1 Peter 3

Niiꞌ Nampeesiniiꞌnuka Tampara Aarumo Ninka Oꞌnoriainaꞌ

Diiꞌ manikuꞌ teeꞌke, diiꞌunkaampi-koo boong otorimaatoainge eeꞌnoko teing-koo niiꞌning Kumponing bakaang kara siompaavaing deekoꞌ teie tampara aarumoi diiꞌ biiꞌankaampi diikaange Kumponing-aape barampereriaing, karai deeaꞌ. Tenang teinge ooaama tee diikaang meeꞌduꞌpiari nariꞌ otoꞌ teing bereꞌariaing. Diikaang tampaꞌ oroꞌnaꞌ mono-koo damaꞌdunooꞌ deemparavaukaꞌ tampaꞌ simpiꞌdovantarima diikaning dapo eeꞌnoko kapooꞌ tampeng kooro dovang-kooning siꞌdarima napoꞌ mononopaꞌ tampaꞌ oroꞌ kuruntarima. Teka nepunepuꞌ diikaang tee tee-koo naning-koo domang-koo kuung otoai teing ninka kapooꞌ aarumo tampeng paaꞌkoo makosi deeaing ninka aaꞌning ninka: banainge otoꞌ eeꞌnoko domang dooroontoꞌ. Aing teing eeꞌning Kumponing-koo dutakanooꞌke bakei dakausiꞌ masikeng. Teeꞌ nariꞌ otorimaatoaing teing temuꞌnupoong manikuꞌ meekupoong Kumponing-koo baitoarikoꞌning nepuꞌarikoꞌnaꞌ biiꞌunkaampi-koo boong otoroi. Teeꞌ eeꞌnaꞌ Seeraꞌke Eebaraamiꞌ kara taaravuma siompukoꞌnaꞌ ovoring tampuma tee. Eeꞌnoko diiꞌ teing eeꞌning teni baurukaaꞌ diiꞌke tampaꞌ nkorarimatoaing deekoꞌ baruꞌ aroreriaꞌ otori.

Napoꞌ teeꞌ nariꞌ diiꞌ biiꞌunkaampi teing ninka diiꞌankaampi ninka mataurariri otorimaatoai makosinaꞌ deto deeng-antavereri teing baruꞌ iriꞌoroaing deempariko, aiꞌ teing teinge diiꞌ ninka nariꞌ tee barenku okovuriaining biraankerurira domang-antaruriaing-koo. Teeꞌ nkorariaing diikaang kunsi avoꞌaravarooꞌnaang.

Doong Kante Teing Niiꞌning Nantoong Tampaꞌ Nkoarampimaatoaing

Tee-koo asiꞌnooꞌke aaꞌdampimang: Diiꞌ ookara nariꞌ marireeri otorimaatoaing, nariꞌ mantonteeri namaiaꞌpinaꞌ mantontariri tampaꞌ domang piaareerima eeꞌnoko doonko noruꞌdariri. Orara orarai makuꞌeriaukaꞌ, barakosiꞌ barakosiꞌke makuꞌeriaukaꞌ, teka aampariꞌeri biraanke-antareerimaatoai, aiꞌ diiꞌ teing teeꞌ nko-koo bokururuꞌning diiꞌke bakaang biraanke nkaveriiꞌnaang. 10 Teeꞌ Daari Meekunge aaꞌpumanaꞌ,

“Baa tee naning domampari otoꞌkoo piavoi otoing doong tampeng oovuuꞌnaang piavora, tee orakaꞌ karoaukaꞌ eeꞌnoko teie tee daang minkuvuaukaꞌ.
11 Eeꞌnoko orakaꞌ nko-eta bereꞌarara tampaꞌnko nkovuaing, eeꞌnoko teie tee mooa besiꞌuma siompui otoaing. 12 Aiꞌ teie Ovoringe teing koontoꞌnuka tampaꞌ oovuri tarevurimaung eeꞌnoko bakaang punkaaꞌ tee daateꞌari otomaung teing biikaang kunsi tampaꞌ taara-koo. Teka Ovoring bakaang oing tee teing-eta kapooꞌ orara nkoaamaing-eta munteꞌuri akoꞌ toroari otong.”
(Kena 34:12-16)

