1 Corinthians 8

Taamang Kumponing Tositosinanka-koo Darimpaamaung-koonaare

(8:1–10)

Norukasiꞌnukai Boonko Otoroi Teing Niiꞌning Orariaavaukaꞌ Bioꞌ Maaꞌaama

Enang tee kapooꞌnanka kumponing tositosinanka-koo darimpaamaung: Niiꞌke tasiꞌpampiri otong teeꞌ diiꞌke aaꞌperimaung-koo, “Niiꞌke tee-koo noruꞌ deto basi kompampiri otong siompampipeuꞌnung.” Teka teing noruꞌ deto basi narung siompaamaing teing tamung biiꞌka daangamparimaing. Piaae deekoꞌ niiꞌ naroꞌka puring-antameeripeuꞌ. Naninge baka daangamparama eeꞌ noruꞌupeuꞌnung: “Ninge ootukunung kapooꞌ noruꞌansi otong.” Nka tee teie noruꞌuaꞌ teeꞌ Kumponinge pia-antavui otoinaꞌ teie noruꞌkoo. Teka naninge Kumponing domange daiꞌui dei Kumponinge tee bakaang naning tasiꞌpui noruꞌumaung.

Enang tee, arekeeꞌ noruꞌampiiꞌnaang tee boontunang-koo Kumponing tositosinanka-koo akovitue darimpaamaung-koo? Makosie niiꞌke nai-koo? Niiꞌke aaꞌ tee noruꞌampiri otong kumponing tositosinankai kapooꞌ basi-antavaavaꞌ ookara kansiꞌkoo, eeꞌnoko amutemuriiꞌ kumponing otoroaꞌ, teka narung masikung Kumponing otong. Nantoonge tee, aꞌnooꞌ aaꞌpaamaung: Kumponinanka otorong ookaanka-koo paning eeꞌnoko kansiꞌkoo, mmauꞌnanka ookeng kumponinanka eeꞌnoko ovontunanka. Teka niiꞌkoo tee narung masikung Kumponing otong, tee Niuma. Eeꞌnara-ita ookara kapooꞌnanka tavoꞌaramaung, eeꞌnoko niiꞌ tee-koo oꞌnorimaunge. Eeꞌnoko tee tee narung Ovoring otong, Jiisuuꞌ Karistooꞌ. Tee eeꞌnara ookara kapooꞌnanka teie pomaung eeꞌnoko niiꞌ teie domamariri oꞌnoring.

Nka tee ookarai nantoonge aung amuriiꞌ noruꞌ noruꞌaavaꞌ. Niiꞌning tee nantoong diiꞌkoo-nupoong aruaruꞌnanka teroita, temeng-koo datavoroi otoromaung, taamang daring mmeꞌ masikaꞌantavai otong. Eeꞌnoko teinge temuriiꞌ naiaama pankaruntoonge tee noruꞌaripeuꞌ orakaꞌ nkoarimaung. Taamange tee, bane aremuriiꞌke, Kumponing-aape beꞌantamuriaukaꞌnung. Niiꞌ naiampiarui dei doonko siꞌmariarupeuꞌ Kumponing-koo. Eeꞌnoko naiampiri dei deto siꞌmariarupeuꞌ Kumponing-koo. Tanatarariai diiꞌ purintaririning, naierima teing diiꞌkoo aruaruꞌoroi otoroining orari-antaverereriꞌneeng. 10 Tee eeꞌpinaꞌ: Naninge boontunang-koong taamang nai-koo orakaꞌ noruꞌumaunge tee daꞌ oorupeuꞌ boontunang naiaamanava-koo naikiko temuriiꞌ boontunang-koong taamang daang pinaꞌ noruꞌei. Eeꞌnoko teie oorura piavora paararupeuꞌ bane pankaruntoonge orakaꞌpinaꞌ noruꞌuitaaꞌ. 11 Teeꞌ nkorarako dakaang noruꞌke tee orari-antavupeuꞌ tee daꞌmaikoꞌ aruaruꞌ, Karistooꞌ tee-koo bouꞌnung. 12 Niiꞌning niiꞌmaikororiꞌkoo tunsie noruꞌarimanaꞌ siong-koo poreꞌoromaung, eeꞌnoko biikaang tunsie noruꞌarimanaꞌ daang-antavariainaꞌ nkoverima dake tee Karistooꞌkoo orakaꞌnko nkoveing. 13 Teeꞌkoo tee teie taamange mmaikoꞌ duaꞌantavupeuꞌnung-pinaꞌ ooama ninge maaꞌ ampaukaꞌnung tee bioꞌ, tee ntaraꞌmaꞌnung duaꞌantavamiꞌneenga.

Copyright information for `NAS