuaang Meekung-poꞌning-pinaꞌ teroita kararampiaung, teka nantoong tamunsiꞌnupoong-pinaꞌ kararampimaung, toirekaaꞌpinaꞌ Karistooꞌkoo. Ninge tee diiꞌ noonooꞌke bauꞌdampimaung, taamang ivekunge deeaꞌ. Diiꞌ mmeꞌ makosiriaꞌ ivekung nai-koo, aiꞌ diiꞌ tee mmeꞌ mono bakanavete-koo otoring. Tenang diiꞌ mamairo-koo otoritaaꞌ eeꞌnoko turanturang, arekeeꞌ, diiꞌ mono bakanavete-koo ee otoriaꞌ, tamunsiꞌnupoong nkoarimanaꞌ? Tenang diiꞌkoo narunge aaꞌpuko, “Ning Paulaꞌnavitu-koong,” eeꞌnoko niiꞌnunge aaꞌpuko, “Ning Apolos-nung,” teeꞌ karerima tamunsiꞌnupoong-pinaꞌ nkorarimang. Aming-koo diiꞌke neeꞌ Apolos naanka daangamerererimaatoinge? Neeꞌnaanka tamung Kumponing-koo kara-pareꞌka nanaanka, tamung diiꞌke neeꞌkoo masikaꞌanta nkaveruꞌnung, Ovoringe neeꞌ kantemureta botomuretuꞌnaꞌ nkoampeko. Ninge keempantuꞌ, napoꞌ Apolosie duuꞌpuuꞌ, masikaꞌ, nka tee Kumponinge baka duꞌantavuuꞌnung tee sinang. Teeꞌkoo tee naning keempumaung eeꞌnoko tee niiꞌnung duuꞌpumaung baruꞌ noruꞌkoo makosi deeaꞌ, teka tee Kumponing baka duꞌantavumaung noruꞌkoo makosi. Tenaanka tee, keempumaung eeꞌnoko duuꞌpumaung nariꞌ basira; aꞌnooꞌ tee Kumponinge teeꞌ mintoomparetuꞌnung-koo mooꞌureaing. Neeꞌ tee Kumponing ninka mintoong nkora, eeꞌnoko diiꞌ teing Kumponing bakaning keenkeenanka.

Dootuuꞌnupoong Teing Pava-pinaꞌ Beꞌnuꞌbeꞌnuꞌnisinavitu

Eeꞌnoko niiꞌnooꞌke diiꞌ teing pavanava-pinaꞌ otoring, Kumponing-nava, eeꞌnoko ning tee pava kani-koo okoteꞌ.
10 Teie Kumponinge biraanke-antamuioꞌ ninge mataunaꞌ konkoroompantuꞌ eeꞌnoko niiꞌnunge pora dau kanivuuꞌ. Teka tee baa tee naning dau kanivuainge tee matauvui kanivuaing tampamang. 11 Niiꞌnunge naninge niiꞌnave natuku keeng-koo makosi deeaꞌ. Teve nave ninge keempantuꞌnave otoaing. Teve eeꞌnave Jiisuuꞌ Karistooꞌnave. 12 Niiꞌninge kara-naunukai deeꞌma tee-koo natuku-koo dau avutevuꞌke kaniaavaꞌnaang, aaꞌning-pinaꞌ: baaꞌnankai, kaveeraꞌke eeꞌnoko ankaroꞌke; niiꞌnooꞌ kooro dovange, silivaꞌke eeꞌnoko kapang pipiꞌdaarie. 13 Teka tee damaꞌke Jiisuuꞌ Karistooꞌ bakaang doong urumpari taneꞌpuma kaniauꞌnaꞌ siraꞌpuaing, eeꞌnoko teie ntaꞌ ninka paaravuaing tee pava navaronaꞌ bonoꞌeema kaniauꞌnung, arevaro tampavaro, arevaro oravaro. Eeꞌnoko mooꞌuriaing kaniauꞌnaꞌkoo. 14 Teing eeꞌning kapooꞌ tampeng-koo kanisiiauꞌning taivuriaukaꞌnung eeꞌnoko tampara mooꞌ nkavaavaing. 15 Teka teing kapooꞌ orara-koo kanisiiauꞌning teing taivuriaining ntaꞌke, eeꞌnoko teing nantoong kaniauꞌninge mooꞌ nkavaavaukaꞌ, biiꞌka deekoꞌ domamparima mooꞌariaing teing-pinaꞌ ntaꞌke taivuriko domamparipeuꞌning-pinaꞌ.

16 Aiꞌ diiꞌke ee noruꞌeriaꞌ diiꞌ teing Kumponing bakanava dootuuꞌnava pankava eeꞌnoko Kumponing bakaang Tanuaang Meekung diiꞌkoo otomaung? 17 Eeꞌnoko niiꞌnunge narunge Kumponing bakanava orarivupeuꞌnung dei Kumponinge tee orari-antavupeuꞌ, aiꞌ Kumponing bakanava dootuuꞌnava pankava teva meekava eeꞌnoko diiꞌ teing eeꞌnava deentariri otoring.

18 Diiꞌkoo naning baka tosiaravaukaꞌ. Niiꞌnunge diiꞌkoo narunge eeꞌ noruꞌuaukaꞌ: “Ning norukasiꞌ enang-navaro-koo.” Kanuꞌ tampaavai makosi Kumponing-koo norukasiꞌ deemparavainaꞌ. 19 Aiꞌ aung kansiꞌ bakaang norukasiꞌ tee kanuꞌaapenung Kumponing-koo duta-koo. Daari Meekunge eeꞌ minkuvui otoinaꞌkoo,

“Kumponinge tee norukasiꞌnanka tamparimaing biiꞌka biikaang norukasiꞌkoo taaviꞌantavurimaung.”
(Jop 5:13)

20 Niiꞌnooꞌkoo napoꞌ eeꞌ,

“Ovoringe tee noruꞌui otong teing norukasiꞌnuka biikaang noruꞌ, eeꞌnoko noruꞌui otong biikaang matau katuaukaꞌnung.”
(Kena 94:11)

21 Teeꞌkoo diiꞌkoo naninge niiꞌnung naning miring pankaing-antavuma daangamparavaukaꞌ. 22 Aiꞌ ookara diiꞌ diikaninge, aaꞌning: Paulaꞌ, Apolos eeꞌnoko Siipas, eeꞌnoko ootukunung kansiꞌ, domang eeꞌnoko booꞌ, tee kapooꞌ enang otoing eeꞌnoko tee kapooꞌ damaꞌ tavoꞌaravaing – ookara teing diikaning. 23 Teka diiꞌ teing Karistooꞌ bakaning, eeꞌnoko Karistooꞌ tee Kumponing-nung.

Copyright information for `NAS