1 Corinthians 4

Dootuuꞌkoo Urantanuka Teing Kumponinge Deekoꞌ Biiving-koo Makosining

Diiꞌke tee niiꞌ tamung Karistooꞌ bakaning kara nkanuka-pinaꞌ noruꞌmereriaing Kumponinge makosi-antamurining-pinaꞌ bakaning kapooꞌ makensiꞌning nau-koo. Kapooꞌ pankaing masikung botovotonaaꞌke nkovuaing eeꞌ oroꞌ: Kakeꞌiiari nkovuaing tee kapooꞌnanka bakaang pankainge bampuining nko-koo teie. Ning arekeeꞌ? Kakeꞌiinunge? Tee aaꞌ ning baruꞌ tee-koo noruꞌ mankiꞌmoarooꞌnaang diiꞌke tokoonaꞌ noruꞌmeriko deekoꞌ, napoꞌ kapooꞌ niiꞌnunge minkuvuaing-koo. Ninka baakeenemarama masikaꞌantamaravarupeuꞌ. Tee, ning kapooꞌ oꞌnoaꞌpinaꞌ noruꞌmaramang, nka ninka baakeenemaravarupeuꞌ. Teie Ovoring narunge deekoꞌ baka baakeenemui otong. Teeꞌkoo naurampimang, enang batei makotuaruko simpeꞌdeeriaꞌ otomatoai bera teꞌmung Ovoring toroaravainaꞌmung basinooꞌ. Teie kapooꞌnanka bakuꞌnisining araka-koo sipuaing mutaanang-eta, eeꞌnoko teie eeꞌnarai oroꞌantavuaing niikaang domang arekeeꞌ toꞌbii-antamariri otoinaꞌ. Tenang eeꞌnang niiꞌ bakaning botovotonaaꞌnuka kante makosinaꞌ daangang kompampiaing Kumponing-eta, niiꞌning-eta deeaꞌ.

Mmaikoriꞌ ee, aung tee tamung paara-antavansi minkuansing neeꞌkoo Apolos naanka-koo ning, diiꞌ pakururiiꞌnaang Daari Meekunge minkuvui otoinaꞌ divuꞌeriꞌneeng nantoong daangamperererima bireꞌereri, diiꞌka mataunuka tantarima pokapokaꞌdariri. Baie diiꞌkoonarung pankaing-antaruinge? Aming kapooꞌ daꞌ okorui otoing Ovoringe aruaꞌ? Otoaꞌ. Eeꞌnoko teie aruioꞌ nkavera aming-koo daꞌ daangantaramaang nkaveaung-pinaꞌ oroꞌdarama? Teing ootukuning diiꞌ piarorimaing nkavering ee, diiꞌke? Diiꞌ teing tero makosiruꞌning noruꞌdarimang? Eeꞌnoko ovontung deentariruꞌninge tero diiꞌka, niiꞌ ninka deeaꞌ? Bakei, tero ovontung masikeng deentaripeuꞌning, niiꞌ teeꞌ, ovontung deemaripeuꞌning diiꞌ ninka. Ninge eeꞌ ooamaang: Kumponinge niiꞌ kara okomuri nkanuka eeꞌpinaꞌ oroꞌantamurining kansiꞌnupoong-koo: boreꞌkoo simuruꞌning-pinaꞌ, tauraꞌmurira booꞌkoo ookarai paninaanka-kooninge kansiꞌ oomaarioꞌ, nantoonge eeꞌnoko koosinunankai. 10 Niiꞌ teing Karistooꞌ Juꞌdeeaing-koo daankiampiko kanuꞌnanka-pinaꞌ noruꞌmaarimaing; diiꞌ teing nantoong tamung norukasiꞌnuka tantarimaing Karistooꞌkoo. Napoꞌ niiꞌ aruaruꞌnuka; diiꞌ purintoꞌnuka. Diiꞌ deto noruꞌdaarimaing; niiꞌ doonko oꞌnorimaing. 11 Aung teroita depeto bera enanung batei-koo niiꞌ peeramorimaung eeꞌnoko nukaaꞌmorikooꞌ. Ataꞌteempima orakaꞌ duaanamarimaung. Dimpaꞌnisinanka niiꞌ. Osi otoꞌmemuriainge niiꞌ. 12 Birenge mintoomarima takaaꞌmorimaung bauꞌmariiꞌnaang. Tenang deuꞌmaariko kara tamparai makuꞌarampimaung. Orakaꞌ nkomaariko tamung dooroomarikooꞌ. 13 Tenang orakaꞌ minkumaariko niiꞌke tampaꞌ karavarampimaung. Niiꞌ teing ookara kansiꞌnupoong-koo oreng deemariruꞌning. Teroita niiꞌ siikopaaꞌnanka deemariri oꞌnorimaung ookara-koo.

Tee Kara-Okovui-Nkaevuruꞌnung-koo Dau Basinuka Pinaꞌ Noruꞌkoo Orakaꞌ

14 Aung ninge diiꞌ maiaꞌanta-koo daariampaꞌ teka diiꞌ nari-anta-koo diiꞌ nnurukaaꞌ piaaruꞌnuka. 15 Bane nantoong dakuraakuꞌke diiꞌ Karistooꞌkoo tanataraarimainge, nka mmauꞌ diumatakaampi otoꞌderuriaꞌ, teka diiꞌ ninge pararampiruꞌning-pinaꞌ deentariruꞌning Jiisuuꞌ Karistooꞌkoo tee tampara doorenang naurampirioꞌ. 16 Tee tee enang niaꞌdampimang ning paarameri siomeriiꞌnaang. 17 Teeꞌkoo eeꞌnaꞌkoo ninge tee Timoti diiꞌanko botoansing. Tee tee eeꞌnara piaaruꞌ nnuring kakeꞌiinung Ovoring-koo. Teie napoꞌ noruꞌantaruriaing nkaang aarumonanka Jiisuuꞌ Karistooꞌkoo tee-pinaꞌ ninge dootuuꞌnupoong nauaramanaꞌ ootukunairu-koo oosiarimanairu-koo. 18 Niiꞌninge eeꞌ noruꞌerimang ning pa moarooꞌnaang diiꞌanko. Teeꞌ noruꞌerima boreꞌ pankaintarimaung. 19 Teka ning mooꞌnaang daꞌdeng diiꞌanko, Ovoringe doona amuko deekoꞌ. Eeꞌnoko tenang nenkeꞌamaꞌnaang teing biiꞌka daangananka biikaang kara, iriꞌ masikung-poꞌnung deekoꞌ. 20 Kumponing bakaang muuꞌ tamunsiꞌnung karai imaꞌaravaꞌ, teka iriꞌ ninka imaꞌari otong. 21 Arekeeꞌ diiꞌ piarorimang? Ning diiꞌanko mooꞌnaang banaꞌ ninka aiꞌ piaa ninka dooroomari?

Copyright information for `NAS