1 John 3

Ooveriko arekeeꞌ Niumai Kumponinge aaꞌnaꞌ masikaꞌ piaamurira baurukaaꞌ marimuruꞌnung. Nka tee niiꞌ tamung baurukaaꞌ deeaing, teka baurukaaꞌ masikeng. Nantoonge kansiꞌkoo-nupoonge teeꞌ tasiꞌmaariaꞌ, aiꞌ teinge tee Karistooꞌ noruꞌaavaꞌ. Ee mmaikoriꞌ, niiꞌ teing enang Kumponing baurukaaꞌ, eeꞌnoko tee damaꞌke niiꞌ oꞌnoriainaꞌ mmeꞌ siraꞌparavaruko noruꞌampiaꞌ. Teka eeꞌ noruꞌampiri otong niiꞌke: Tee toroarako niiꞌ teing tee-pinaꞌ nariꞌ oroꞌmariainge, aiꞌ meenaꞌpoi otoinaꞌ ooampira paarimariaing. Eeꞌnoko teing ookara nantoong aing kapooꞌnanka nkoaravainaꞌ nooruupiai nempaamaing teing domang kiiroraaꞌantavarimaing tee Karistooꞌ teeꞌ kiiroraaꞌari otomanaꞌ nariꞌ otorooꞌnaang.

Teing nantoong orakaꞌnko nkoaamainge tee boto totoꞌpaamaung, aiꞌ orakaꞌnko tee boto-totoꞌ. Teka diiꞌke noruꞌeri otong tee Karistooꞌ tee siraꞌparuꞌ niikaning orakaꞌ nkonanka tontaꞌuaꞌnaang, eeꞌnoko tee-koo tee orakaꞌnko otoaung. Naning tee Karistooꞌkoo kuung otomaung tee orakaꞌnko danto nariꞌ nkovui otoaung, eeꞌnoko teie naninge orakaꞌ nko-koo bakearavaunge tee Karistooꞌ tasiꞌpuaung eeꞌnoko noruꞌuaꞌ tee. Ee aing diiꞌ nkaning toireꞌ okiꞌnarekaꞌ, naninge diiꞌ aava-koo tauraꞌdariaukaꞌ. Baa tee naning aarumo koontoꞌ nkovumaung tee koontoꞌ tee-pinaꞌ Karistooꞌ koontoꞌ otomanaꞌ. Eeꞌnoko baa tee naning orara aarumo nkovumaung tee Sietaniꞌ bakaang, aiꞌ tee tee eeꞌnara Sietaniꞌ tutuntoma-ita orakaꞌnko nkovui otomaung. Tee Kumponing Bauring siraꞌparuꞌnooꞌ tee tee-koo nko-nko Sietaniꞌ bakaang orari-anta-koo. Baa tee naning Kumponing-koo nerakaꞌpari pontoꞌaravainge tee orara nko-nko nkovuaꞌ otoaing, aiꞌ tee-koo tee Kumponing bakaang domaang otong. Teeꞌkoo teie orara nko-nko nko-koo makosi deeaꞌ Kumponinge nerakaꞌantavui pontoꞌantavuuꞌnung-koo, bakaang aarumo tee-koo kuung sipuma. 10 Enang tee, eeꞌ niiꞌke tasiꞌpampiaing baata teing Kumponing baurukaaꞌ eeꞌnoko baata teing Sietaniꞌ baurukaaꞌ: baa tee naning koontoꞌnaꞌ nkovuaung eeꞌnoko baꞌmaikoꞌ piaavuaung, tee tee Kumponing bakaang naning deeaꞌ.

Niiꞌ Narunaꞌ Narunaꞌ Piaameeriaing

(3:11–5:21)

Jiisuuꞌke Piaa Masikung Naumuruꞌnaꞌ Niiꞌke Teeꞌ Nariꞌ Nkomeeriiꞌnaang

11 Aung tee naunau diiꞌke tutuntoma-ita taaraveruꞌnung, niiꞌ narunaꞌ narunaꞌ piaameerimatoaing. 12 Eeꞌnoko niiꞌ tee-pinaꞌ Keiniꞌ nkomariaukaꞌ Sietaniꞌ bakaang naning-pinaꞌ, tee baaraꞌmaꞌnung dupisiꞌuuꞌnung. Aming-koo dupisiꞌuuꞌ tee? Tee aaꞌ bakaang nko-nko orara deemparioꞌ, tee baaraꞌmaꞌnung munteꞌuuꞌ bakaang nko-nko tampara deemparako.