Tampaꞌ Nkoarampiko Sisikeera Toraꞌantamaariko Deekoꞌ Makosi

13 Diiꞌ enang baie baikeruriiꞌnaang diiꞌ kapooꞌ tampara narung siomperimaing deekoꞌ? 14 Teka bane kapooꞌ tampara nkoverima baike kuneꞌeriaing deekoꞌ diiꞌ teing Kumponinge tee-koo biraankeruriaining. Teeꞌ Daari Meekunge aaꞌpumanaꞌ,

“Nantoonge mauꞌdaariko arorerima domang mankiꞌdoriaukaꞌ.”
(Aisaiaꞌ 8:12)

15 Teka diikaang domange Karistooꞌ pankaing-antaveri otorimaatoai diikaang Ovoring deeng-antaveri. Ookara batei-koo maamurariri otorimaatoai nantoong niaꞌdaariaining nauereriainaꞌ okoraꞌnooꞌ diiꞌke tee Ovoring bokururiaing nemperi otorimaung-koo, teka dooroontariri doonko noruꞌdariri teeꞌ nauereriai. 16 Eeꞌnoko tarerariri otoriai diikaang domang kiiroraaꞌari otoꞌkoo teing diikaang tampara aarumo Karistooꞌkoo kuunge nkoverimaung orakaꞌ minkuaamaing maiaꞌoroainaꞌ teeꞌ nkoraarimaung-koo. 17 Kapooꞌ tampara nkoverima baike Kumponinge tauraꞌpuing kuneꞌkoo tee tampaꞌ, teka kapooꞌ orara nkoverima deekoꞌ orakaꞌ. 18 Aiꞌ Karistooꞌ tee teeꞌ nariꞌ bouꞌ nantoong biikaang orakaꞌ nkonanka-koo. Terong-koo ookara dakaꞌpui namuꞌke pareka bakevuuꞌ, tee eeꞌnara koontoꞌ deemparitaaꞌ niiꞌ koontoꞌnuka deeaing Kumponing-koo tavoꞌmuriiꞌnaang teie. Mono nameng dupisiꞌaioꞌ teeꞌ booꞌparuꞌ, teka Kumponing bakaang Tanuaange daaꞌuioꞌ domampari otong.

19 Tenang bakaang mono booꞌpari otoko tanuaang-naung tee booꞌnuka-koo daankiaruꞌ kiimatanooꞌke. 20 Aing teing eeꞌning tanuaananka nantoong urikupoong-kooning Kumponing taaravaavarukoꞌ ning, teing bereꞌariiꞌnaang Kumponinge pankaroong nempurikoꞌning tenang Nooaꞌke tee aakaꞌnareng taꞌnampukoꞌnang. Teka okiꞌning nantoong ~beenaumo-taa naing aareri~koo ntong-koo daue otorouꞌning domampariruꞌ. 21 Ntonge aareri-koo kuung otoroko tampooꞌaape domampariainooꞌ taaꞌbakavuruꞌnaꞌ niiꞌ teeꞌ nariꞌ kompampima Karistooꞌkoo kuung oꞌnori domamariainooꞌ basimariiꞌnaang bakaang iriꞌke booꞌketa daaꞌantavuuꞌnunge pakumuriko. Tee tee ntong-koo minkie meekaꞌanta nkavampimaung kuꞌmiꞌ mono-ita kui-anta-koong deeaꞌ Kumponinge tampeng-pinaꞌ oomuriiꞌnaang, teka tee domang kiiroraaꞌketa maraka-anta Kumponing-koo Karistooꞌ baitoampiri nariꞌ otoꞌkoong teie domang-antamuriiꞌnaang. Tee tee eeꞌnara booꞌketa daaꞌarara paning-koo deto bera Kumponing-koo tampavine-koo otomaung, ookara kapooꞌkoo dau, aaꞌning-koo: koosinunanka, arekeeꞌ oroꞌning ovontung eeꞌnoko iriꞌpoꞌnupoong.

22 

Purimariai Parapaara Pankainge Mankiꞌantamuriko

Copyright information for `NAS