1 Corinthians 5

Dootuuꞌnupoong-koo Meuꞌka Orara Aarumo Koong-antanaare

(5:1–6:20)

Maritoro Nkovumaung Dootuuꞌkoo Akoꞌ Siꞌkoong

Ninge doorenang orara taaravansing diiꞌkoo narung-koo maritoroaramaung. Tee temuriiꞌ maritoro teie nkovumaung maremaarenamuriiꞌ nantoonge tauraꞌkoo makosi deeaꞌ, bane mutaanang-koo-nupoonge. Tee temuriiꞌ bauma baꞌaang ninka otoꞌ. Bakei, arekeeꞌ daangantarimaunge pankaing noruꞌkoo eeꞌnoko aung orara tasiꞌperiaꞌ maiaꞌdoriaung? Orarunsiraripeuꞌnung-koo tampaꞌ. Teeꞌ nkorarima tee naning temuriiꞌ aarumo nkovumaung bataꞌeripeuꞌ diiꞌankoita. Ning tee mono taapoꞌ oꞌnong, teka nkaang tanuaang diiꞌ ninka otong, eeꞌnoko teke oꞌnoitaaꞌ tee simpeꞌansing tee naning teeꞌ maremaare nkovumaung. Ninge naurampimang tee-koo niikaang Ovoring Jiisuuꞌ bakaang miring-koo: Nariꞌ minkunaarariai ning-koong ninka tanuaang ninka eeꞌnoko tee purintoꞌ niikaang Ovoring Jiisuuꞌ bakaang ninka. Teeꞌ oosirarima bataꞌeri tavoꞌeriai tee aung naning Sietaniꞌanko bakaang mono-koo naunaua toraꞌpuraiꞌnange bereꞌarara bakaang tanuaang domamparavainaꞌ teꞌmung Ovoring bakanaꞌmung.

Teeꞌ eeꞌnaꞌ daangantarimaatomanaꞌ tampaꞌ deeaꞌ. Noruꞌeriaꞌ diiꞌke ee narung naning orakaꞌ nkoarama teie tee ootukunung naroꞌka baaroꞌantavuring? Diiꞌ Karistooꞌ boora mooꞌduruꞌning tantarimaung deemparako, makosinaꞌ tanatarariaing Taamang Baariꞌkoong~ tanatanaꞌ, tee paroro Karistooꞌnung booꞌkoong uroꞌkanooꞌnung taaꞌniꞌanta Juꞌnupoong-koo. Diiꞌke noruꞌeri otong Baariꞌkoong Taamang-koo bereteꞌ iisi-poꞌnung uroꞌke duaꞌaakoꞌ taamang iisi-ninka baaroꞌaravaꞌ narung otoko, meekaꞌmung-koo makosining. Teeꞌ nariꞌ meekaꞌmariri oꞌnoriaing urikung aarumo sipampiri ookara orakaꞌ nkonanka, tooꞌde dovang ninka, eeꞌnoko domang kiiroraaꞌmori kara masikung-narung-poꞌnupoong deemariri oꞌnoriaing.

Nkaang karavoto daariantuꞌnung diiꞌanko aaꞌpama, “Navurariaukaꞌ kaukauroarima otoromaing ninka.” 10 Nka ninge teeꞌ minkuama ookara kaukauro nkonuka aung kansiꞌkooning minkuarampaꞌ, kapooꞌkoo tataꞌarimaing, bakisipunanka, eeꞌnoko kumponing tositosinanka siompaarimaing tovang ninka. Teka tee aꞌnooꞌ teing-eta siꞌdariarupeuꞌ kansiꞌketa tontaꞌdariarura deekoꞌ. 11 Tee aaꞌ eeꞌpinaꞌ miruꞌansi daarirerompiruꞌnung: Tamung navurariaukaꞌ tee ninka naning ninka niiꞌmaikororiꞌkoong tamparamaung ninka aing aaꞌning eeꞌ oroꞌ nkoarama: Kaukauroarama, tataꞌarama, kumponing tositosinanka siompuma, nantoong miring orari-antavurima, purintoꞌnaruꞌke kanuꞌarama eeꞌnoko bakiaaꞌ nkovuma. Aing nantoong teeꞌ oroꞌnuka ninka nariꞌ taamaniriaꞌ otoai. 12 Aming-koo papaararariringe nkaang karavoto deeruerima? Ninge ee simpeꞌaramaung teing nantoong damaꞌdu-nupoong? Otoaꞌ. 13 Kumponing narunge simpeꞌuriaing. Eeꞌnoko diiꞌ diiꞌka teeꞌke, teing nariꞌ otorimaing naing simpeꞌererimaing, apeꞌ aing? Bataꞌeriai tee naning orara diiꞌankoita.

Copyright information for `NAS