13 Taꞌniniriaukaꞌ diiꞌ mmaikoriꞌ nantoonge kansiꞌkoo-nupoonge munteꞌdaariko. 14 Niiꞌke tee niiꞌmaikororiꞌ piaavarampimaung-koo eeꞌ tasiꞌmarimaung: niiꞌ tanuaang booꞌnameng-eta domamaririning. Baa tee naning baꞌmaikoꞌ piaavuaung tee booꞌaapenameng-koo mmeꞌ otong. 15 Tee naning baꞌmaikoꞌ munteꞌumaung tee eeꞌnara dupisiꞌnko eeꞌnoko tee diiꞌke noruꞌeri otong teing nantoong dupisiꞌ nkonuka teing ookara domaang oparavaung okovuriaꞌ.

16 Eeꞌnoko piaa masikung niiꞌke tasiꞌpampimaung Karistooꞌke niiꞌkoo booꞌparara naumurioꞌ, eeꞌnoko napoꞌ niiꞌ teeꞌke niiꞌmaikororiꞌ paku-koo moompiainge. 17 Teka naning narung kapooꞌnanka aung kansiꞌkoong otoꞌevui deekoꞌ, eeꞌnoko baꞌmaikoꞌ ataꞌkuko teie tamung dutai oovumatopeuꞌ, arekeeꞌ Kumponing bakaang piaa tee-koo kuung otoing tamparapeuꞌ? Makotuaꞌ. 18 Ee aing diiꞌ nkaning toireꞌ okiꞌnarekaꞌ, kara narunge karompima piaavarampiaukaꞌ, teka nko-nko ninka nariꞌ masikaꞌ piaavarampiaing.

Piaa Oroꞌantavampima Niiꞌ Kumponinge Baurukaaꞌ Taaꞌniꞌantamaripeuꞌnaꞌ

19 Niiꞌ masikaꞌ piaameerima niiꞌka tasiꞌmariri oꞌnoriaing niiꞌ teing kara masikung okonara bakaning, eeꞌnoko bane teie niikaang domange tokoonaꞌ tuutunamuriko deekoꞌ, niikaang domang kuaaꞌmoriaing Kumponing-koo uroꞌkanooꞌke. 20 Aiꞌ bakaang kara
3:20Ooveai Jooni 13:35, “Diiꞌke diiꞌka teeꞌ piaareeriko ookara nantoonge tasiꞌdaaripeuꞌ diiꞌ nkaning barevare-nupoong.”
tee niikaang domang karomanaꞌkoo dau basi, eeꞌnoko teie tee ookara kapooꞌnanka noruꞌui otong.
21 Ee mmaikoriꞌ, enang niikaang domange tuutunamuriaruko niiꞌ teing avoroꞌ oꞌnoriaꞌ Kumponing-koo dutakanooꞌke. 22 Eeꞌnoko tee niiꞌke teing kapooꞌnanka, aremuriiꞌ eentavampimaatopeuꞌning teing nkavampimatopeuꞌ tee bakaang boto siompampimaung-koo, tee dotu-antaning kapooꞌnanka nkoampima. 23 Eeꞌnoko bakaang boto tee aung: Niiꞌke tee Bauring Jiisuuꞌ Karistooꞌ bakaang miring tasiꞌpampira masikaꞌantavampiaing tee tee Kumponinge teroita Pakoꞌpariꞌniiꞌ domamuri taremuriainooꞌkoo, eeꞌnoko narunaꞌ narunaꞌ piaameerimatoai teeꞌ eeꞌnaꞌ botomuruꞌnaꞌ nko-koo. 24 Ookara teing bakaang boto siompaamatomaing teing tee-koo kuung otoromaing eeꞌnoko tee teing-koo kuung otomaunge. Eeꞌnoko niiꞌke tee noruꞌampiri otong tee niiꞌkoo kuung otomaung teie Tanuaang Meekunge amuruꞌnunge noruꞌantamuriko.

Copyright information for `NAS